Waalhakelhiya attu 27
27
Ulhepelha wa achishaana ashithiyana a Naselofehadi
1Nihuku nimoka achishaana ashithiyana athanu a Naselofehadi, yeehaniya, Mahla, Hogla, Noa, Milka ni Tirza ahowa wa ashinna Musa. Naselofehadi athumwanaya ayo yaari anaaya Naheferi, anaaya Nagileadi, anaaya Namakiri, anaaya Manase, anaaya Nayusufu. 2Paahi, yayo achishaana ashithiyana athanu ayo ahorwaa wa ashinna Musa, nkayeemelhacha umihoolho wa opochera ishaani Naeliazari ni ahoolhelhi onkhaye a attu o Israeli, vanlhakoni wo Nihema Nitakatifu, nkayeeracha, 3“Athumwanihu aakhwilhe uthakoni wo uhikhalha ni mwaana mwanlhopwana riyoothe. Ni ayo khayaari mmilhokoni mwa attu yaarumelhenlhe Nakora, vaakumanne aya ni ukhota waarumelhelha Apwiiya Nlhuku, nansho aakhwilhe wo uwonya waya anene. 4Paahi, nlhatuni nchina na athumwanihu nno nihofutiya unihimoni waya, wo nlhatu no uhikhalha ni mwaana mwanlhopwana? Nnivaheke etu nhakhu ihu wo uhiyeriya vamoka ni ashilhoko aya athumwanihu.”
5Paahi ashinna Musa ahorweeha ichuku chaya chiyo umihoolho wa Apwiiya Nlhuku. 6Apwiiya Nlhuku nkayeerelha ashinna Musa wiira, 7“Malhove anoolhumacha aya achishaana ashithiyana a Naselofehadi ayo o ikekhiaye. Mwaavahacheke nhakhu aya wo uhiyeriya, vamoka ni ashilhoko a athumwanaya, akushacheke nhakhu wo ilhapo wo uhiyeriya, wa athumwanaya uyo.
8“Yamalhaka, mweerelheke attu o Israeli wiira, ntu riyoothe akhwaaka wo uhaahiya achishaana ashilhopwana, nhakhu awe ahiyeriyeke achishaana aya ashithiyana. 9Tho, yakhalhaka khaarina achishaana ashithiyana, paahi nhakhu awe uyo, avahiyeke achihimawe ashilhopwana. 10Ni yakhalhaka khaarina achihimawe ashilhopwana, nhakhu awe urweehiyeke wa manyaathumwanawe, olhupalhe ni ashikani. 11Ni yakhalhaka athumwanawe kharina achihimaya ashilhopwana, paahi nhakhu awe unookhalha wa achihimaya o irukulhu imoka, ni uyo unookhalha wawaya thoko chiri aya nhakhu aya. Nna ninookhalha phi nlhove no malhehero wa attu o Israeli, thoko chinre aka wo ulheherani, Mii Apwiiya Nlhuku.”
Nayoshua anoothanlhiya waaholhelha attu o Israeli
(Itor31:1-8)
12Yamalheke, Apwiiya Nlhuku nkayeerelha ashinna Musa wiira, “Mmwelheke vachulhu mwaako ulha wa Naabarimu, mmweheke ilhapo kaavahilhe aka attu o Israeli. 13Mwoonakaru, ni inyu nnookhwa thoko ahima inyu Naharuni chikhwilhe aya. 14Nnohalha ukhwa ukhalhawaya khamwarumelhenlhe nlhove naka uthakoni Usiini ulhe, ikatema nlhoko wa attu vaachukulhacha aya ukaacha mii. Mwaattiva khamwaahilhe wiira, machiri aka molhupalhe oonie umihoolho waya, vaachukulhacha aya wiira avahiye maashi Umeriba ulhe.” Meriba, naari nrapo no maashi Ukadeshi, uthakoni Usiini.
15Paahi, ashinna Musa nkayaalhepelha Apwiiya Nlhuku wo wiira, 16“Inyuva Apwiiya Nlhuku, Nlhuku novaha ukumi wo chittu chonkhaye, kinoulhepelhani etu wiira, munthanlheke ntu o weemelhelha attu o Israeli alha, 17nohalha waaholhelha ni waahoolhelhiha mmithekoni mwaya mwonkhaye, wiira attu o Israeli ahiwe yaakhalha thoko ikhondoro cho uhikhalha ni nshunga.”
18Apwiiya Nlhuku nkayeerelha ashinna Musa wiira, “Mwaakusheke Nayoshua anaaya Nanuni, ntu o rera nrima, yamalhaka mweeshereke miono, 19ni uweemesha umihoolho wa opochera ishaani Naeliazari ni umihoolho wa attu onkhaye oonaka, ni yamalhaka, mwaavaheke yoyo ntheko uyo. 20Mwaavaheke ipilhi inyu vakani inaaholhelha inyu attu, wiira nlhoko wonkhaye wo attu o Israeli waarumelhelheke. 21Yayo aakhulhuvelheke opochera ishaani Naeliazari, wiira achuwelhe malhove aka wo iphiro yo nlhuku no uhimiacha malhove, nlhuku no Urimu ni Thumimu. Wo ilha iphiro ilha, Naeliazari anowaaholhelha Nayoshua ni nlhoko wonkhaye wa attu o Israeli, vanokhuma aya ni vanokelha aya.”
22Paahi ashinna Musa nkaapanga thoko chaalheheriye ni Apwiiya Nlhuku. Ahaakusha Nayoshua ni uweemesha umihoolho wa opochera ishaani Naeliazari, ni umihoolho wo attu o Israeli onkhaye. 23Yamalheke, nkayeeshera miono vamuruni ni waalhapelhelha, ni waavaha ipilhi yo waaholhelha attu, thoko chaalheheriye aya ni Apwiiya Nlhuku.
The Bible Version in Makua @The Word for The World International and Makua Language translators. All rights reserved.