Waalhakelhiya attu 24
24
1Paahi, Nabalaamu ahochuwelha wiira Apwiiya Nlhuku ahottuna waavaha ibarakha attu o Israeli, paahi khaarwelhe umwoopani nttiti tho, nkayaahalha awehaka uthakoni, 2Nkaaweha uchulhu, nkayoona attu o Israeli aneeshilhe nipuro, kila nikosho vakittu waya. Yamalheke, Iphumu ya Nlhuku nkayaakhuruwelha. 3nkayaahimiacha nttenga aya yeeraka,
Nlhove naka mii Nabalaamu anaaya Napeori
nlhove na ntu patakhulhiye miitho. 4Nlhove na ntu o wiiwa malhove a Nlhuku
ntu oniilhe yo ushangiha ya Nlhuku o machiri,
ntu nothimicha, ni woona chittu mwaari.
5Mahema inyu ahoshichira chinene, inyu mwaatti attu o nikosho ni Nayakhobo,
eiyo nipuro ninyu mwaatti attu o Israeli.
6Anokhalha thoko matimbe anokhoolha maashi,
thoko ibustani yo vachereshere mwoolhoko,
thoko mishubiri chaalhiye ni Apwiiya Nlhuku,
thoko miri cho mierezi cho vachereshere maashi.
7Maashi khanowa aawukuwa,
imbeyu yaanlhe inyu inootapwa maashi menchi,
amwene aya anookhalha phi olhupalhe waapwaha Naagagi,
ni umwene aya unowunnuwa chinene.
8Nlhuku ahaakusha ukhuma Umisri,
ni uyo nowaatakanelha wo machiri thoko inari.
Noorimelhiha ilhapo cha amalhaponi aya,
noopweshakacha makhuva aya,
nowaahomakacha ni miupa chawe.
9Anookhalha thoko kharamu o machiri, vaneethelha awe,
thoko kharamu nthiyana,
phi mpani etu nohalha ulhikacha unthuthusha?
Nlhuku anvaheke ibarakha, ntu riyoothe nohalha uuvahani ibarakha inyuva attu o Israeli,
nonlhava ntu riyoothe nohalha uulhavani uyo.
10Nabalaki nkayaarushiya chinene, nkayaata mathatha, ni weerelha Nabalaamu wiira, “Kowiihanneni wiira mwaalhave amalhaponi aka, nansho mikwaha miraru chonkhaye chilha, inyuva nhowiira waavaha ibarakha. 11Paahi etu vano, nthameke. Kaholheehani wiira kinouvahani izawadi chinchi, nansho Apwiiya Nlhuku khoovahenreni wiira mpatte chechiyo izawadi chiyo, ahouthuwani.”
12Nabalaamu nkayaakhulha Nabalaki wo wiira, “Chani akaahimenrie akarumiya mwaarumilhe inyu uwannyaka 13wiira ata mwakakivanhe inupa inyu inachanre nchurukhu ni idhahabu, mii akinooria uruna malhehero a Apwiiya Nlhuku, wo upanga ittu iriyoothe, yoombone ama yo uhilhoka wo uttuna waka kimwanene? Kenre wiira, inohimia aya Apwiiya Nlhuku phi iyo inohalha aka upanga.”
Nttenga wo umalhihera u Nabalaamu
14Nabalaamu, nkayeerelha Nabalaki wiira, “Paahi etu vano, kinoohokholhiya uwaani wa attu aka, nansho kihinaaya urwaa, nkahiyani kuuhimerieni chittu chinohalha aya upanga yayo attu ayo, wa attu inyu mahuku anowa umihoolho.”
Nabalaamu anoohimiacha nttenga wo necheshe
15Paahi Nabalaamu nkayoolhumacha nlhove naya no nttenga yeeraka,
“Nlhove naka mii Nabalaamu anaaya Nabeori,
nlhove na ntu patakulhiye miitho,
16nlhove na ntu neewa malhove a Nlhuku,
ni ntu nochuwelha irusho chinokhuma wa Nlhuku Mulhupalhe,
ntu onilhe cho wooniya cha Nlhuku o Machiri,
ntu nothimicha, ni woona chittu mwaari.
17Kinoomwoona, nohalha uwa, nansho kaanyuma,
kinoomwona, nansho kharii vakhiviru.
Mwene nookhumelhelha wa ayari a Nayakhobo,
nookhumelhelha mwene mmilhokoni wa attu o Israeli.
Wo ikopo awe nowaata ahoolhelhi o Umoabu
nowaarimelhiha ayari onkhaye o Nasethi.
18Ilhapo yo Uedomu inookhalha yawawe,
ilhapo yo Useiri inookhalha nhakhu awe,
attu o Israeli anookottolha chinene.
19Mmoka a ayari a Nayakhobo nootawara,
ni uyo nowaarimelhiha mahalhahalha a ayari a Naari.”
20Yamalheke, Nabalaamu nkayaaweha attu o Uamaleki, nkayoolhumacha nlhove yeeraka wiira,
“Attu o Uamaleki phi ilhapo yo machiri upwaha ilhapo chonkhaye,
nansho wo umalhelha anorimeelhiya.”
21Yamalheke, Nabalaamu nkayaaweha attu o Ukeeni, nkayoolhumacha wo wiira,
“Mapuro inyu phi oombone,
inyuva attu o Ukeeni,
nkhanlhe thoko iphuuru irii vachulhu chinene, umwaakoni.
22Nansho nnorimeelhihiya,
inyuva mwaatti, attu o Ukeeni.
Nnoovariya mateeka ni attu o Uashuru mpaka iyaakhani?”
23Nabalaamu nkayaamalhiha wulhumacha yeeraka wiira, “Nhothapana. Mpani nohalha ukhalha nkumi, Nlhuku vanohalha awe upanga yayo? 24Imeli chinoowa ukhuma Ukitimu,
chinowaakelhelha attu o Uashuru ni o Ueberi,
nansho ni ayo tho, anorimeelhacha wo uhihokolhia lhakalhaka.”
25Paahi Nabalaamu nkayaathama, nkayaahokolhia uwannyaya, Ni Nabalaki tho, ni ayo nkayaarwa.
The Bible Version in Makua @The Word for The World International and Makua Language translators. All rights reserved.