Waalhakelhiya attu 33
33
Nkwaha wo attu o Israeli ukhuma Umisri mpaka Umoabu
1Alha anottwara vano alha phi mapuro aamakachilhe aya attu o Israeli, vaari aya munkwahani ukhuma Umisri, anari mmiphingoni mwo makosho aya, ahoolhelhiyaka ni ashinna Musa ni Naharuni. 2Ashinna Musa aholhepa nchina no kila vakittu vaamakachilhe aya nipuro, nipuro baada yo nipuro, wo ulheheriya ni Apwiiya Nlhuku.
3Yamalheke, attu o Israeli ahothama ilhapo yo Uramesesi uwo nihuku no khumi ni nthanu no mweeri wo upacha, nihuku nimoka baada yo nihuku no Pasaka o upacha. Nkayaathama wo wiishipa chinene, umihoolho wa attu o Umisri onkhaye, 4ikatema attu o Umisri ayo, vaari yaavithachaka ayari aya o nttara ashilhopwana, yeeviye ni Apwiiya Nlhuku, ukhalhawaya Apwiiya Nlhuku ahotwarusha ata milhuku chaya. 5Yamalheke, attu o Israeli ahothamacha urwaa Uramesesi, nkayeesha nipuro naya Usukothi uwo. 6Nkayaachokholha nkwaha wo ukhuma Usokothi, nkayeeshacha nipuro naya Uethamu, uchereshere uthako. 7Nkayaachokholha nkwaha wo ukhuma Uethamu, nkayaarukunuwa ni uhokolhia mpaka Upi Hahirothi, mpata wo unoshelha nchuwa Ubaal Sefoni, nkayeeshacha nipuro naya vakhiviru ni Umigidoli. 8Nkayaathama ni uchokholha nkwaha wo ukhuma Upi Hahirothi, nkayaaviracha variyari ibahari yo Ushamu mpaka uthakoni Uethamu, yamalheke nkayarwaa nkwaha wo mahuku mararu, nkayeeshacha nipuro naya Umara. 9Uthama Umara, ahorwaa mapaka Uelimu. Uelimu uwo phi waari marapo khumi ni meelhi o maashi ni miri cho mitende makhumi saba, nkayeeshacha nipuro naya vavawo vakittu vawo. 10Nkayaarwaa nkwaha wo ukhuma Uelimu, nkayeeshacha nipuro naya vakhiviru ni ibahari yo Ushamu. 11Uthama vavawo, ahochokholha nkwaha ukhuma ibahari yo Ushamu nkayeeshacha nipuro naya uthakoni Usini. 12Vaathamilhe aya, ahochokholha nkwaha ukhuma uthako wo Usinai, nkayeeshacha nipuro naya Udofika. 13Uthama Udofika, nkayaarwaa ni weesha nipuro naya Ualushi. 14Vaathamilhe aya, ahomaka Ualushi nkayeeshacha nipuro naya Urefidimu, vakittu vaharii ni maashi o uwuriya. 15Nkayaathamacha Urefidimu nkayeeshacha nipuro naya uthako wo Usinai. 16Vaathamme aya Usinai ahorwaa, ni weesha nipuro naya Ukiroth Hataava. 17Uthama Ukiroth Hataava, ahorwaa ni weesha nipuro naya Uhaserothi. 18Vaathamilhe aya Uhaserothi, ahorwaa ni weesha nipuro naya Urithma. 19Uthama Urithma, ahorwaa nkayeeshacha nipuro naya Urimon Perezi. 20Baada yo uthama vavawo, ahochokholha nkwaha ukhuma Urimon Perezi, nkayeesha nipuro naya Ulibna. 21Uthama Ulibna, nkayeeshacha nipuro naya Urisa. 22Nkayaachokholha nkwaha ukhuma Urisa, nkayeeshacha nipuro naya Ukehelatha. 23Uthama vavawo, ahorwaa nkwaha, nkayeeshacha nipuro naya umwaakoni Usheferi. 24Baada yo uthama umwaakoni Usheferi, ahorwaa ni weesha nipuro naya Uharada. 25Vaathamilhe aya Uharada, ahorwaa nkayeeshacha nipuro naya Umakelothi. 26Nkayaachokholha nkwaha ukhuma Umakelothi, nkayeeshacha nipuro naya Utahathi. 27Baada yo uthama Utahathi, ahorwaa nkayeeshacha nipuro naya Utera. 28Vaathamilhe aya vavawo, ahorwaa nkwaha ukhuma Utera nkayeeshacha nipuro naya Umithka. 29Baada yo uthama wowo, ahochokholhacha nkwaha ukhuma Umithka, nkayeeshacha nipuro naya Uhashmona. 30Vaathamilhe aya Uhasmona, ahochokholhacha nkwaha ukhuma Uhashmona, nkayeeshacha nipuro naya Umoserothi. 31Nkayaachokholhacha tho nkwaha ukhuma Umoserothi, nkayeeshacha nipuro naya Uben Yaakani. 32Vaathamilhe aya wowo, ahorwaa nkwaha wo ukhuma Uben Yaakani, nkayeeshacha nipuro naya Uhor Hagidgadi. 33Baada yo vavawo, ahochokholha nkwaha ukhuma Uhor Hagidgadi, nkayeeshacha nipuro naya Uyot Batha. 34Nkayaachokholha nkwaha ukhuma Uyot Batha, nkayeeshacha nipuro naya Uabirona. 35Vaathamilhe aya, ahorwaa nkwaha wo ukhuma Uabirona, nkayeeshacha nipuro naya Uesion Geberi. 36Nkayaachokholha tho nkwaha nkayarwaacha Uesion Geberi, nkayarwaa ni weesha nipuro naya uthako wo Usini, yaani Ukadeshi. 37Ukhuma Ukadeshi uwo, ahorwaa nkayeeshacha nipuro naya umwaakoni Uhori, umwiinanoni wo ilhapo yo Uedomu. 38Wo malhehero a Apwiiya Nlhuku, opochera ishaani Naharuni ahowelha vachulhu mwaako wo Uhori, ni wowo, nkayaarimelha nihuku no upacha no mweeri wo nethanu, iyaakha yo makhumi ncheshe toka attu o Israeli vaakhumilhe aya Umisri. 39Naharuni vaarimelhe aya vachulhu mwaako wo Uhori, aari ni malhipa o iyaakha 123. 40Amwene Naardi, o nikosho no attu o Ukanaani, aakhalha mpata wo uchawa wo ilhapo yo Ukanaani, aheewa wiira attu o Israeli anowaacha. 41Ukhuma mwaako wo Uhori, attu o Israeli ahochokholhacha nkwaha wo ukhuma mwaako wo Uhori, nkayaarwaa ni weeshacha nipuro naya Usalmona. 42Ukhuma Usalmona uwo, ahochokholha nkwaha, nkayeeshacha nipuro naya Upunoni. 43Uthama Upunoni, ahorwaa nkwaha nkayeeshacha nipuro naya Uobothi. 44Baada yo vavawo, ahochokholha nkwaha ukhuma Uobothi, nkayeeshacha nipuro naya Aiye Abarimu, vachereshere wo Umoabu. 45Uthama vavawo, ahochokholhacha nkwaha ukhuma Uiye Abarimu, nkayaarwaa ni weeshacha nipuro naya Udibon Gadi. 46Uthama vavawo, ahochokholha nkwaha ukhuma Udibon Gadi, nkayeeshacha nipuro naya Ualmon Diblathaimu. 47Baada yo uthama wowo, ahorwaa nkwaha wo ukhuma Almon Diblathaimu, nkayeeshacha nipuro naya uri miako cho Uabarimu, vakhiviru mwaako wo Unebo. 48Vaathamilhe aya, ahochokholha nkwaha ukhuma umwaakoni Uabarimu, nkayaarwaa ni weesha nipuro naya vakittu voombone, Umoabu ukhopelhelhe wo mwoolhoko wo Uyordani vakhiviru ni Uyeriko. 49Nkayeesha nipuro naya vakhiviru ni mwoolhoko wo Uyordani variyari yo Beth Yeshimothi ni ntimbe no Abel Shitimu, umatimbe o Umoabu.
50Yamalheke, Apwiiya Nlhuku nkayoolhumana ashinna Musa vavawo velhaponi vakittu voombone Umoabu vawo, ukhopelhelhe mwoolhoko wo Uyordani, vakhiviru ni Uyeriko, ni weerelha ashinna Musa wiira, 51“Mwaahimerieke attu o Israeli wiira vanohalha inyu ulhapuwa mwoolhoko wo Uyordani ni uphiya ilhapo yo Ukanaani, 52mwomwolhacheke ashinene ilhapo iyo, onkhaye umihoolho winyu. Mwatanganyacheke isinyago cho uhemiya chaya chonkhaye, cho malhuku ni cho uhaniya, ni upomolhacha kila vakittu vanolhapelhacha aya. 53Nkusheke yeyo ilhapo iyo ni ukhalha mwommo, ukhalhawaya kihouvahani ikhalheke yawinyu. 54Mwamianiheke yeyo ilhapo iyo, wo upanga mwaavi wo uttwaraana ni iwani chinyu. Attu o nikosho nuulhupalhe, mwaavaheke vakittu volhupalhe, ni attu o nikosho nikaani, mwaavaheke vakittu vakaani chiicho. 55Nansho yakhalhaka khannomolhacha ashinene ilhapo iyo, paahi alhe anohalha inyu waahiya ayo, anookhalha thoko ikokholha mmiithoni mwinyu, ama thoko miiwa chinohoma mpararini mwinyu, yayo anouhuvihani. 56Ni mii kinoupangelhani mwaattiva, thoko chilhakenlhe aka waapangelha yayo manyaattu ayo.”
The Bible Version in Makua @The Word for The World International and Makua Language translators. All rights reserved.