Waalhakelhiya attu 30
30
Ishaani chinottukiya ni manyaathiyana
1Yamalheke, ashinna Musa ahoolhumana ni ahoolhelhi o makosho a attu o Israeli, ni waahimeria malhove aahimeriye aya ni Apwiiya Nlhuku, wiira,
2“Yakhalhaka ntu hoopa ishaani wa Apwiiya Nlhuku ama oopaka ishaani munrimani mwawe wo uttuna wawe mwanene, paahi athaphulheke ishaani awe iyo etu, apangeke chonkhaye chaaromonlhe awe wo malhaku awe ayo.
3“Tho, nthiyana mwalhi hinavekiya, nokhalha wa athumwanawe oopaka ishaani wa Apwiiya Nlhuku, ni wiittuka mwanene wo ishaani iyo, 4ni athumwanawe eewaka wiira mwaamwanaya uyo hoopa ishaani, ni ulhupelha, ahinchiichihe. Ishaani choopilhe awe ni ulhupelha wawe, chinonttuka, ni kila ishaani yoopilhe awe inottwaraana ni ulhupelha wawe. 5Nansho yakhalhaka athumwanawe ayo aheewa mwaha wo ishaani iyo, nkayanchiichiha, paahi mwalhi uyo khanottukiya ni ishaani chawe, ni ulhupelha wawe uwo. Apwiiya Nlhuku anonhiyerera ukhalhawaya athumwanawe ayo ahonchiichiha.
6“Tho, ni yakhalhaka nthiyana uyo noovekiya baada yo woopa ishaani, ama oopilhe wo uhupuwelha thoko, nkeettuka mwaneneru, 7ni owannyawe ayo nkayeewa yoyo mwaha uyo ahinchiichihe, paahi ishaani chawe chinonttuka, ni ulhupelha wawe unonttuka. 8Nansho owannyawe ayo eewaka nlhove nno nkayanchiichiha, paahi yayo alhopwana ayo anoofuta ishaani yoopilhe aya ahanu awe, ni nlhove naaromonlhe aya wo uhupuwelha thoko nno, ni Apwiiya Nlhuku anonhiyerera nthiyana uyo.
9“Nansho ishaani ama malhehano ariyoothe attukiye ni nankhwelhi, ama nthiyana vahiye italaka, paahi kila nlhove niromonlhe awe nno ninonttuka.
10“Tho, nthiyana o munthelhini attukaka ishaani ama alhupelhaka nari wa owannyawe, 11ni owannyawe eewaka yeyo ittu iyo nansho ahinchiichihe, mena umwiirelha ittu, paahi ishaani chawe chonkhaye chinonttuka, ni ulhupelha wawe wonkhaye unonttuka chiicho, atimiriheke etu. 12Nansho yakhalhaka owannyawe aheewa chittu chawe chiyo, nkayanchiichiha, paahi ata athananaka uthaphulha ishaani ama ulhupelha wawe, khanothananiya etu upanga ittu. Apwiiya Nlhuku anonhiyerera, ukhalhawaya owannyawe ayo ahonchiichiha. 13Owannyawe anooworiya urumelhelha ama ukhota ishaani, ama ulhupelha uriwoothe, unaattuka ahanu awe ayo. 14Nansho yakhalhaka owannyawe ayo khanoolhumacha nlhove nirinoothe toka nihuku nineewa aya, no ishaani ama no ulhupelha wa ahanu awe, paahi anoorumelhelha toka nihuku neewilhe aya nlhove nno, ukhalhawaya khayolhumanche ittu iriyoothe. 15Nansho athaphulhaka ama arukunushaka malhehano ayo, kaanyuma baada yo wiiwa, paahi yayo phi nohalha ukusha milhatu cho utteka wa ahanu aya ayo.”
16Paahi alha phi malhehero anaacha woopa ishaani ni ulhupelha, aakumihilhe aya Apwiiya Nlhuku ni waalhehera ashinna Musa, wo mwaha unomwaacha nlhopwana ni ahanu awe, naangoro ni mwaamwanawe mwanthiyana, ama nthiyana mwalhi, nokhalha wa athumwanawe.
The Bible Version in Makua @The Word for The World International and Makua Language translators. All rights reserved.