Waalhakelhiya attu 28
28
Isadaka cho kila nihuku
(Ukh29:38-46)
1Yamalheke, Apwiiya Nlhuku nkayeerelha ashinna Musa wiira, 2“Mwaalhehereke attu o Israeli alha malhehero anottwara alha, wiira, Ikatema yo ukikumihera isadaka vanophiya aya, mwaattiva nkikumihereke chii isadaka chinothananiya, choolhia cho upahiya vamooroni, cho unukhelha nihiriri noombone ninokichivelha mii. 3Mwaahimerieke wiira, isadaka chilheheriye aya ukikumihera wo upahiya vamooroni chiyo ikhalheke, ashikhondoro eelhi o iyaakha imoka ahiremanre variwoothe, o nlhatu no isadaka yo upahiya yo kila nihuku. 4Mwaakhondoro mmoka akumihiyeke wichishu ni o neyeelhi akumihiyeke uchechilho, 5kila mmoka akumihiyeke vamoka ni isadaka yo choolhia, ikilo imoka yo iphepa ithakanihiye vamoka ni ilita imoka yo makhura orera o izeituni, o waamiya. 6Ilha phi isadaka yo ukumihiya kila nihuku, inokumihiya wo upahiya lhakalhaka vamooroni, yaakumihiye wo nkwaha wo upacha umwaakoni Usinai, ukhalha thoko isadaka yo yolhia, yo unukhelha nihiriri no unukhelha ninokichivelha mii, Apwiiya Nlhuku. 7Ni isadaka yo uwuriya inohalha ukumihiya vamoka ni kila mwaakhondoro, ikhalheke ilita imoka yo uwuriya yo uhapalha. Mmiinelheke isadaka yo uwuriya yo uhapalha ilha vamadhubahuni. 8Uchechilho, munkumiheke mwaakhondoro nkina ulhe, munkumiheke vamoka ni isadaka yo choolhia, ni isadaka yo uwuriya yo uhapalha, ukhalha phi isadaka yo upahiya vamooroni, thoko cheerihilhe inyu wichishu, inokhalha phi isadaka yo nihiriri no unukhelha ninokichivelha mii, Apwiiya Nlhuku.”
Isadaka cho Nihuku no Wiittuwa
9“Nihuku no Wiittuwa, nkumiheke isadaka yo ashikhondoro eelhi madume o iyaakha imoka o uhiremara, isadaka yo choolhia, ikilo piilhi cho iphepa yo ushilhia ithakanihiye ni makhura, ni isadaka aya yo uwuriya. 10Isadaka yo upahiya vamooroni ilha, ikumihiyeke kila Nihuku no Wiittuwa, wo uhihiya isadaka yo kila nihuku ilhe, vamoka ni isadaka aya yo uwuriya.”
Isadaka cho kila nihuku no uchokholha mweeri
11“Kila nihuku no upacha, no kila mweeri, mwaakumihereke Apwiiya Nlhuku isadaka yo upahiya vamooroni, yo madume makani o ing'ope meelhi, ikhondoro ilhopwana imoka ni ashikhondoro ashilhopwana o iyaakha imoka saba, o uhiremaracha variwoothe. 12Nkumiheke isadaka yo choolhia, iphepa yo ushilhia ikilo ttaaru, ithakanihiye ni makhura, wo kila n'dume no in'gope nimoka, nkumiheke ni ikilo piilhi cho iphepa wo kila ikhondoro ilhopwana, 13ni ikilo imoka yo iphepa wo kila mwaakhondoro. Chilha isadaka cho upahiya vamooroni chilha, phi isadaka cho choolhia cho nihiriri no unukhelha ninokichivelha mii, Apwiiya Nlhuku. 14Ikipimo yo isadaka yo uwuriya inothananiya, ikhalheke ilita piilhi cho idivai wo kila n'dume no in'gope, ilita imoka ni nusu wo kila ikhondoro ilhopwana, ni ilita imoka wo kila mwaakhondoro. Yeyo phi isadaka yo upahiya vamooroni, yo kila mweeri iyaakha yonkhaye. 15Tho, mwaakumihereke Apwiiya Nlhuku isadaka yo ulhevelhelhiya uwonya, nibeberu nimoka, wo uhihiya isadaka yo upahiya vamooroni yo kila nihuku ilhe, ni isadaka aya yo uwuriya.”
Isadaka yo Isikukuu yo Pasaka
(Alaw23:5-14)
16“Nihuku no khumi ni ncheshe no mweeri wo upacha phi Isikukuu yo Pasaka ya Apwiiya Nlhuku. 17Nihuku no khumi ni nthanu no yoyo mweeri uyo phi Isikukuu. Nlhieke mikatte cho uhihelhiya ihengedure, mahuku saba. 18Nihuku no upacha no isikukuu iyo, nkhalheke ni nkutano ntakatifu wo ukithimicha Mii. Mena, nhivare ntheko uriyoothe nenno nihuku nno. 19Nkumihacheke isadaka yo upahiya vamooroni, ukhalha phi isadaka yo choolhia wa Apwiiya Nlhuku. Ikhalheke, madume makani o in'gope meelhi, ikhondoro ilhopwana imoka, ashikhondoro ashilhopwana o iyaakha imoka saba, onkhaye akhalhacheke o uhiremaracha variwoothe. 20Nkumiheke vamoka ni isadaka chaya cho choolhia, iphepa yo ushilhia ithakanihiye ni makhura, ikilo ttaaru wo kila in'gope, ikilo piilhi wo kila ikhondoro ilhopwana, 21ni kilo imoka wo kila mmoka a ashikhondoro saba alhe. 22Nkumiheke tho, nibeberu nimoka ukhalha isadaka yo ulhevelhelhiya uwonya, wiira mwaathanihe ni mii Apwiiya Nlhuku. 23Nkumiheke chilha chittu chilha wo uhihiya isadaka yo upahiya vamooroni yo kila nihuku, inokumihiya wichishu. 24Chichammo etu, wo mahuku saba, nkumiheke isadaka yo kawaida yo choolhia, yo upahiya vamooroni, yo nihiriri no unukhelha ninokichivelha mii, Apwiiya Nlhuku. Ilha nkumiheke wo upwaha isadaka yo upahiya vamooroni yo kila nihuku ilhe, vamoka ni isadaka aya yo uwuriya. 25Nihuku no saba nkhalheke ni nkutano ntakatifu wo ukithimicha Mii, nhipange ntheko nenno nihuku nno.”
Isadaka yo ukhunguriya choolhia
(Alaw23:15-22)
26“Yamalhaka, nihuku no uchokholha Isikukuu yo ulhiphulhiya choolhia, mwaawiihereke Apwiiya Nlhuku isadaka yo choolhia chinyu cho naanano. Ni vavawo, nkhalheke ni nkutano ntakatifu wo ukithimicha Mii, ni mena nhivare ntheko uriyoothe nenno nihuku nno. 27Nkumiheke isadaka yo upahiya vamooroni, yo unukhelha nihiriri noombone ninokichivelha mii Apwiiya Nlhuku. Nkumiheke, madume o ing'ope makani meelhi, ikhondoro ilhopwana imoka, ni ashikhondoro ashilhopwana o iyaakha imoka saba, onkhaye ayo akhalhacheke o uhiremaracha. 28Isadaka yo choolhia inohalha uttwaraana ni iyo ikhalheke iphepa yo ushilhia ithakanihiye ni makhura ilita ttaaru wo kila n'dume no ing'ope, ikilo piilhi wo kila ikhondoro ilhopwana, 29ni ikilo imoka wo kila mwaakhondoro. 30Nkumiheke tho, nibeberu nimoka ukhalha isadaka yo ulhevelhelhiya uwonya, wiira mwaathanihe ni mii Apwiiya Nlhuku. 31Nkumiheke chilha isadaka chilha wo uhihiya isadaka yo upahiya vamooroni yo kila nihuku ilhe, vamoka ni isadaka aya yo uwuriya. Tho, muupuwelheke wiira, ashinama onkhaye akhalheke o uhiremara variwoothe.”
The Bible Version in Makua @The Word for The World International and Makua Language translators. All rights reserved.