Waalhakelhiya attu 18
18
Mitheko cha opochera ishaani Alawi
1Paahi yamalheke, Apwiiya Nlhuku nkayeerelha Naharuni wiira, “Ichuku chonkhaye chinaacha ntheko wo Nihema Nitakatifu chinookhalha chawinyu, cha achishaana inyu ni attu o nihimo ninyu. Tho, uwonya unottwaraana ni ntheko inyu mwaanene wo opochera ishaani, ni achishaana inyu unookhalha wawinyu chiicho. 2Inyuva, achishaana inyu ni ayari inyu onkhaye, nnoovara ntheko wo opochera ishaani. Ashilhoko inyu akina o nikosho ninyu, anoovara ntheko vamoka ni inyu umihoolho wo Nihema Nitakatifu. 3Yayo manyaattu ayo apangeke ntheko unohalha inyu waavaha, ni atimirihe ntheko aya unaacha Nihema Nitakatifu. Nansho kharina iruusa yo uvara iyoombo cho Nnihemani, mena waatameria madhubahu, ahiwe yaakhwa, ni inyu nkamwaakhwa chiicho. 4Yayo manyaattu ayo anouttukanani inyuva unthekoni ni utimiriha mitheko chaya rata, vanaacha ntheko wonkhaye wo unihemani, ni mena hikhalhe ntu nkina o uwaatameriani mwommo. 5Mwaattiva nvareke ntheko wo Nihema Nitakatifu ni vachulhu madhubahu akooroshiye wo ishaaba, wiira urushiya waka uhiwe waakhumelhelha tho wa attu o Israeli. 6Phi mii kaathanlhe ashilhoko inyu Alawi mmilhokoni mwa attu o Israeli, ukhalha isadaka uwannyu. Yayo kiheesha wo nlhatu waka mii Apwiiya Nlhuku, wiira avarache ntheko wo Nihema Nitakatifu. 7Nansho inyuva vekha inyu ni achishaana inyu, phi nohalha uvara mitheko chonkhaye cho opochera ishaani, umadhubahuni ni chittu chonkhaye cho Vakittu Vatakatifu Chinene. Yoyo phi ntheko inyu, ukhalhawaya kinouvahani irusho cho opochera ishaani. Ni ntu riyoothe hiri opochera ishaani aatameriaka iyoombo cho nihema, nowiiviya.”
Mpatta wa opochera ishaani
8Apwiiya Nlhuku nkayeerelha Naharuni wiira, “Kinouvahani isadaka chikivahilhe aya attu o Israeli, chittu chonkhaye chitakatifu akivanhe aya. Chittu chonkhaye chittukuriye ni attu o Israeli, kinouvahani chonkhaye inyuva ni ayari inyu ukhalha mpatta inyu, ni iyo phi mpatta inyu wo mahuku o uhimalha. 9Munlhokoni mwo chittu chitakatifu chinene chihinothananiya upahiya vamooroni, chilha chinookhalha chawinyu, isadaka cho choolhia, isadaka cho ulhevelhelhiya uwonya, ni isadaka cho ulhivihera milhatu. Kila ittu attu inohalha aya ukikumihera ukhalha isadaka itakatifu yo upahiya vamooroni, inookhalha yawinyu ni achishaana inyu. 10Nlhieke chechiyo chittu chiyo thoko chittu chitakatifu, chilhiyeke ni manyaalhopwana vekha aya, ukhalhawaya chechiyo chittu chiyo, chitakatifu uwannyu mwaatti.
11“Tho, chittu chikina chonkhaye chinokikumihera aya attu o Israeli ukhalha isadaka cho utheeshiya uchulhu, chinookhalha chawinyu. Kinouvahani inyuva, achishaana inyu ashilhopwana ni ashithiyana, chikhalhe chawinyu mahuku o uhimalha. Ntu riyoothe munlhokoni mwa ashilhoko inyu hinyalhihiye, nowooria ulhia chechiyo chittu chiyo.
12“Kinouvahani chittu chonkhaye choombone chinokhuma mmilhipuni nnokumiha aya attu o Israeli. Yaani makhura oombone, idivai ni choolhia. 13Milhipu chonkhaye cho maphepu o utokotta o mmamatani mwaya anohalha aya ukiwiihera mii, chinookhalha chawinyu. Kila ntu hinyalhihiye, munlhokoni mwa ashilhoko inyu alhieke. 14Kila ittu ittukuriye mwiilhaponi mwa attu o Israeli inookhalha yawinyu.
15“Kila nttara ninohalha aya ukikumihera attu o Israeli, akhalhaka nttara na ntu, ama no mwannama, ninookhalha nawinyu. Nansho khanrina ittu yo uhiya woopolha mattara onkhaye a ntu, ni kila nttara no mwannama hinorumelhelhiya umihoolho wa Apwiiya Nlhuku, lazima noopolhiye. 16Mattara o malhipa o mweeri mmoka anoopolhiya wo ulhiviya ivipande nthanu cho fedha, wo ulhikaana ni maphimelhiyo o Nihema Nitakatifu. 17Nansho mattara o ing'ope, ama o ikhondoro ama o ipuri ahoopolhiye, yayo phi matakatifu. Iphome aya mmichamicheke umadhubahuni ni makhura aya mpaheke, ukhalha isadaka yo upahiya vamooroni, yo unukhelha nihiriri noombone ninokichivelha mii Apwiiya Nlhuku. 18Inama chaya nkhuureke, yakhalha ikidari ni mweto wo utulhi, wo wiimonono chinokumihiya ukhalha isadaka yo utheeshiya uchulhu.
19“Kinouvahani inyuva, achishaana inyu ashilhopwana ni ashithiyana, chittu chonkhaye cha attu o Israeli chinokikumihera aya, chechiyo phi mpatta inyu wo mahuku onkhaye o uhimalha. Alha phi malhehano aka o mahuku o uhimalha umihoolho waka, anopanga aka wo nlhatu winyu ni wa achishaana inyu.”
20Yamalheke, Apwiiya Nlhuku nkayeerelha Naharuni wiira, “Inyuva khannokhalha ni ittu yo uhiyeriya iriyoothe mwiilhaponi mwaya, mena ukhalha ni mpatta munlhokoni mwaya, mii phi mpatta inyu wo uhiyeriya ilhapo munlhokoni mwa attu o Israeli.”
Mpatta wa Alawi
21“Wo nlhatu unaacha Alawi, yayo kihaavaha mpatta mmoka wo mipatta khumi, wo ukhuma kila isadaka chonkhaye chinokikumihera aya attu o Israeli, ukhalha phi ittu yo uhiyeriya. Alha anookhalha phi malhivo aya, wo ntheko wo uwehaweha Nihema Nitakatifu naka unopanga aya. 22Ni toka vano, attu akina o Israeli ahaatamerie Nihema Nitakatifu ahiwe yoonia wiira ahowonya, ni wiiwihera nookhwa. 23Nansho Alawi vekha aya phi nohalha uvara ntheko u Nihema Nitakatifu, ni wiinanelha. Ni alha phi malheheriyo o mahuku onkhaye o uhimalha mu iyari inyu yonkhaye. Alawi khanokhalhacha ni nhakhu wo uhiyeriya mwiilhaponi Uisraeli, 24ukhalhawaya kihaahiyera mpatta mmoka wo kila mipatta khumi, wo isadaka chinokikumihera aya attu o Israeli, ukhalha wawaya. Phi nlhatu ninohimia aka wiira yayo khanokhalhacha ni ittu yo uhiyeriya munlhokoni mwa attu o Israeli.”
Nifungu na Alawi
25Yamalheke, Apwiiya Nlhuku nkayeerelha ashinna Musa wiira, 26“Tho, mwaahimiachereke Alawi malheheriyo anottwara alha. Ikatema vanohalha inyu upochera isadaka ya Apwiiya Nlhuku ukhuma wa attu o Israeli, yuvahilheni Apwiiya Nlhuku ikhalhe phi ittu inyu yo uhiyeriya, nkikumihereke mii Apwiiya Nlhuku nifungu nimoka wo mafungu khumi o isadaka iyo. 27Yelha isadaka inyu ilha, inorumelhelhiya ukhalha thoko milhipu cho choolhia ama thoko izabibu chinokikumihera awe namalhima. 28Paahi, phi chiichammo chinothananiya inyu ukikumihera mii Apwiiya Nlhuku, nifungu nimoka no ukhuma mafungu khumi o isadaka chinopochera inyu ukhuma wa attu o Israeli. Yeyo isadaka iyo inohalha inyu ukikumihera mii Apwiiya Nlhuku iyo, mwaavaheke opochera ishaani Naharuni. 29Ukhuma isadaka chonkhaye chinohalha inyu upochera, mwaakumihereke Apwiiya Nlhuku nifungu nimoka no mafungu khumi o ittu irii yoombone upwaha onkhaye ni irii itakatifu. 30Paahi etu mwaahimerieke attu o Israeli wiira, mwakikumiheraka vakittu voombone upwaha vonkhaye, nifungu nimoka no mafungu khumi, ninookhalha nawinyu, thoko namalhima vanokusha awe mahalhahalha anohalha baada yo ukumiha isadaka yo milhipu cho choolhia ni milhipu cho izabibu. 31Ni inyuva mwaatti nlhieke ikumihiye, kila vakittu variwoothe vari inyu, vamoka ni ashilhoko inyu, ukhalhawaya phi malhivo inyu o nlhatu wo ntheko inyu wo Nihema Nitakatifu. 32Mwalhiaka chechiyo chittu chiyo, khannotteka ittu iriyoothe, yakhalhaka nhokikumihera mii Apwiiya Nlhuku mpatta woombone umpwaha chonkhaye, ukhalhawaya khannonanariha chittu chitakatifu cha attu o Israeli, ni ukhwa.”
The Bible Version in Makua @The Word for The World International and Makua Language translators. All rights reserved.