Waalhakelhiya attu 19
19
Ituura yo ing'ope yo khwiilha
1Apwiiya Nlhuku nkayaathepa weerelha ashinna Musa ni Naharuni wiira, 2“Alha phi malheheriyo anokumiha aka mii Apwiiya Nlhuku. Mwaahimerie attu o Israeli wiira, awiiheke ing'ope ithiyana yo khwiilha yo uhiremara ama iri ni ittu yo uhilhoka iriyoothe, ihinapacha uwarihiya nikongwa ni ulhimihiya. 3Mwaavaheke opochera ishaani Naeliazari yeyo ing'ope iyo. Ni iyo ikumihiyeke uchereshere nipuro, yahithiyeke umihoolho wa opochera ishaani ayo.
4“Yamalhaka, opochera ishaani Naeliazari akusheke iphome vakani ni unyunyihera wo nikokho naya mikwaha saba, uweha mpata wo umihoolho wo Nihema Nitakatifu. 5Yeyo ingo'pe yonkhaye iyo ipahiyeke vamooroni umihoolho wo opochera ishaani. Kila itturi aya ipahiyeke vamooroni, toka nrapalha, inama, iphome ni marupo aya. 6Yamalhakaru, opochera ishaani akusheke ikipande yo mwiri wo mwerezi, nchaashi no ihisopo ni nttoche no khwilha, arihelheke vamooroni vanopahiya ing'ope vawo. 7Baada yo vavawo, opochera ishaani apuputteke ikuwo chaya ni urapa maashi mwiiruttuni, amalhihaka anowooria ukelha unipuroni, nansho anookhalha o unyalha, khanorumelhelhiya umihoolho wa Apwiiya Nlhuku mpaka uchechilho. 8Ntu nopaha yeyo ing'ope iyo, apuputteke ikuwo chawe wo maashi ni urapa maashi mwiiiruttuni mwawe, nansho ni uyo chiicho nookhalha o unyalha, khanorumelhelhiya umihoolho wa Apwiiya Nlhuku mpaka uchechilho.
9“Yamalhaka, ntu hinyanlhe, norumelhelhiya umihoolho wa Apwiiya Nlhuku, akhupeke ituura yo yeyo ing'ope iyo ni urihelha vakittu vareerilhe uchereshere nipuro. Yeyo ituura iyo inooshungiya wiira, iwe yaapangelhiya ntheko ni attu o Israeli onkhaye, wo uthakanihiya ni maashi o unttukureria ntu, wiira ntu arumelhelhiye umihoolho wa Apwiiya Nlhuku, alhevelhelhiye uwonya. 10Ni ntu nokhupa ituura yo yeyo ing'ope iyo apuputteke ikuwo chawe, nansho nookhalha o unyalha, khanorumelhelhiya umihoolho wa Apwiiya Nlhuku mpaka uchechilho. Yalha malhehero alha phi o mahuku onkhaye, anaacha attu o Israeli, ni attu akina anohalha waakhalhana vamoka ayo.
Malhehero anaacha uttukuriya
11“Yakhalhaka ntu noovara ntembo wa ntu riyoothe, nookhalha o unyalha, khanorumelhelhiya umihoolho wa Apwiiya Nlhuku wo mahuku saba. 12Nihuku no neraru ni nihuku no saba, yoyo ntu uyo eehapiheke wo yayo maashi ayo yo wittukurielha ayo, ni uyo nookhalha oombone. Nansho aahittukurieke nihuku no neraru ni nihuku no saba, yoyo ntu uyo noohalha nanyanlhe, khanorumelhelhiya umihoolho wa Apwiiya Nlhuku. 13Ntu novara ntembo, yaani iruttu ya ntu khwilhe, aahittukurieke, noonyalhiha Nihema Nitakatifu, ni uyo eeshiyeke uchereshere ni attu o Israeli. Yoyo ntu uyo nookhalha o unyalha, khanorumelhelhiya umihoolho wa Apwiiya Nlhuku, ukhalhawaya khamichamicheriye maashi o uttukuria alhe.
14“Ni alha phi malhehero anothananiya uttwariya ntu akhwelhaka unihemani wawe. Kila ntu nokelha mwommo nhina nihema nno, ama aarii nhina nihema nno, nookhalha o unyalha, khanorumelhelhiya umihoolho wa Apwiiya Nlhuku wo mahuku saba. 15Kila ittu iriyoothe ihikhuneelhiye vachulhu waya, inookhalha yo unyalha, khinorumelhelhiya umihoolho wa Apwiiya Nlhuku.
16“Ntu riyoothe avaraka iruttu ya ntu eeviye ama khwilhe nookhwa o kawaida vathe wo nihema nawe, ama avaraka nikhuva na ntu ama avaraka nihiye, nookhalha o unyalha, khanorumelhelhiya umihoolho wa Apwiiya Nlhuku wo mahuku saba.
17“Wo attu aneenyalhiha, ikushiyeke ituura yo isadaka yo ulhevelhelhiya uwonya ipahiye vamooroni. Yeyo ituura iyo ithakanihiye ni maashi o umwoolhokoni ari nnyoopweni. 18Ntu rii oombone umihoolho wa Apwiiya Nlhuku akusheke nthaakhuru no ihisopo, athovieke mmaashini mmo, yamalhakaru, amichamichereke nnihemani mmo, inyipo chonkhaye chirii nhina nihema, vamoka ni attu yaari nhina. Ammichamichereke tho ntu vanre nikhuva na ntu uyo, ama iruttu ya ntu eeviye ama khwilhe nookhwa o kawaida, ama ntu vanre nihiye. 19Nihuku no neraru ni nihuku no saba, ntu rii oombone umihoolho wa Apwiiya Nlhuku yo, ammichamichereke ntu o unyalha uyo maashi ayo, ni yoyo ntu uyo apuputteke chawe ni urapa, ni uchechilho nookhalha oombone, hinyanlhe.
20“Nansho ntu akhalhaka o unyalha umihoolho wa Apwiiya Nlhuku aahiitukurieke, yoyo ntu uyo eeshiyeke utayi ni attu, ukhalhawaya noonyalhiha Nihema Nitakatifu. Ukhalhawaya khamichamicheriye maashi o wiittukuria, yoyo bado o unyalha umihoolho wa Apwiiya Nlhuku. 21Attu avarechesheke alha malhehero alha wo mahuku o uhimalha. Ni ntu nomichamicha maashi o uttukureria uyo apuputteke ikuwo chawe, ni ntu riyoothe nkina novara maashi o unyalha, ahinorumelhelhiya umihoolho wa Apwiiya Nlhuku ayo, nookhalha o unyalha umihoolho wa Apwiiya Nlhuku mpaka uchechilho.
22“Ntu iriyoothe nohalha awe uvara ntu o unyalha, hinorumelhelhiya umihoolho wa Apwiiya Nlhuku, noonyalha, khanorumelhelhiya umihoolho wa Apwiiya nlhuku. Ni ittu iriyoothe inovara yeyo ittu iyo inoonyalha umihoolho wa Apwiiya Nlhuku mpaka uchechilho.”
The Bible Version in Makua @The Word for The World International and Makua Language translators. All rights reserved.