Waalhakelhiya attu 2
2
Malhehero o uphakiya mapuro a attu o Israeli
1Yamalhekeru, Apwiiya Nlhuku nkayaavaha ashinna Musa ni Naharuni malhehero o wiira, 2Attu o Israeli eesheke mapuro aya, kila mmoka akhalheke vakittu varii ibendera ineemelhelha iwani awe, varii inuuta yo iyari awe. Amakeke mapuro aya wo urukureria Nihema Nitakatifu mipata chonkhaye.
3Attu aneesha nipuro naya mpatta unosha nchuwa, awehaka uneelha nchuwa, akhalheke attu aneemelhelhiya ni ibendera i Nayuda, nholhelhi aya akhalhaka Nanashoni anaaya Naaminadabu, 4mphingo aya wo ulhikaana ni attu yaalhakelhiye, ukhalheke wa manyaalhopwana 74,600. 5Attu anohalha uttwara weesha nipuro baada ya attu o nikosho ni Nayuda anowa ukhalha o nikosho ni Naisakari, nholhelhi aya nohalha ukhalha Nanethaneli anaaya Nasuari, 6mphingo aya wo ulhikaana ni attu yaalhakelhiye, ukhalheke wa manyaalhopwana 54,400. 7Yamalhakaru, anoottwara attu o nikosho ni Nazabuloni, nholhelhi aya akhalhaka anaaya Naheloni, 8mphingo aya wo ulhikaana ni attu yaalhakelhiye, ukhalheke wa manyaalhopwana 57,400. 9Attu onkhaye yaalhakelhiye anohalha ukhalha nipuro ni Nayuda wo ulhikaana ni miphingo chaya yaari attu 186,400. Yayo phi nkutiro wo upacha, anohalha uhoolhelha urwaa.
10Wo mpatta wo uchawa, akhalheke alhe arii varii ibendera ineemelhelha mphingo u Narobeni wo ulhikaana ni mikutiro chaya, nholhelhi aya nohalha ukhalha Naelisuri anaaya Nashedeuri, 11mphingo aya wo ulhikaana ni attu yaalhakelhiye, ukhalheke wa manyaalhopwana 46,500. 12Yamalhaka, attu anohalha umaka nipuro uchereshere attu o mphingo u Narobeni, anohalha ukhalha attu o nikosho ni Nasimeoni, nholhelhi aya akhalhaka Nashelumieli anaaya Nasurishadai, 13mphingo aya wo ulhikaana ni attu yaalhakelhiye, ukhalheke wa manyaalhopwana 59,300. 14Wo umalhihera, anohalha ukhalha attu o mphingo u Nagadi, nholhelhi aya akhalhaka Naeliasafu anaaya Nareueli, 15mphingo aya wo ulhikaana ni attu yaalhakelhiye, ukhalheke wa manyaalhopwana 45,650. 16Manyaalhopwana onkhaye anohalha ukhalha nipuro ni Narobeni wo ulhikaana ni miphingo chaya, akhalheke attu 151,450. Alha phi attu anohalha ukhalha nkutiro wo nayeelhi.
17Yamalhaka vavawo, nipuro no nikosho na Alawi, ninowa ukhalha variyari yo mapuro onkhaye, uno anakunshe Nihema Nitakatifu nno. Ni ayo athameke kila mphingo ni weeta wo uttwara nipesha no ibendera ineemelhelha nikosho naya.
18Wo mpata uneelha nchuwa, attu arii varii ibendera ineemelhelha mphingo u Naefraimu alhe, amakeke nipuro wo ulhikaana ni mikutiro chaya. Nlholhelhi aya anohalha ukhalha Naelishama anaaya Naamihudi, 19mphingo aya vanohalha aya waalhakelhiya, akhalheke attu 40,500. 20Amalhaka uthama attu o nikosho ni Naefraimu, anottwara phi nikosho Namanase, nlholhelhi aya akhalhaka Nagamalieli mwaamwana o Napedasuri, 21mphingo aya wo ulhikaana ni waalhakelhiya aya unohalha ukhalha attu 32,200. 22Nikosho ni Nabenyamini, nholhelhi aya akhalhaka Naabidani, anaaya Nagidioni phi nohalha ukhalha no umalhihera, 23mphingo aya vaanalhakelhiya aya akhalheke attu 35,400. 24Attu onkhaye o mapuro a Naefraimu wo ulhikaana ni miphingo chaya, yaari attu 108,100. Yoyo unowa ukhalha mphingo wo neraru munkwahani mmo.
25Wo mpatta wo uchulhu, amakeke nipuro mmiphingoni mwo alhe aneemelhelhiya ni ibendera i Nadani alhe, nholhelhi aya nohalha ukhalha Naahiezeri, anaaya Naamishadai, 26mphingo aya vaanalhakelhiya aya akhalheke attu 62,700. 27Yamalhaka, alhe anohalha utheka nipuro waattwara yayo anowa ukhalha attu o nikosho ni Naasheri, nholhelhi aya akhalhaka Napagieli anaaya Naokirani, 28mphingo aya vaanalhakelhiya aya akhalheke attu 41,500.
29Wo umalhihera, anohalha ukhalha mphingo wa attu o nikosho ni Nanaftali, nholhelhi aya akhalhaka Naahira anaaya Naenani, 30mphingo aya vaanalhakelhiya aya akhalheke attu 53,400.
31Attu onkhaye aalhakelhiye anohalha ukhalha nipuro ni Nadani wo ulhikaana ni miphingo chaya akhalheke attu 157,600. Ulha mphingo u Nadani ulha, unowa ukhalha phi mphingo wo umalhihera, kila ibendera baada yo ibendera ikina.
32Yayo phi attu o Israeli yaalhakelhiye wo ulhikaana ni mahimo aya, mmikutironi ni mmiphingoni mwaya, onkhaye yaari attu 603,550. 33Nansho Alawi khayaalhakelhiye mmilhokoni mwa attu o Israeli thoko Apwiiya Nlhuku chaalhehenre aya ashinna Musa.
34Paahi phi chiichammo attu o Israeli chaapangilhe aya, kila ittu thoko Apwiiya Nlhuku chaalhehenre aya ashinna Musa. Nkayeeshacha mapuro aya, wo uttwara ibendera chaya cheemelhelha, ni phi chiichammo cheetilhe aya nkwaha kila mmoka ni ashilhoko awe wo uttwarana ni nihimo nawe.
The Bible Version in Makua @The Word for The World International and Makua Language translators. All rights reserved.