Waalhakelhiya attu 25
25
Attu o Israeli anonthimicha Baali Upeori
1Yamalheke, ikatema attu o Israeli vaari aya Ushitimu, manyaalhopwana ahochokholha ulhuva ni manyaathiyana o Umoabu. 2Yayo manyaathiyana ayo yahaalhatulha attu o Israeli arwee yalhutaane uwaakwechererachani milhuku aya, ni attu o Israeli aholhiacha choolhia ni uthimichelha milhuku chaya chiyo. 3Phi chiichammo etu, attu o Israeli chaachokhonlhe aya unthimicha nlhuku Baali o Upeori. Apwiiya Nlhuku nkayaarushiya chinene.
4Paahi, Apwiiya Nlhuku nkayeerelha ashinna Musa wiira, “Mwaakusheke ahoolhelhi onkhaye aaholhenlhe attu o Israeli wiira apangache chittu cho unanara chiyo, mweevakacheke umihoolho waka vanchuwani, wiira urushiya waka uvireni.”
5Paahi, ashinna Musa nkayeerelha ahoolhelhi akina o attu o Israeli wiira, “Kila mmoka inyu amwiiveke ntu riyoothe mmilhokoni mwinyu eelhutanihilhe ni unthimicha nlhuku Baali o Upeori.”
6Yeyo ikatema, ntu mmoka ahommwiiha nthiyana mmoka ntu o Umidiyani uwannyaya, ashinna Musa ni attu onkhaye o Israeli vaari aya onlhachaka unlhakoni wo Nihema Nitakatifu. 7Paahi, Nafiniyasi anaaya Naeliazari, anaaya o opochera ishaani Naharuni vonne aya yayo, nkayonkwa ni uthama munlhokoni mwa attu ayo, nkayaakusha nivaka 8ni unttwara Muisraeli ulhe mpaka unihemani wawe. Nkaahomacha nivaka onkhaye o yeelhi vanthunkwani. Ni wo wiira chiicho, mareta o uhilhoka yaarimelhiha attu o Israeli ahotondova. 9Attu yaakhwilhe wo yayo mareta o uhilhoka ayo yaari attu, makhumi maelufu meelhi ni maelufu ncheshe.
10Yamalheke, Apwiiya Nlhuku nkayeerelha ashinna Musa wiira, 11“Nafiniyasi anaaya Naeliazari, anaaya opochera ishaani Naharuni, ahotiyelhelha urushiya waka wa attu o Israeli. Yayo ahokhota woona nlhuku nkina noothimichiya, yaahikhalhe mii. Phi wo nlhatu waya etu, akarimelhinhe attu o Israeli onkhaye vaarushiye aka. 12Paahi etu, mwaahimerieke Nafiniyasi wiira, kinowaalhehana malhehano aka o mpuha. 13Kinaalhehana wiira, yayo ni iyari chaya anookhalhacha opochera ishaani o mahuku o uhimalha, wo nlhatu no ukhota unthimicha nlhuku nkina, yaahikhalhe mii Nlhuku aya, nkayaapangelha attu o Israeli ittu yo waathaniha ni Apwiiya Nlhuku.”
14Mwisraeli eeviye uyo vamoka ni nthiyana ntu o Umidiyani ulhe, nchina nawe eehaniya Zimri mwaamwana a Nasalu, nholhelhi o iwani imoka munlhokoni mwa attu o nikosho ni Nasimeoni. 15Ni nchina no nthiyana ntu o Umidiyani eeviye uyo, eehaniya Kozbi mwaamwana a Nasuri, aari nholhelhi o nihimo no uhichuwania, wowo Umidiyani uwo.
16Apwiiya Nlhuku nkayeerelha ashinna Musa wiira, 17“Mwaakelhelheke attu o Umidiyani ni waarimelhiha, 18ukhalhawaya ahochokholhachani mwaatti, wo miruku chaya, nkayoouthepiani mwaatti, wo yoyo nlhatu unaacha Napeoli uyo, ni wo nlhatu unaacha Nakozbi, mwaamwanaya mwanthiyana, eeviye ikatema yo mareta o uhilhoka vaakhumelhenlhe aya Upeori uwo.”
The Bible Version in Makua @The Word for The World International and Makua Language translators. All rights reserved.