Waalhakelhiya attu 31
31
Attu o Israeli anowaakelhelha attu o Umidiyani
1Yamalheke, Apwiiya Nlhuku aheerelha ashinna Musa wiira, 2“Mwaalhivererihe attu o Umidiyani chittu chaapangilhe aya wa attu o Israeli, yamalhaka inyuva nnookhwa.”
3Paahi ashinna Musa nkayoolhumana attu ni weerelhacha wiira, “Mweesheke chiireru attu o waatakana ikhoto, arwaache yaatakane ni attu o Umidiyani, yalhivihere milhatu cha Apwiiya Nlhuku, wo nlhatu no attu o Israeli. 4Kila nikosho no attu o Israeli, naathanlheke attu elufu imoka o urwaa ukhotoni uwo.”
5Paahi attu elufu imoka ahothanlhachiya ukhuma kila nikosho mmilhokoni mwa maelufu a attu o Israeli, manyaalhopwana akhalhaka 12,000, yaarii o chiireru wiira yaatakane ikhoto. 6Yamalheke, ashinna Musa aharweeha attu ayo ukhotoni, nholhelhi aya akhalhaka Nafiniyasi anaaya opochera ishaani Naeliazari. Aarwelhe anakushilhe chittu cho vakittu vatakatifu ni mapalhapata oopiya waamuka attu. 7Ni ayo nkayaatakana ni attu o ilhapo yo Umidiyani, thoko Apwiiya Nlhuku chaalhehenre aya ashinna Musa, nkayeeva manyaalhopwana onkhaye. 8Mmilhokoni mwa yayo attu ayo eeviye ayo, ahaawo mamwene athanu o Umidiyani. Naevi, Narekemu, Nasuri, Nahuri ni Nareba. Tho, yaheeva Nabalaamu anaaya Nabeori.
9Chiichammo tho, attu o Israeli yahaavara mateeka manyaathiyana o Umidiyani ni achishaana aya, attu, ing'ope, ikhondoro, ipuri ni mihakhu chaya chonkhaye. 10Nkayaapaha mooro ilhapo aya, iwani chaya chonkhaye ni mapuro aya onkhaye. 11Nkayaakusha chittu chonkhaye chaavaranche aya ni mateeka onkhaye, attu ni ashinama, 12nkayaarwehelha ashinna Musa ni Naeliazari, ni attu onkhaye o Israeli yarii mmapuroni mmatimbeni mwo ilhapo yorera yo Umoabu, uhito wo mwoolhoko wo Uyordani vakhiviru ni Uyeriko.
Miphingo chinoohokolhia ukhotoni
13Ashinna Musa, ni opochera ishaani Naeliazari, ni ahoolhelhi onkhaye ni attu o Israeli yahothamacha unipuroni nkayaarwa uwekamelhani miphingo vaahokolhia aya ukhotoni. 14Nansho ashinna Musa ahaathunalhelha manyolhupalhe o miphingo ni ahoolhelhi o wemelhelha mikutiro cho miphingo cho attu elufu imoka, ni mikutiro cho miphingo cha attu yaahokholhelhe ukhotoni.
15Ashinna Musa nkayaakoha, “Chani etu woonaka nhaahiya manyaathiyana onkhaye alha akumi? 16Muupuwelheke wiira manyaathiyana phi attwanre nlhove ni Nabalaamu, nkayaapoteriha attu o Israeli wiira, ahaarumelhelhe Apwiiya Nlhuku Upeori ulhe, mpaka mareta o uhilhoka nkayaakhuruwelha attu a Apwiiya Nlhuku. 17Paahi etu, mweeveke achishaana ashilhopwana onkhaye ni kila nthiyana panche urupa ni nlhopwana. 18Nansho nheevache ashimialhi onkhaye ahinapacha urupa ni nlhopwana, mwaahiyeke akhalheke akumi wo nlhatu winyu mwaashinene. 19Attu onkhaye o mumphingoni mwinyu eevilhe, ama avanre ntembo, yayo akhalhacheke vathe, uchereshere nipuro wo ikatema yo mahuku saba, mwiittukurieke vamoka ni mateeka inyu, nihuku no neraru ni nihuku no saba. 20Tho, nttukurieke ikuwo chinyu chonkhaye, kila ittu ikooroshiye ni marapalha, yo mapururu o ikhondoro ama nakoto.”
21Yamalheke, opochera ishaani Naeliazari nkayeerelha manyaalhopwana yaahokolhelhe ukhotoni ayo wiira, “Ulha phi nttenga wa Apwiiya Nlhuku waavahilhe aya ashinna Musa. 22Idhahabu, fedha, ishaaba, iyuuma, nibati ni ichuumbu, 23yaani chittu chonkhaye chihinovia mooro, chittukuriyeke wo uvirihiya vamooroni. Ata inakhalhaka chiicho, chittukuriye ni maashi o uttukurielha. Chittu chikina chonkhaye chihinooria uttukuriya ni mooro, chittukuriyeke ni maashi o uttukurielha. 24Nihuku no saba, mpuputteke ikuwo chinyu, vavawo phi nohalha inyu ukhalha oombone umihoolho wa Apwiiya Nlhuku ni uhiyereriya wiira nkelhe unipuroni.”
Umianihiya chittu ni mateeka
25Yamalheke, Apwiiya Nlhuku yahoolhumana ashinna Musa ni weerelha wiira, 26“Inyuva ni opochera ishaani Naeliazari, vamoka ni ahoolhelhi o mahimo a attu o Israeli, mwaalhakelheke chittu chivariye, attu ni ashinama. 27Mmianiheke chittu chivariye chiyo mafungu meelhi, nifungu nimoka no miphingo chaarwelhe ukhotoni ni nifungu nikina no attu onkhaye. 28Mwamalhihaka vavawo, nkumiheke nifungu no mphingo waarwelhe ukhotoni nno, nkusheke isadaka ya Apwiiya Nlhuku. nkusheke mpatta mmoka ukhuma wo kila chittu imia nthanu, akhalhe attu, ing'ope, iphuta, ikhondoro ama ipuri, 29yamalhaka, mwaavaheke opochera ishaani Naeliazari, chikhalhe isadaka wa Apwiiya Nlhuku. 30Ukhuma nifungu no attu onkhaye nne, nkusheke ittu imoka wo kila chittu makhumi nthanu, akhalhe attu, ing'ope, iphuta, ikhondoro ama ipuri. Chechiyo mwaavaheke Alawi, avahiye ntheko wo Nihema Nitakatifu na Apwiiya Nlhuku.” 31Paahi Naeliazari ahopanga thoko Apwiiya Nlhuku chaalhehenre aya ashinna Musa.
32Nhakhu waavariye mateeka ni miphingo chiyo, ikhondoro ni ipuri chaari 675,000, 33ing'ope chaari 72,000, 34iphuta chaari 61,000, 35ni ashithiyana ahinapacha urupa ni nlhopwana yaari 32,000.
36Inusu yo chittu chiyo, chaakawelhachiye aya attu yaarwelhe ukhotoni, chaari ikhondoro ni ipuri 337, 500, 37munlhokoni mwo chechiyo, ikhondoro ni ipuri 675 chahokumihiya isadaka wa Apwiiya Nlhuku. 38Ing'ope chaari, 36,000, ni ing'ope 72 chahokumihiya isadaka wa Apwiiya Nlhuku. 39Iphuta chaari 30,500, ni iphuta 61 chahokumihiya isadaka wa Apwiiya Nlhuku. 40Attu, manyaathiyana yahaapanche urupa ni nlhopwana, yaari 16,000, ni wo yayo, 32 aari phi isadaka wa Apwiiya Nlhuku.
41Paahi ashinna Musa nkayaavaha opochera ishaani Naeliazari yeyo isadaka ikumihiye wa Apwiiya Nlhuku iyo, thoko Apwiiya Nlhuku chaarumilhe aya ashinna Musa.
42Inusu yo mpatta waavahiye attu o Israeli, yaakawilhe aya ashinna Musa ni weesha vathotho ilhe, yaholhikaana ni inusu yaavahiye aya mphingo waarwelhe ukhotoni ilhe, 43ikhondoro ni ipuri chaari 337,500, 44ing'ope chaari 36,000, 45iphuta chaari 30,500, 46ni attu, manyaathiyana ahinapacha urupa ni nlhopwana yaari 16,000. 47Ukhuma mpatta waavahiye aya attu o Israeli ulha, ashinna Musa ahonkusha ntu mmoka mmoka wo kila mateeka makhumi nthanu, ni ashinama makhumi nthanu, thoko chaalheheriye aya ni Apwiiya Nlhuku, nkayaavaha Alawi yaavara ntheko wo Nihema Nitakatifu na Apwiiya Nlhuku.
48Yamalheke, manyaahoolhelhi o miphingo, manyolhupalhe ni o weemelhelha attu o waatakana ikhoto, onkhaye ahorwaa wa ashinna Musa, 49nkayeeracha wiira, “Hii akarumiya inyu, nihaalhakelhacha attu onkhaye aneemelhelha ihu, nihoona wiira khaawo ata mmoka aya hinoonia. 50Paahi vano, nihowiiha inyipo cho idhahabu, makori, ibangili, ipete cho nhuri, ivipuli ni mikhova, kila ntu chaapantte awe. Nihokumiha chi chittu chilha, wiira nishukuru wo nlhatu no minepa chihu, umihoolho wa Apwiiya Nlhuku.”
51Paahi etu, ashinna Musa ni opochera ishaani Naeliazari, nkayaapochera chittu chonkhaye chaarerihiye ni idhahabu. 52Ni idhahabu yonkhaye yaakumihiye isadaka wo nlhatu no waashukuru Apwiiya Nlhuku, yaari yaatameriaka ikilo imia piilhi. 53Attu onkhaye yaatakanne ikhoto, ahokusha kila chittu chawe chaavanre awe mwanene. 54Paahi ashinna Musa ni opochera ishaani Naeliazari, ahopocheracha idhahabu iyo ukhuma wa manyolhupalhe o miphingo, nkayaarweha u Nihema Nitakatifu, ikhalheke ittu yo wuupuwelhiya ni attu o Israeli, wiira Apwiiya Nlhuku ahaapangelha moombone.
The Bible Version in Makua @The Word for The World International and Makua Language translators. All rights reserved.