Waalhakelhiya attu 17
17
Ikopo i Naharuni
1Yamalheke, Apwiiya Nlhuku nkayeerelha ashinna Musa wiira, 2“Mwaahimerie attu o Israeli owiihereni ikopo khumi ni phiilhi, kila nholhelhi o nikosho ikopo imoka. Nlhepeke nchina no kila mmoka aya nkoponi mwawe, 3ni nchina ni Naharuni nilhepiyeke vachulhu ikopo inooniha nikosho no Alawi. Vakhalheke ikopo imoka wo kila nholhelhi o nikosho. 4Nkusheke ikopo chiyo u Nihema Nitakatifu, mweesheke umihoolho wo Nsanduku no Malhehano, vakittu vanokumaana aka mii ni inyuva. 5Ikopo ya ntu kinonthanlha aka inoophuwa. Wo yeyo iphiro iyo, kinoomaalhiha ichuku chinochukulha aya attu o Israeli vachulhu winyu.”
6Paahi, ashinna Musa nkayoolhumana attu o Israeli. Aholhelhi aya onkhaye ahokumiha kila mmoka ikopo awe wo ulhikaana ni nikosho nawe, nkachaakhalha ikopo khumi piilhi. Ni ikopo i Naharuni nkayeeshiya vamoka ni ikopo chikina chiyo. 7Ashinna Musa nkayeesha ikopo chiyo chonkhaye umihoolho wa Apwiiya Nlhuku u Nihema Nitakatifu.
8Waashelhe waya, ashinna Musa ahorwaa u Nihema Nitakatifu. Mwommo ahophwanya ikopo i Naharuni o nikosho ni Nalawi, inaphuwilhe ni uthaphuruwa, inatunve ituva ni uyara maphepu o mwiri wo nlozi, o tokotta. 9Yamalheke, ashinna Musa ahokumiha ikopo chonkhaye umihoolho wa Apwiiya Nlhuku, nkayooniha attu o Israeli onkhaye, ni kila nholhelhi ahokusha ikopo awe. 10Apwiiya Nlhuku nkayeerelha ashinna Musa wiira, “Nhokolhosheke ikopo i Naharuni umihoolho wo Nsanduku no Malhehano. Yeyo inooshungiya vavawo vakittu vawo, ni waamuka amalhaponi alha, wiira yoochelhaka uhiya mwaha wo uchukulhacha, anookhwacha.” 11Paahi ashinna Musa nkayaapanga thoko chaalheheriye aya ni Apwiiya Nlhuku.
12Attu o Israeli nkayeerelha ashinna Musa wiira, “Mwooneke vano. Ninookhwa. Ninoolhakalhihiya. Nihomalha. Onkhaye nihomalha! 13Kila ntu nohalha waatameria Nihema na Apwiiya Nlhuku nookhwa. Chani etu, ninookhwa onkhaye chiicho?”
The Bible Version in Makua @The Word for The World International and Makua Language translators. All rights reserved.