Waalhakelhiya attu 32
32
Makosho o unoshelha nchuwa mwoolhoko wo Uyordani
1Attu o makosho a Narobeni ni a Nagadi ahokhalha ni mihuwo chinchi chinene. Paahi voonne aya wiira ilhapo yo Unayazeri ni Unagadi chaholhoka uhuwelha mihuwo, 2ahaarwelha ashinna Musa, opochera ishaani Naeliazari ni ahoolhelhi o attu, nkayeerelha wiira, 3“Iwani cho Uatarothi, Udiboni, Uyazeri, u Naheshboni, u Naeliale, u Nasebamu, u Nanebo ni u Nabeoni, 4ilhapo yaakottonlhe aya Apwiiya Nlhuku wo nlhatu nihu, attu o Israeli, phi ilhapo yorera uhuwelha mihuwo, ni hii nihanaa mihuwo chinchi chinene. 5Paahi etu, mwanirumelhelhaka, ninoulhepelhani wiira, nnivaheke ilhapo ilha ikhalheke yawihu, nhinirweehe ukhopelhelhe wo mwoolhoko wo Uyordani.”
6Ashinna Musa nkayaakhulha attu o makosho a Nagadi ni Narobeni ayo wo wiira, “Chani nnothanana uhalha vava etu, uno ashilhoko inyu attu o Israeli arwaaka ukhotoni? 7Woonaka nnowaakhwiiha nrima attu o Israeli naninyu, wiira ahirwee wiilhaponi Apwiiya Nlhuku unaavaha aya? 8Paahi etu, phi chiichammo chaapannge aya manyaapwiiya inyu vaarumilhe aka ukhuma Ukadesh Barnea arwee ahotelhe ilhapo. 9Yayo manyaattu ayo ahorwaa mpaka ntette no Ueshkoli, uhotelhani, nkayoona ilhapo. Nansho vaahokolhelhe aya, ahaakwiiha nrima attu o Israeli wiira ahikelhache wiilhaponi waavahilhe aya Apwiiya Nlhuku. 10Paahi etu, nenno nihuku nno Apwiiya Nlhuku ahorushiya, nkayaalhupelha yeeraka wiira, 11‘Ukhalhawaya khayaakirumelhenlhe, khaawo mena ntu riyoothe munlhokoni mwa attu akhumilhe Umisri aari ni malhipa o iyaaka makhumi meelhi ni uthepa, nohalha uphiya ilhapo kilhupenlhe aka uvahani mwaatti, achishaana a Aburahimu, a Naisaka ni a Nayakhobo.’ 12Onkhaye khanophiyacha, yaahikhalhe Nakalebu anaaya Nayefune, o nihimo ni Akenizi, ni Nayoshua anaaya Nanuni, ukhalhawaya yayo manyaattu ayo ahokirumelhelha rata. 13Paahi Apwiiya Nlhuku ahorushiya chinene vachulhu wa attu o Israeli, nkayaapanga wiira akhalhe attu o ukukuriacha uthakoni wo iyaakha makhumi ncheshe, attu o iyari yonkhaye, yaapannge cho uhilhoka umihoolho waya ayo ahorimeelhacha. 14Ni vano etu, inyu mwaatti o iyari ya attu o uwonya, nhothathuwa ukhalha vakittu va manyaashulhupalhe inyu, wiira nthepihe tho urushiya chinene wa Apwiiya Nlhuku vachulhu wa attu o Israeli. 15Ni inyu mwakhotaka waattwara, anouhiyani tho uthakoni, ni inyu nnowaakukureeha attu onkhaye alha, arimeelhache.”
16Paahi attu o makosho a Narobeni ni Nagadi ayo ahorwaa wa ashinna Musa, nkayeerelha wiira, “Nnihiyeke thoko nitheke ihilhi cho weesha ikhondoro chihu, ni waathekelha iwani cho urukurerihiya ningome achishaana ihu vaa. 17Namalhihaka, hii naashinene ninookhalha tayari urwaa ukhotoni vamoka ni ashikhunanihu attu o Israeli. Ni ukhotoni uwo, hii ninokoweemelha umihoolho, mpaka naapihe vakittu vanothanana aya ukhalha. Yeyo ikatema iyo achishaana ihu anowa aakhalhacha iwani chirukureriye ni ningome, wiira niichaakihe nihikelhelhiye ni amalhaponi o ilhapo ilha. 18Khaninohokolhia uwani mpaka attu o Israeli akina onkhaye, vanohalha aya upatta iwani chaya cho uhiyeriya, chikawelhachiye aya. 19Nansho, khaninokusha chittu chiriyoothe cho mmilhokoni mwaya, ukhopelhelhe wo mwoolhoko wo Uyordani, ukhalhawaya hii nihopatta vakittu vawihu uhito uno, mpata unosha nchuwa mwoolhoko wo Uyordani uno.”
20Nansho ashinna Musa nkayeerelha wiira, “Yakhalhaka nnoopanga thoko chuulhumachilhe inyu, paahi vavavaa umihoolho wa Apwiiya Nlhuku, nkusheke ikerero chinyu nrwaacheke ukhotoni. 21Kila ntu o waatakana ikhoto munlhokoni mwinyu, noolhapuwa mwoolhoko wo Uyordani, nhoolhelhihiyaka ni Apwiiya Nlhuku, nnowaatakacha amalhaponi inyu mpaka Apwiiya Nlhuku vanaakottolha aya, 22ni uvarelha ilhapo. Mwamalhihaka upanga yayo, nhokolhieke, ukhalhawaya nhotimiriha ishaani inyu wa Apwiiya Nlhuku ni wa ashilhoko inyu attu o Israeli. Yamalhaka, Apwiiya Nlhuku anoorumelhelha wiira ilhapo unosha nchuwa yo mwoolhoko wo Uyordani ilha ikhalhe yawinyu mwaatti. 23Nansho, kinowaamukani wiira, mwaahitimiriheke malhehano inyu, nnoowaawonya Apwiiya Nlhuku, ni vavawo nchuwelheke wiira nnootwarushiya. 24Mwaathekelheke achishaana inyu iwani, ni ihilhi cho ikhondoro chinyu, nansho mpangeke thoko chilhehilhe inyu.”
25Yamalheke, attu o nikosho a Nagadi ni o nikosho ni Narobeni nkayeeracha, “Hiyaano anamitheko inyu ninoopanga thoko chinilhehenre inyu. 26Manyaahanu ihu, achishaana ihu, anoohalhacha vava, iwani chi Nagileadi va, vamoka ni ikhondoro ni ing'ope chihu. 27Nansho hii anamitheko inyu va, niri tayari urwaa ukhotoni, uno niholhelhiyaka ni Apwiiya Nlhuku. Ninoolhapuwa mwoolhoko wo Uyordani, naatakane thoko chinre inyu wo unihimeria.”
28Paahi ashinna Musa nkayaahimiacha malhehero anottwara alha wa opochera ishaani Naeliazari, wa Nayoshua anaaya Nanuni, ni wa ahoolhelhi o imbumba cho o makosho a attu o Israeli. 29Yenre, “Yakhalhaka attu o makosho a Nagadi ni o makosho a Narobeni anoolhapuwacha mwoolhoko wo Uyordani, anari vamoka ni inyuva, anakushachilhe ikerero chaya, uno anoholhelhiyaka ni Apwiiya Nlhuku, nkamwaakottolha ni uvara ilhapo iyo, paahi mwaavaheke ilhapo yo Ugileadi ikhalhe yawaya. 30Nansho yakhalhaka khanolhapuwa mwoolhoko wo Uyordani vamoka ni inyu mwaatti, urwaa ukhotoni, paahi anookhalhelha ilhapo yo Ukanaani, irii uneelha nchuwa, vamoka ni inyu mwaatti.”
31Attu o makosho a Nagadi ni a Narobeni nkayaakhulhacha yiiraka wiira, “Thithi, hii anamitheko inyu ninoopanga thoko Apwiiya Nlhuku chinirumilhe aya. 32Wo uholhelhiya ni Apwiiya Nlhuku, ninoolhapuwa mwoolhoko, ni ninoorwaa uwaatakanani ikhoto, mpaka ilhapo yo Ukanaani, wiira nivarelhe ilhapo nivahiye ihu, uno, unoshelha nchuwa mwoolhoko wo Uyordani uno, ikhalhe yawihu.”
33Paahi ashinna Musa nkayaavahacha attu o makosho a Nagadi ni a Narobeni, ni inusu yo nikosho ni Namanase anaaya Nayusufu, ilhapo yonkhaye ya amwene Nasihoni o ilhapo yo Uamori, ni o ilhapo ya amwene Naogu o Ubashani, vamoka ni iwani ni ilhapo chaarukureria chechiyo iwani chiyo.
34Yamalheke, attu o nikosho ni Narobeni yahothekacha tho iwani cho Udiboni, Uatarothi, Uaroeri, 35ni Uatroth Shofani, ni Uyogibeha, 36Ubeth Nimra ni Ubeth Harani. Chechiyo chaari iwani chaarukureriye ni ningome ni ihilhi cho mihuwo chaya nhina.
37Yamalheke, attu o nikosho ni Narobeni ahotheka ilhapo cho Uheshboni, Ueliale, Ukiriathaimu, 38Unebo ni Ubaal Meoni ni Usibima. Machina o chechiyo iwani chaathekachilhe aya chiyo, ahorukunushachiya, nkachaavahiya machina makina.
39Achishaana a Namakiri, anaaya Namanase, ahokelhelha ilhapo yo Ugileadi, nkayaavara mateeka ni uwoomolhacha attu o Uamori anokhalhacha mwommo ayo. 40Wo chiichammo etu, ashinna Musa nkayaavahacha attu o nikosho ni Namakiri anaaya Namanase, ilhapo yo Ugileadi, ni ayo nkayaakhalhacha mwommo. 41Attu o nihimo ni Nayairi, o nikosho ni Namanase, yahokelhelha iwani cho Ugileadi ni uvara mateeka, nkayaavaha nchina no Hawoth Yairi, maana aya, iwani chi Nayairi. 42Yamalheke, attu o nihimo ni Nanobi ni ayo ahorwaa ukelhelhani ni uvara ilhapo yo Ukenathi ni iwani chaya, nkayeehana nchina no Nobi, wo ulhikaana ni nchina naya anene ayo.
The Bible Version in Makua @The Word for The World International and Makua Language translators. All rights reserved.