Waalhakelhiya attu 29
29
Isadaka cho isikukuu yo uchokholha iyaakha
(Alaw23:23-25)
1“Nihuku no upacha no mweeri wo saba, nkhalheke ni nkutano ntakatifu wo ukithimicha Mii. Mena, nhivare ntheko uriyoothe. Nenno phi nihuku no woopiya mapalhapata. 2Nkumiheke isadaka yo upahiya vamooroni, yo nihiriri no unukhelha ninokichivelha mii Apwiiya Nlhuku. Madume o ing'ope makani meelhi, ikhondoro chilhopwana piilhi, ni ashikhondoro ashilhopwana o iyaakha imoka saba, onkhaye akhalhacheke o uhiremaracha. 3Nkumiheke tho isadaka aya, iphepa yo ushilhia ithakanihiye ni makhura, ikilo ttaaru wo kila ing'ope, ikilo piilhi wo kila ikhondoro ilhopwana, 4ni ikilo imoka wo kila mwaakhondoro. 5Tho, nkumiheke nibeberu nimoka nikhalhe isadaka yo ulhevelhelhiya uwonya, wiira mwaapangelhe attu ittu yo waathaniha, akihokolhelhe mii Apwiiya Nlhuku. 6Nkumiheke chittu chilha, wo uhihiya isadaka yo upahiya vamooroni, yo woonia mweeri, ni isadaka aya yo choolhia, ni isadaka yo kila nihuku yo upahiya vamooroni vamoka ni isadaka aya yo choolhia, ni isadaka chaya cho uwuriya, thoko chinothananiya ukhalha ni nihiriri ninokichivelha, ni isadaka uwannyaka mii Apwiiya Nlhuku, inokumihiya wo upahiya vamooroni.”
Isadaka yo nihuku no waathanihiya
7“Nihuku no khumi no mweeri wo saba, nkhalheke ni nkutano ntakatifu wo ukithimicha Mii. Nenno nihuku nno nttukeke wo uhilhia, ni mena nhivare ntheko uriyoothe. 8Nkikumihereke mii Apwiiya Nlhuku, isadaka yo upahiya vamooroni, yo nihiriri ninokichivelha mii Apwiiya Nlhuku. Mwan'dume o ing'ope mmoka, ikhondoro ilhopwana imoka, ashikhondoro o iyaakha imoka saba, onkhaye akhalheke o uhiremaracha, 9Vamoka ni chechiyo chittu chiyo, nkumiheke isadaka yo iphepa yo ushilhia ithakanihiye ni makhura ikilo ttaru vamoka ni n'dume no ing'ope nno, ikilo piilhi ni ikhondoro ilhopwana iyo, 10ni ikilo imoka wo kila mwaakhondoro. 11Tho, nkumiheke nibeberu nimoka no isadaka yo ulhevelhelhiya uwonya wo uhihiya isadaka yo upangelhiya ittu yo waathanihiya, vamoka ni isadaka yo kila nihuku yo upahiya vamooroni, ni isadaka aya yo choolhia ni isadaka chaya cho uwuriya.”
Isadaka yo isikukuu yo marapatta
(Alaw23:33-43; Itor16:13-17)
12“Nihuku no khumi ni nthanu no mweeri wo saba, nkhalheke ni nkutano ntakatifu wo ukithimicha Mii. Mena, nhivare ntheko uriyoothe nenno nihuku nno. Nlhieke isikukuu wo nlhatu waka mii Apwiiya Nlhuku, wo mahuku saba. 13Nkumiheke isadaka yo upahiya vamooroni, yo nihiriri no unukhelha ninokichivelha mii Apwiiya Nlhuku. Madume o ing'ope makani khumi ni araru, ikhondoro chilhopwana piilhi, ashikhondoro o iyaakha imoka khumi ni ncheshe. Onkhaye akhalheke o uhiremaracha. 14Isadaka chinohalha uttwaraana vamoka, chikhalheke isadaka chaya cho iphepa yo ushilhia ithakanihiye ni makhura. Ikilo ttaaru wo kila ing'ope, ikilo piilhi wo kila ikhondoro ilhopwana, 15ni ikilo imoka wo kila mwaakhondoro. 16Tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo kila nihuku yo upahiya vamooroni, vamoka ni isadaka aya yo choolhia ni isadaka aya yo uwuriya.
17“Nihuku no nayeelhi nkumiheke madume o ing'ope makani meelhi, ashikhondoro madume o iyaakha imoka, khumi ni ncheshe, o uhiremaracha. 18Nkumiheke tho, isadaka yo choolhia ni isadaka cho uwuriya vamoka ni madume o ing'ope alhe, ikhondoro chilhopwana ni ashikhondoro, wo waalhakelhiya waya, thoko chilheheriye aya. 19Chiichammo tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo upahiya vamooroni yo kila nihuku, vamoka ni isadaka aya yo choolhia ni isadaka aya yo uwuriya.
20“Nihuku no neraru nkumiheke madume o ing'ope khumi ni moka, ikhondoro chilhopwana piilhi, ashikhondoro o iyaakha imoka khumi ni ncheshe, o uhiremaracha. 21Mwaakumiheke vamoka ni isadaka yo choolhia, ni isadaka cho uwuriya thoko chilheheriye, wo ulhikaana ni waalhakelhiya waya, thoko chilheheriye aya. 22Chiichammo tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo upahiya vamooroni yo kila nihuku, vamoka ni isadaka aya yo choolhia ni isadaka aya yo uwuriya.
23“Nihuku no necheshe nkumiheke madume o ing'ope khumi, ikhondoro chilhopwana piilhi, ashikhondoro khumi ni ncheshe, o uhiremara. 24Nkumiheke tho isadaka yo choolhia ni isadaka cho uwuriya, vamoka ni madume o ing'ope ayo, ni ikhondoro ni ashikhondoro wo ulhikaana ni waalhakelhiya waya, thoko chilheheriye aya. 25Chiichammo tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo upahiya vamooroni yo kila nihuku, vamoka ni isadaka aya yo choolhia ni isadaka aya yo uwuriya.
26“Nihuku no nethanu, nkumiheke madume o ing'ope tisa, ikhondoro chilhopwana piilhi, ashikhondoro ashilhopwana o iyaakha imoka khumi ni ncheshe, o uhiremaracha. 27Nkumiheke tho isadaka yo choolhia ni isadaka cho uwuriya vamoka ni ing'ope ni ikhondoro ni ashikhondoro, wo ulhikaana ni waalhakelhiya waya thoko chilheheriye aya. 28Chiichammo tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo upahiya vamooroni yo kila nihuku, vamoka ni isadaka aya yo choolhia ni isadaka aya yo uwuriya.
29“Nihuku no sita nkumiheke madume o ing'ope nane, ikhondoro chilhopwana piilhi, ashikhondoro ashilhopwana o iyaakha imoka, khumi ni nane, o uhiremaracha. 30Tho, nkumiheke isadaka yo choolhia ni isadaka yo cho uwuriya vamoka ni ing'ope chiyo, ikhondoro chilhopwana chiyo ni ashikhondoro ayo, wo ulhikaana ni waalhakelhiya waya, thoko chilheheriye aya. 31Chiichammo tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo upahiya vamooroni yo kila nihuku, vamoka ni isadaka aya yo choolhia ni isadaka aya yo uwuriya.
32“Nihuku yo saba nkumiheke madume o ing'ope saba, ikhondoro chilhopwana ttaaru, ashikhondoro ashilhopwana o iyaakha imoka, khumi ni acheshe, o uhiremaracha. 33Nkumiheke tho isadaka yo choolhia, ni isadaka cho uwuriya vamoka ni in'gope iyo, ikhondoro chilhopwana chiyo, ni ashikhondoro ayo, wo ulhikaana ni waalhakelhiya waya, thoko chilheheriye aya. 34Nkumiheke nibeberu nimoka no ukhalha isadaka yo ulhevelhelhiya uwonya, wo uhihiya isadaka yo kila nihuku yo upahiya vamooroni, vamoka ni isadaka aya yo choolhia ni isadaka aya yo uwuriya.
35“Nihuku yo nane nkhalheke ni nkutano ntakatifu wo ukithimicha Mii. Mena, nhivare ntheko uriyoothe nenno nihuku nno. 36Nkumiheke isadaka yo upahiya vamooroni, yo nihiriri no unukhelha ninokichivelha mii Apwiiya Nlhuku. N'dume no in'gope nimoka, ikhondoro ilhopwana imoka, ni ashikhondoro ashilhopwana o iyaakha imoka saba, o uhiremaracha. 37Nkumiheke tho, isadaka cho uwuriya vamoka ni ing'ope iyo, ikhondoro ilhopwana iyo, ni ashikhondoro alhe, wo ulhikaana ni waalhakelhiya waya thoko chilheheriye aya. 38Tho, nkumiheke nibeberu nimoka ukhalha isadaka yo ulhevelhelhiya uwonya, wo uhihiya isadaka yo kila nihuku ilhe, isadaka yo upahiya vamooroni, vamoka ni isadaka aya yo choolhia ni isadaka yo uwuriya.
39“Alha, phi malhehero anaacha isadaka chinohalha inyu ukumiha wo kila isikukuu thoko chilheheriye aya. Wo uhilhiyalha isadaka cho uthaphulha ishaani, isadaka cho upahiya vamooroni, isadaka yo choolhia, ni isadaka cho uwiiha mpuha. Isadaka chinohalha inyu ukikumihera mii Apwiiya Nlhuku, mahuku o isikukuu chinyu chiromolhiye. Vamoka ni chi chonkhaye chilha, chihaawo tho isadaka cho upahiya vamooroni, isadaka cho choolhia ni isadaka cho uwuriya, chinokikumihera inyu mii Apwiiya Nlhuku, wiira nthaphulhe ishaani chinyu ni isadaka cho uttuna winyu mwaanene.”
40Paahi ashinna Musa nkayaahimeriacha attu o Israeli kila ittu, thoko Apwiiya Nlhuku chaalhehenre aya.
The Bible Version in Makua @The Word for The World International and Makua Language translators. All rights reserved.