Waalhakelhiya attu 20
20
Maashi aakhumilhe vamwalhani
(Ukh17:1-7)
1Paahi, mweeri o upachera, nlhoko wonkhaye wa attu o Israeli wahophiya uthako wo Usiini, nkayeeshacha nipuro naya Ukadeshi. Vaari aya wowo, Namiriamu ahorihia, nkayaavithiya.
2Vavawo vakittu vaamakilhe aya vawo khawaari ni maashi. Paahi etu, nlhoko wonkhaye wa attu o Israeli wahokumaana wo uhiihaniya ni ashinna Musa ni Naharuni. 3Attu onkhaye ayo ahochukhulha ni wunlha tho yeeraka wiira, “Nambaya nikarimenlhe vamoka ni ashilhoko ihu umihoolho wo Nihema na Apwiiya Nlhuku. 4Nlhatuni no uniwiiha uno, hii nlhoko wa attu a Apwiiya Nlhuku uthakoni uno? Chani etu, mwaaniwihilhe uno wiira nikhwaache vamoka ni mihuwo chihu? 5Ni, nlhatuni etu no unikumiha Umisri ni uniwiiha va vakittu vo uhilhoka choo va? Vaa khavarii vakittu vo choolhia, ama itini, ama izabibu mena makomamanga. Mena khaawo maashi o uwuria.”
6Vavawo, ashinna Musa ni Naharuni ahothama vaari nlhoko wa attu ayo, nkayaarwa uwemelhani vari nlhako wo Nihema Nitakatifu, nkayeewulhusha makukhu. Paahi, nchakarimia wa Apwiiya Nlhuku wahaakhumelhelha. 7Ni ayo Apwiiya Nlhuku nkayeerelha ashinna Musa wiira, 8“Nkusheke ikopo inyu, yamalhaka inyuva ni ahima inyu, Naharuni mwaathothokaniheke nlhoko wa attu onkhaye. Mwamalhihaka, umihoolho waya vawo, mwiirelheke mwalha urii umihoolho waya uyo ukhume maashi. Eiyo, nnoohulha mwalha uyo ukhume maashi, wiira nlhoko wonkhaye wa attu ni mihuwo chaya awuriache.”
9Paahi ashinna Musa ahokusha ikopo aya, vakittu vaari aya, umihoolho wa Apwiiya Nlhuku, thoko chaalheheriye aya. 10Yamalheke, ashinna Musa ni Naharuni yahaathothokaniha nlhoko wonkhaye wa attu umihoolho wo mwalha. Ni ashinna Musa ayo nkayeerelha wiira, “Mwiiwelhelheke vano, mwaatti o urunaruna va. Chani nuukumiherekeni maashi ukhuma vamwalhani va?” 11Yamalheke etu, ashinna Musa ahotheesha mwoono aya, nkayaata mwalha uyo mikwaha miilhi ni ikopo aya. Maashi menchi nkaathekhuma, attu nkayaawuriacha vamoka ni mihuwo chaya.
12Nansho Apwiiya Nlhuku nkayeerelha ashinna Musa ni Naharuni wiira, “Ukhalhawaya mwaatti khankirumelhenlhe mii, mena ukihiya wiira koonihe machiri aka umihoolho wa attu a Israeli, paahi wo yoyo nlhatu uyo khannopiiha nlhoko wa attu onkhaye ulha, ilhapo yaavahilhe aka iyo.”
13Vakittu vaakhumelhenlhe yayo maashi ayo nkaweehaniya, Umeriba, maana aya “Uchukulhacha.” Vakittu attu o Israeli vaachukunlhe aya wa Apwiiya Nlhuku, ni anene ayo nkayeechooniha wo nchakarimia naya mmilhokoni mwaya.
Amwene o Uedomu anowaakhota attu o Israeli
14Yamalheke, ashinna Musa ahaaruma attu ukhuma unipuroni Ukadeshi, arweehe nttenga wa amwene a Uedomu ni weerelha wiira, “Achihima inyu, attu o Israeli, aneera wiira, Inyuva nhochuwelha uhuva wonkhaye unipattilhe.
15“Manyaapwiiya ihu chenre aya wo urwaa Umisri, waakhanlhe ihu wo iyaakha chinchi, ni iphiro attu o Umisri chaattwarushilhe aya manyaapwiiya ihu, nkayaanittwarusha ni hii chiicho. 16Nkanonlhelha Apwiiya Nlhuku, ni ayo ahoniweelhelha vonlha ihu, nkaaniwiihera karumiya aanithamihilhe Umisri. Vano nirii Ukadeshi va, iwani inaatamana ni ilhapo inyu. 17Chonte, nnivaheke nipesha no uvira mwiilhaponi mwinyu. Khaninonyikhalha imata chinyu, ama imata cho mizabibu, mena khaninowuria maashi o ilhushi chinyu. Ninohalha uttwara ntalha muulhupalhe wa amwene ni urwaa wo uhirukunuwa wiimonono ama wiimushi, mpaka vanokhuma ihu mu mwiilhaponi mwinyu mu.”
18Nansho amwene o Uedomu nkayaakhulha yeeraka, “Mena. Khannovira mwiilhaponi mwaka, ukhalhawaya mwaviraka kinowaaruma anakhoto aka owaatakachekeni.”
19Nansho akarumiya a attu o Israeli nkayeerelha wiira, “Hiyaano ninohalha uttwara ntalha muulhupalhe, yakhalhaka hii ni mihuwo chihu ninoowuria maashi inyu, ninoolhiva. Ninouvendani chonte, nnihiyerereke nivire wo mweto mena khiiwo ittu iriyoothe ikina.”
20Nansho amwene o Uedomu nkayaaminda yeeraka, “Khaninouhiyererani.” Wo uhipicha, attu o machiri o Uedomu uwo ahokhuma nkayaatiyelhelha ntalha uyo.
21Paahi, attu o Uedomu ahokhota waahiyerera attu o Israeli wiira avirache umwiinanoni waya. Attu o Israeli ahorukunuwa ni urwaa ntalha nkina.
Ukhwa wa Naharuni
22Yamalheke, attu onkhaye o Israeli ahothama Ukadeshi, nkayaarwaa nkwaha nkayaaphiyacha uri mwaako wo Uhori, umwiinanoni wo ilhapo ya Uedomu. 23Paahi wowo Apwiiya Nlhuku nkayeerelha ashinna Musa ni Naharuni wiira, 24“Naharuni anookhwa, khanophiya ilhapo yaavahilhe aka attu o Israeli, ukhalhawaya mwaattiva eelhi va khamwaarumelhenlhe malhehero aka Umeriba ulhe. 25Paahi mwaakusheke Naharuni ni Naeliazari, anaaya ayo, mwaawelhiheke vachulhu mwaako wo Uhori. 26Yamalhaka, mwaarulheke Naharuni ikuwo chaya cho opochera ishaani, ni chiyo mwaawariheke Naeliazari, anaaya ayo. Ukhalhawaya Naharuni ayo anokookhwa wowo umwaakoni uwo.”
27Paahi ashinna Musa ahopanga thoko chaalheheriye aya ni Apwiiya Nlhuku. Onkhaye araru nkayaawelha umwaakoni, nlhoko wonkhaye wa attu o Israeli woonaka. 28Yamalheke, ashinna Musa nkayaarulha Naharuni ikuwo chaya cho opochera ishaani, nkayaawariha Naeliazari, anaaya Naharuni. Ni Naharuni nkayaakhwa vavawo, umwaakoni uwo. Yavireke yayo, ashinna Musa ni Naeliazari ahokhuruwa vathi. 29Vaakhuruwilhe aya, nkayaahimiacha ukhwa wa Naharuni wa nlhoko wonkhaye wa attu o Israeli. Ni attu nkayaarupa mattanga wo mahuku makhumi mararu.
The Bible Version in Makua @The Word for The World International and Makua Language translators. All rights reserved.