Waalhakelhiya attu 23
23
1Yamalheke, Nabalaamu nkayeerelha Nabalaki wiira, “Nkithekelhe madhubahu saba vaa, mwamalhihaka nkiwiihereke madume o ing'ope saba ni ikhondoro chilhopwana saba.” 2Paahi, Nabalaki nkayaapanga thoko chaalheheriye aya ni Nabalaamu. Nkayaakumihera isadaka yo n'dume no ing'ope nimoka ni ikhondoro ilhopwana imoka, vachulhu wo kila madhubahu.
3Nabalaamu nkayeerelha Nabalaki wiira, “Nhalheke vavawo vakhiviru ni isadaka inyu yo upahiya iyo, ni mii kirwee. Veekinaka, Apwiiya Nlhuku anokokumaana ni mii. Ittu iriyoothe anohalha aya ukooniha, kinoowa kouhimeriani.”
4Nlhuku nkaakumaana ni Nabalaamu. Ni Nabalaamu, nkayaamwiirelha Nlhuku wiira, “Kihokoorosha madhubahu saba ni ukumiherani isadaka yo n'dume no ing'ope nimoka ni ikhondoro ilhopwana imoka vachulhu wo kila madhubahu.”
5Apwiiya Nlhuku nkayaavaha Nabalaamu malhove anothananiya aya uhimiacha, ni weerelha wiira, ahokolhie u Nabalaki, ahimiache yayo malhove ayo.
6Paahi, Nabalaamu nkayaahokolhia uwannyaya, nkayaaphwanya Nabalaki aneemenlhe vakhiviru ni isadaka aya yo upahiya vamooroni, vamoka ni manyoolhupalhe onkhaye o Umoabu. 7Nabalaamu nkayoolhumacha nlhove naya, yeeraka,
“amwene Nabalaki ahokiwiiha vaa ukhuma Uarnamu,
eiyo, amwene o Umoabu ahokiwiiha ukhuma miako cho unosha nchuwa.
‘Mmweeke mwaalhave attu a Nayakhobo wo nlhatu waka,
eiyo, mmweeke mwaakuphulhacha attu o Israeli!’
8Kinohalha unlhava chani ntu hilhaviye ni Nlhuku?
Kinohalha waakuphulhacha chani attu Apwiiya Nlhuku, ahaakuphulhanche aya?
9Ukhuma uchulhu malhuku kinoowona attu,
Toka vachulhu miako.
Attu anokhalhacha vekha aya ayo.
Aneechoona wiira ahovahiya ibarakha waapwaha attu o ilhapo chikina.
10Mpani nooria waalhakelha winchiva wa attu o nikosho ni Nayakhobo,
ama waanyihera winchiva wa attu o Israeli?
Kinkhwe nookhwa o attu anopanga moombone,
umalhelha waka ukhalheke thoko chiri aya umalhelha wa yayo manyaattu ayo.”
11Vavawo Nabalaki nkayeerelha Nabalaamu wiira, “Nkipangenlheni? Kuuwiihilheni vaa wiira mwaalhave amalhaponi aka, nansho itulhi aya, inyuva nhaavaha ibarakha.”
12Nansho Nabalaamu nkayaakhulha Nabalaki wiira, “Kinothananiya wiira kihimiacheke malhove akivahilhe aya Apwiiya Nlhuku vekha ayaru.”
Nabalaamu anoohimiacha nttenga wo neyelhi
13Kaanyuma aya, Nabalaki nkayeerelha Nabalaamu wiira, “Ngwee vakittu vakina vanohalha ihu wooria woona attu o Israeli, ata chiicho nnohalha woona vakittu waya vakani, khannoria woona onkhaye. Mwamalhihaka, mwaalhaveke wo nlhatu waka.” 14Paahi, Nabalaki ahaakusha Nabalaamu mpaka imata yo Usofimu, vachulhu mwaako wo Upisiga. Vavawo nkayaatheka madhubahu saba ni ukumiha vachulhu waya, kila madhubahu, isadaka yo n'dume no ing'ope nimoka ni ikhondoro ilhopwana imoka.
15Nabalaamu nkayeerelha Nabalaki wiira, “Nkhalheke vaa vakhiviru ni isadaka inyu yo upahiya vamooroni va, ni mii kirwee uhito uwe kakumaane ni Apwiiya Nlhuku.”
16Paahi, Apwiiya Nlhuku, nkayaavaha Nabalaamu malhove anothananiya aya uhimiacha, ni weerelha wiira, “Nhokolhieke wa Nabalaki mwahimiache malhove ayo.”
17Paahi tho, Nabalaamu ahohokolhia, nkayaaphwanya Nabalaki aneemenlhe vakhiviru ni isadaka yo upahiya vamooroni vamoka ni manyoolhupalhe onkhaye o Umoabu. Nabalaki nkayaakoha, “Apwiiya Nlhuku ohimenrieni ittu yaani?”
18Vavawo Nabalaamu nkayaahimiachera Nabalaki nttenga, venre aya,
“Nabalaki, mweemelheke, mwiiwelhelheke,
nkiweelhelheke inyu anaaya Nasipori.
19Nlhuku kahiwe ntu, wiira oothache,
mena kahiwe ntu, wiira arukunushe irusho chawe.
Chani nowooria ulheeha ittu, hipange,
ama uhimia ittu hitimirihe?
20Mmweheke, kihovahiya nlhove no uvahera ibarakha,
ni ayo ahomalha uvaha ibarakha, mena akinooria urukunusha.
21Apwiiya Nlhuku khoonilhe ittu yo unanara wa achishaana a Nayakhobo,
mena khoonilhe uhilhoka wa achishaana a attu o Israeli alha.
Apwiiya Nlhuku, Nlhuku aya ri vamoka ni ayo,
Yayo anototopelhiya wo woopelhiya ilhulhu mmilhokoni mwaya,
ni ayo anoopochera wo ukhalha phi amwene aya.
22Nlhuku aakushilhe ukhuma upottani Umisri,
nowaatakanelha wo machiri thoko o inari.
23Wo ikekhiaye ukhwiri khunooria waapatta attu o nikosho ni Nayakhobo,
mena ukhwiri khunopangiya wa attu o Israeli.
Vano wo ittu inaacha attu o Israeli, attu anoohimiacha wiira,
‘Mmwehacheke cho ushangiha chipannge awe Nlhuku.’
24Mwooneke, attu o Israeli aheemelha thoko kharamu nthiyana,
aneemelhacha thoko kharamu nlhopwana.
Thoko kharamu hinorupa mpaka amalhihe ukhuura inama yiivilhe awe,
ni uwuria iphome ya ashinama eevilhe awe.”
25Paahi, Nabalaki nkayeerelha Nabalaamu wiira, “Ukhalhawaya nhokhota waalhava, paahi etu mena nhaavahe ibarakha iriyoothe.”
26Nansho Nabalaamu nkayaakhulha Nabalaki wo wiira, “Chani akuhimenrieni wiira, inohimia aya Apwiiya Nlhuku phi nothananiya aka upanga?”
Nabalaamu anoohimiacha nttenga wo neraru
27Yamalheke, amwene Nabalaki nkayeerelha Nabalaamu wiira, “Mmweeke kinourwehani vakittu vakina, veekinaka Nlhuku noottuna wiira mwaalhave attu ayo, ukhuma wowo wo nlhatu waka.” 28Paahi, Nabalaki ahaakusha Nabalaamu mpaka vachulhu mwaako wo Upeori, wiira ntu eemelhaka nowoona uthakoni.
29Nabalaamu nkayeerelha Nabalaki wiira, “Nkithekelheke vaa madhubahu saba, nkikumihereke madume o ing'ope saba ni ikhondoro chilhopwana saba.” 30Paahi Nabalaki ahopanga thoko chaalheheriye aya ni Nabalaamu. Yamalheke, ahokumiha vachulhu wo kila madhubahu, isadaka yo n'dume no ing'ope imoka ni ikhondoro ilhopwana imoka.
The Bible Version in Makua @The Word for The World International and Makua Language translators. All rights reserved.