Waalhakelhiya attu 26
26
Attu o Israeli anowaalhakelhiya nkwaha wo nayeelhi
1Mareta alhe amalhekeru, Apwiiya Nlhuku aheerelha ashinna Musa ni Naeliazari anaaya opochera ishaani Naharuni wiira, 2“Mwaalhakelheke miphingo chonkhaye cho attu o Israeli, kila ntu wo uttwaraana ni imbumba awe. Mwaalhakelheke attu onkhaye ari ni malhipa o iyaakha makhumi meelhi ni upwaha anooria urwaa ukhotoni.” 3Paahi, ashinna Musa ni opochera ishaani Naeliazari nkayoolhumana attu mmatetteni Umoabu, uhito wo mwoolhoko wo Uyordani, vakhiviru ni Uyeriko, nkayaahimeriacha wiira, 4“Mwaalhakelheke attu, wo uchokholha ni attu o malhipa o iyaakha makhumi meelhi ni upwaha, thoko Apwiiya Nlhuku chaalhehenre aya ashinna Musa.”
Ni alha phi attu onkhaye o Israeli yaakhumilhe Umisri.
5Nikosho no upacha naari nikosho ni Narobeni, anaaya Nayakhobo, o nttara. Yaalhakelhiye yaari attu o mahimo a Nahenoki, ni Napalu, 6ni Nahesroni ni Nakarmi.
7Alha phi mahimo o makosho a Narobeni. Manyaalhopwana yaalhakelhiye yaari 43,730. 8Achishaana a Napalu yaari Naeliabu, 9ni achishaana aya, Nanemueli, Nadathani ni Naabiramu. Yalha eelhi alha, Nadathani ni Naabiramu, phi attu yaathanlhiye munlhokoni mwo attu, nansho nkayaakhota ashinna Musa ni Naharuni, ni ukhalha vamoka ni attu yaarumelhelha Nakora, ikatema yaakhotilhe aya waarumelhelha Apwiiya Nlhuku. 10Paahi yeyo ikatema iyo ilhapo yahohulhia nkayaamiria, nkayaakhwacha vamoka ni Nakora ni ahoolhelhi aya, mooro vaapahilhe aya attu imia piilhi ni makhumi nthanu, nkayaakhalha phi ittu yo waamuka attu o Israeli. 11Paahi, wo chiichammo, yayo achishaana a Nakora ayo khaakhwachilhe.
12Attu o ukhuma nikosho ni Nasimeoni, yaari Nanemueli, Nayamini, Nayakini, 13Nazera ni Nashauli.
14Alha phi attu o imbumba cho nikosho ni Nasimeoni, manyaalhopwana aari, 22,200.
15Nikosho ni Nagadi, naari ni imbumba chi Nasifoni, i Nahagai, i Nashuni, 16i Naozni, i Naeri, 17i Naarodi ni i Naareli.
18Ni Alha phi attu o imbumba chi Nagadi, manyaalhopwana aari 40,500.
19Attu o nikosho ni Nayuda, naari no imbumba cha achishaana aya, Naeri ni Naonani, yayo o yelhi ayo, akhwenlhe Ukanaani.
20Nikosho ni Nayuda naari no imbumba chi Nashela, i Naperesi, ni i Nazera. 21Ukhuma u Naperesi, yaari imbumba chi Nahesroni ni i Nahamuli.
22Alha phi yaari attu o imbumba i Nayuda, manyaalhopwana aari 76,500.
23Nikosho ni Naisakari naari no imbumba chi Natola, ni i Napuva, 24ni i Nayashubu ni, i Nashimroni.
25Alha phi yaari attu o imbumba chi Naisakari, thoko chaalhakelhiye aya, manyaalhopwana aari, 64,300.
26Ukhuma nikosho ni Nazabuloni, imbumba chaari chi Naseredi, i Naeloni ni, i Nayaleeli.
27Alha phi yaari attu o imbumba chi Nazabuloni, thoko chaalhakelhiye aya, manyaalhopwana onkhaye aari 60,500.
28Nayusufu phi yaari athumwanaya Namanase ni Naefraimu. Ni ayo nkayaakhalha makosho meelhi, a Namanase ni Naefraimu,
29Namanase ahaayara Namakiri, ni Namakiri ahayaara Nagileadi.
30Ukhuma u Nagileadi, imbumba chaari, Naabiezeri, Naheleki, 31Naasrieli, Nashekemu, 32Nashemida ni, Naheferi. 33Naselofehadi, anaaya Naheferi khaayanre ashaana ashilhopwana nansho ashithiyana, ni ayo yaari, Namala, Nanoa, Nahogla, Namilka ni Natirza.
34Alha phi yaari attu o imbumba chi Namanase, thoko chaalhakelhiye aya, manyaalhopwana aari 52,700.
35Nikosho ni Naefraimu, imbumba chaari chi Nashuthela, i Nabekeri ni i Natahani. 36Imbumba i Nashuthela yahokhuma imbumba i Naerani. 37Alha phi yaari attu o imbumba chi Naefraimu, thoko chaalhakelhiye aya, manyaalhopwana aari 32,500. Imbumba chonkhaye cho makosho meelhi ayo chaakhumelhenlhe u Nayusufu.
38Ukhuma nikosho ni Nabenyamini, imbumba chaari, imbumba i Nabela, imbumba i Naashbeli, imbumba i Naahiramu, 39imbumba i Nashufamu ni imbumba i Nahufamu. 40Ukhuma Unabela, chahokhuma imbumba chi Naardi ni imbumba ya Nanaamani.
41Alha phi yaari attu o imbumba chi Nabenyamini, thoko chaalhakelhiye aya, manyaalhopwana arii 45,600.
42Nikosho ni Nadani naari no imbumba chi Nashuhamu, 43ni manyaalhopwana thoko chaalhakelhiye aya aari 64,400.
44Nikosho ni Naasheri naari no imbumba chi Naimna, imbumba i Naishivi ni imbumba i Naberiya. 45Imbumba chi Naheberi ni imbumba ya Namalkieli chaakhumelhenlhe u Naberiya. 46Naasheri ahokhalhana mwaana mwanthiyana eehaniya Sera.
47Alha phi yaari attu o imbumba chi Naasheri, thoko chaalhakelhiye aya, manyaalhopwana aari 53,400.
48Nikosho ni Naftali naari no imbumba chi Nayaseeli, imbumba i Naguni, 49imbumba i Nayeseri ni imbumba i Nashilemu.
50Alha phi yaari attu o imbumba chi Naftali, manyaalhopwana thoko chaalhakelhiye aya aari 45,400.
51Manyaalhopwana onkhaye yaalhakelhiye mwa attu o Israeli yaari attu, 601,730.
52Yamalheke, Apwiiya Nlhuku nkayeerelha ashinna Musa wiira, 53“Mwaamianihereke makosho alha ilhapo ikhalhe nhakhu aya wo uhiyeriya iyo, wo ulhikaana ni attu yaalhakelhiye wo machina aya. 54Nikosho nuulhupalhe nivahiyeke ilhapo aya yulhupalhe, ni nikosho nikaani nivahiyeke ilhapo aya vakani chiicho. Kila nikosho nivahiyeke vakittu, ukhalha nhakhu aya wo uhiyeriya, wo ulhikaana ni attu yaalhakelhiye. 55Nansho umianihiya wo ilhapo uwo ukhalheke wo upangiya mwaavi. Kila nikosho nipatteke wo ulhikaana ni machina o nikosho naya. 56Umianihiya wo ilhapo yo uhiyeriya wo kila nikosho, unowa ukhalha wo upangiya mwaavi, kila nikosho nivahiyeke wo ulhikaana ni wunnuwa waya ama uyeva waya.”
57Mahimo a Alawi aalhakelhiye, aari, a Nagershoni, a Nakohathi ni a Namerari, 58vamoka ni imbumba i Nalibni, i Nahebroni, i Namahili, i Namushi ni i Nakora. Nakohathi aari phi athumwanaya Naamramu.
59Ahanu a Naamramu yeehaniya Nayokebedi, o nikosho ni Alawi, aayarelhe Umisri. Yayo ahaayarelha Naamramu achishaana eelhi ashilhopwana, Naharuni ni ashinna Musa, ni mwanthiyana mmoka, Namiriamu. 60Naharuni yarii ni achishaana ashilhopwana acheshe, Nanaadabu, Naabihu, Naeliazari ni Naitamari. 61Nanaadabu ni Naabihu yaakhwanche vaakumihenre aya Apwiiya Nlhuku isadaka yo mooro, wahaarumelhelhiya umihoolho wa Apwiiya Nlhuku.
62Ni attu yaalhakelhiye munlhokoni mwa Alawi, manyaalhopwana arii ni malhipa o mweeri mmoka ni upwaha yaari attu, 23,000. Alha khayaalhakelhachiye vamoka ni attu o Israeli akina, ukhalhawaya kayaahiyeriye ittu iriyoothe mmilhokoni mwaya.
63Yayo phi manyaalhopwana a attu o Israeli yaalhakelhiye ni ashinna Musa ni opochera ishaani Naeliazari mmatimbeni Umoabu, ukhopelhelhe mwoolhoko wo Uyordani, vakhiviru ni Uyeriko. 64Mmilhokoni mwaya, khaakhanlhe ata ntu mmoka aahalhenlhe munlhokoni mwo alhe yaalhakelhiye ni ashinna Musa ni opochera ishaani Naharuni, vaalhakenlhanche aya attu nkwaha wo upachera uthakoni Usinai ulhe. 65Apwiiya Nlhuku yenre wiira, onkhaye anookhwelha uthakoni, ni wo ikekhiaye khaawo ata mmoka aya ahalhenlhe, yaahikhalhe Nakalebu anaaya Nayefune, ni Nayoshua anaaya Nanuni.
The Bible Version in Makua @The Word for The World International and Makua Language translators. All rights reserved.