Waalhakelhiya attu 22
22
Amwene o Umoabu anoweehana Nabalaamu
1Yamalheke, attu o Israeli yahochokholha nkwaha tho, nkayaarwaa weesha nipuro naya umatimbe o ilhapo yo Umoabu, unoshelha nchuwa umwolhokoni Uyordani, ukhelhelha ilhapo yo Uyeriko.
2Paahi, amwene Nabalaki anaaya Nasipori, ahochuwelha chittu chonkhaye attu o Israeli chaapangilhe aya wa attu o Uamori. 3Yayo vamoka ni attu o Umoabu yahokelhiya ni woova chinene, woova attu o Israeli. Yoova nlhatu no winchiva wa attu o Israeli uwo.
4Paahi, attu o Umoabu nkayeerelhacha ahoolhelhi o Umidiyani wiira, “Yolha mphingo ulha wo uhipicha unookhupa kila ittu inonirukureria, thoko ing'ope chinolhia aya mathaakhuru mmamatani.” Chiichammo etu, Nabalaki anaaya Nasipori, amwene o Umoabu yeyo ikatema iyo, 5ahorweeha nttenga wa Nabalaamu, anaaya Nabeori, Upethori uwo, vakhiviru ni mwoolhoko wo Yufrati, ilhapo yo Uamawi. Yeerenlhe Nabalaamu wiira, “Nihaawo nikosho nuulhupalhe no attu akhumme Umisri, ni ayo nihowanelha kila vakittu mwiilhaponi mu, tho, anookopopiha wiira anookusha ilhapo aka. 6Nkawaanani vano etu, mmwe mwaalhava yalha attu alha wo nlhatu waka, ukhalhawaya ari o machiri ukipwaha mii. Veekinaka kinowooria waakottolha ni woomolhacha ahikelhe wiilhaponi waka, ukhalhawaya kihochuwelha wiira inyuva mwamvahaka ntu ibarakha, noopatta ibarakha, ni mwanlhavaka ntu noolhaviya.”
7Paahi, ashulhupalhe o Umoabu ni o Umidiyani nkayaakusha ithipelho yo ukumiha, nkayaarwacha wa Nabalaamu. Vaaphilhe aya, nkayaavaha Nabalaamu nttenga u Nabalaki.
8Nabalaamu nkayeerelha wiira, “Nrupeke etu wono yolha uhiyu ulha, ni mii kinouwiiherani nlhove no uwaakhulhani, thoko Apwiiya Nlhuku chinohalha aya ukihimeria.”
Paahi ashulhupalhe o Umoabu ayo ahorupa u Nabalaamu. 9Vaaphilhe aya uhiyu, Nlhuku ahaakhuruwelha Nabalaamu, nkayaakoha, “Phi apani yalha attu arii vawaninyu alha?”
10Nabalaamu nkayaakhulha Apwiiya Nlhuku wo wiira, “Nabalaki anaaya Nasipori ahokiwiihera nttenga wiira, 11‘Mphingo muulhupalhe wa attu o nikosho nikina akhumilhe Umisri, uhowa, ni ayo ahowanelha kila vakittu mwiilhaponi. Ahokilhepelha wiira kirwee kaalhave yayo attu ayo, wiira veekinaka anowooria waatakana ni ayo ni woomolhacha.’ ”
12Apwiiya Nlhuku nkayeerelha Nabalaamu wiira, “Nhirwee vamoka ni yalha attu alha, mena nhalhave yayo attu ayo ukhalhawaya ahovahiya ibarakha.”
13Paahi etu waashelhe waya, Nabalaamu ahonkwa, nkayeerelha ashulhupalhe o ipilhi aarumiye ni Nabalaki ayo wiira, “Nhokholhiacheke wiilhaponi winyu, ukhalhawaya Apwiiya Nlhuku khanttuna ukihiyerera wiira vamoka ni inyu mwaatti.”
14Paahi, ashulhupalhe o ipilhi o Umoabu ahothama nkayaahokolhia wa Nabalaki, ni weerelha wiira, “Nabalaamu ahokhota uwa vamoka ni hii.” 15Nansho Nabalaki nkayaaruma ashulhupalhe akina, enchi waapwaha alhe, attu o ipilhi yo nchulhu waapwaha o upacha alhe. 16Yayo ahophiya u Nabalaamu, nkayeerelha wiira, “Nabalaki anaaya Nasipori aneera wiira, nhichiichihiye ni ittu iriyoothe, ata nhiye uwa uwannyaka. 17Kinouvahani ipilhi yulhupalhe, ni ittu iriyoothe nnothanana inyu ukilhepelha kinouvahani. Nkawaani, mmwe mwaalhava yalha attu alha.”
18Nansho Nabalaamu nkayaakhulha akarumiya a Nabalaki yeeraka, “Ata yakhalha Nabalaki anookivaha inupa aya inachanre nchurukhu ni idhahabu, mii akinooria uhiya wiiwelhelha malhehero a Apwiiya Nlhuku, Nlhuku aka, anaacha ittu iriyoothe, ikhalhe ikani ama yulhupalhe. 19Nansho kinoulhepelhani wiira, nrupacheke vaa uhiyu ulha, thoko ashikhunaninyu alhe, ni mii kichuwelhe inothanana aya ukihimeria Apwiiya Nlhuku tho.”
20Paahi, Nlhuku ahaakhuruwelha Nabalaamu yoyo uhiyu uyo, nkeerelha wiira, “Yakhalhaka attu alha awiilhe uwiihanani, nrweeke mwaattukaneke, nansho mpangeke ilhe inouhimeriakani ilhe tu.”
21Paahi Nabalaamu ahonkwa mapikosha, nkayeesha chiireru iphuta aya, nkayaarwa vamoka ni ashulhupalhe o Umoabu ayo.
Iphuta ya Nabalaamu inowuulhumacha ni waamuka
22Urushiya wa Nlhuku wahopharelha wo nlhatu ni Nabalaamu urwaa, paahi nnepa wo wiirimu wa Apwiiya Nlhuku nkawaakumaana mphironi. Yeyo ikatema iyo Nabalaamu aari vachulhu iphuta aya, anari ni anamitheko aya. 23Paahi iphuta ya Nabalaamu yahoona yoyo nnepa wo wiirimu wa Apwiiya Nlhuku uyo uneemenlhe mphironi, unavarenlhe uphanga uthamihiye nnigonerani mwaya. Paahi iphuta nkayaahapuwa iphiro, nkayaakelha uchereshere. Nabalaamu nkayaata iphuta iyo, nkayaahokolhosha mphironi.
24Yamalheke, nnepa wo wiirimu wa Apwiiya Nlhuku uyo nkawaaholhelha umihoolho, nkaweemelha vakittu vari iphiro yo uyevayeva, variyari yo mamata o mizabibu ni ishiri mipatta chonkhaye cho miilhi. 25Iphuta voonilhe aya nnepa wo wiirimu wa Apwiiya Nlhuku, nkayeekakhelha ushirini ni upariha mweto u Nabalaamu vavawo. Paahi Nabalaamu nkayaata tho iphuta iyo.
26Yamalheke, nnepa wo wiirimu wahoholhelha tho, nkaweemelha vakittu vo uyevayeva vahirii ni nipesha no uvira wiiminono mena wiimushi. 27Iphuta vonne aya yoyo nnepa wo wiirimu wa Apwiiya Nlhuku uyo tho, yahorupa vathi. Nabalaamu nkayaathunalha, nkayaata iphuta iyo ni ikopo aya. 28Vavawo Apwiiya Nlhuku ahothaphulha malhaku o yeyo iphuta iyo, nkayoolhumacha weerelha Nabalaamu wiira, “Kuupangenlheni ittu yaani mpaka nkamwaakata mikwaha miraru chilha?”
29Nabalaamu nkayeerelha iphuta iyo wiira, “Uweva uhokipangelha ncheche. Kikaari ni uphanga kaanowiiva naanano va.”
30Nansho iphuta iyo nkayaakhulha Nabalaamu wo wiira, “Chani mii akihii iphuta inyu inoukushani mahuku onkhaye alha, mpaka nihuku no lhelho nna? Chani kihopacha upangelhani chiichalhe?”
Nabalaamu nkayaakhulha, “Mena.”
31Paahi vavawo Apwiiya Nlhuku ahopatakulha miitho a Nabalaamu, ni ayo nkayoona nnepa wo wiirimu wa Apwiiya Nlhuku unemenlhe mphironi, unavanre uphanga. Nabalaamu nkayeewulhusha makukhu vathi.
32Nnepa wo wiirimu wa Apwiiya Nlhuku nkaweerelha Nabalaamu wiira, “Woonaka nhaata iphuta inyu mikwaha miraru? Kiwiilhe uchiichihani, ukhalhawaya ittu inokelha inyu upanga iyo, khiri yoombone. 33Iphuta inyu yahokoona nkayaakihapuwa mikwaha miraru chi. Yakaari khayaahapuwilhe ni uvira utayi, wo ikekhiaye kaanowiivani inyuva ni uhiya ikumi iphuta ilha.”
34Nabalaamu nkayeerelha nnepa wa Apwiiya Nlhuku wiira, “Kihowonya ukhalhawaya akichuwenlhe wiira mwaheemelha mphironi ukithiyelhelha. Vano etu, yakhalha kinooteelhihani wiira kithepeke urwaa nkwaha ulha, paahi kinohokholhia uwani.”
35Nansho nnepa wo wiirimu wa Apwiiya Nlhuku nkaweerelha Nabalaamu wiira, “Nrweeke ni attu alha, nansho mwahimieke ilhe inothanana aka uhimeriani iyo.” Paahi, Nabalaamu ahochokholha nkwaha vamoka ni ashulhupalhe o ipilhi yaarumiye ni Nabalaki alhe.
Nabalaki anoweekamelha Nabalaamu
36Amwene Nabalaki vaahimeriye aya wiira Nabalaamu anoowa, ahokhuma ni urwaa iwani yo Uari, ilhapo yaari umwiinanoni wo mwoolhoko wo Arnoni urii umwiinanoni wo Umoabu, uweekamelhani. 37Nabalaki nkayaakoha Nabalaamu wiira, “Chani, woonaka khamwaawilhe uwannyaka vowiihanne akani valhe?” Chani, mwaanyihera wiira akooria uuvahani ipilhi yulhupalhe?
38Nabalaamu nkayaakhulha Nabalaki wo wiira, “Kihowa vano etu. Nansho, chani kihaana ipilhi yo uhimeriani ittu iriyoothe? Ittu inohalha awe ukihimeria Nlhuku phi iyo kinothananiya aka uhimia.”
39Paahi Nabalaamu nkayaarwa vamoka ni Nabalaki, nkayaaphiya Ukiriath Husothi. 40Wowo Nabalaki nkayaakumihera isadaka yo upahiya yo ing'ope ni ikhondoro, nkayaakawelhacha inama Nabalaamu ni ashulhupalhe yaari vamoka ni ayo. 41Waashelhe waya, Nabalaki nkayaakusha Nabalaamu, nkayaawelhana mpaka Ubamoth Baali vakittu vanolhapelhiya nlhuku Baali, ni wo ukhuma wowo, Nabalaamu yahoona attu o Israeli akina.
The Bible Version in Makua @The Word for The World International and Makua Language translators. All rights reserved.