Waalhakelhiya attu 16
16
Ukhota u Nakora, Nadathani ni Naabiramu
1Kaanyuma, Nakora anaaya Naishari, o imbumba i Nakohathi, aakhumme nikosho no Alawi, ahopanga miruku wa ashinna Musa. Nkayaalhutaana ni attu araru akina o nikosho ni Narobeni, Nadathani ni Naabiramu, achishaana a Naeliabu, ni Naoni, anaaya Napelethi. 2Yayo manyaattu onkhaye ayo ahorumelhelhiya ni ahoolhelhi o chuwania 250 yaathanlhiye ni attu o Israeli onkhaye, nkayeemelha ni waakhota ashinna Musa. 3Nkayaakumaana umihoolho wa ashinna Musa ni Naharuni, nkayeeracha, “Inyu mwaatti nhothepiha. Nlhoko wa attu ntakatifu ulha, ni kila ntu munlhokoni ntakatifu mmo, ni Apwiiya Nlhuku arii vamoka ni hii onkhaye. Woonaka vano mwaattiva nneepanga phi manyolhupalhe o nlhoko wa attu a Apwiiya Nlhuku?”
4Ashinna Musa yeeeweke yayo malhove ayo, ahorupa makukhu vathi. 5Yamalheke, nkayeerelha Nakora ni ashulhupalhe yaarina aya vamoka ayo wiira, “Meelho wichishu, Apwiiya Nlhuku anoomwooniha mpani rii awaya, ni mpani rii ntakatifu, ni kila anthanlhe aya ni ummaha nipesha no waatameria madhubahu. 6Paahi etu mpangeke choo, Wichishu meelho, inyuva Nakora vamoka ni attu anourumelhelhani nkushacheke ichetezo, nhelheke makhalha o mooro vachulhu, ni upaha ubani vachulhu waya. 7Yamalhaka, nrweeheke umihoolho wa Apwiiya Nlhuku. Ni vavawo ninoomwona mpani thanlhiye ni Apwiiya Nlhuku. Ukhalhawaya mwaatti Alawi va nhoviraniha!”
8Ashinna Musa nkayaathepa waahimeria Nakora wiira, “Mwiiwelhelheke mwaatti Alawi va. 9Chani nnoona ittu ikani mwaatti uthanlhiya ni Nlhuku o Israeli mmilhokoni mwa attu o Israeli, wiira mwoorie waatameria, nrumiye u Nihemani wa Apwiiya Nlhuku ni uvara ntheko wo waakavihera nlhoko wonkhaye wa attu o Israeli ulha? 10Ahoovahani nipesha no waatameria, mwaattiva vamoka ni Alawi ashikhunaninyu onkhaye. Vano etu nnothanana ukusha ata ntheko wo opochera ishaani? 11Paahi etu, inyuva mwaanene ni nkutiro inyu nnowaathuria Apwiiya Nlhuku. Mwaatti khannochukulha wa Naharuni vekha, nansho wo ikekhiaye nnochukulha wa Nlhuku.”
12Ashinna Musa nkayaaruma nttenga wa Nadathani ni Naabiramu achishaana a Naeliabu wiira yeehaniye, nansho manyaattu ayo nkayaakhota wo wiira, “Khanimmwa. 13Chani, nnona ittu ikani unikumiha Umisri, ilhapo yorera ulhima ni uhuwa mihuwo, wiira mmwe mwaaniiva vauthakoni va? Tho, nneepanga phi mulhupalhe ihu. 14Uthepa yayo, khanniwihilhe ilhapo yorera ulhima ni uhuwa mihuwo, mena univaha imata cho zabibu chihiyeriye ihu. Chani nnaapanga attu alha wiira khanoona? Khanimmwa.”
15Ashinna Musa nkayaathunalha chinene, nkayeerelha Apwiiya Nlhuku “Nhipochere isadaka cha alha attu alha. Mii akikunshe iphuta ya ntu riyoothe, mena akinttekenlhe ntu.”
16Yamalheke, ashinna Musa nkayeerelha Nakora, “Meelho nhilhiyalhe uwa vamoka ni attu inyu umihoolho wa Apwiiya Nlhuku. Naharuni ni ayo anookhalha. 17Kila mmoka inyu akusheke ichetezo awe, ni uhelha ubani. Yamalhaka, arweeheke umihoolho wa Apwiiya Nlhuku, ni chonkhaye chikhalheke ichetezo imia piilhi ni makhumi nthanu. Inyuva ni Naharuni, kila mmoka inyu akhalheke ni ichetezo awe.”
18Paahi kila mmoka aya ahokusha ichetezo awe, nkayaahelha makhalha o mooro ni ubani, yamalheke nkayaarwa ni weemelha vanlhakoni wo Nihema Nitakatifu, vamoka ni ashinna Musa ni Naharuni. 19Nakora nkayaathothokaniha attu onkhaye vamoka, nkayeemelhacha umihoolho wa ashinna Musa ni Naharuni yaari unlhakoni wo Nihema Nitakatifu. Phi vavawo nchakarimia na Apwiiya Nlhuku vaakhumenlhe aya attu onkhaye. 20Vavawo Apwiiya Nlhuku nkayeerelha ashinna Musa ni Naharuni wiira, 21“Nkhalheke uchereshere wa attu alha, kaarimelhihe naanano va.”
22Nansho ashinna Musa ni Naharuni nkayeewulhushacha vathi makukhu ni wiira, “Inyuva Apwiiya Nlhuku, Nlhuku novaha ukumi wo chittu chonkhaye. Chani, ntu mmoka oottekelhakani, nnowaathunalhelha attu onkhaye?” 23Apwiiya Nlhuku nkayeerelha ashinna Musa, 24“Mwaahimerieke attu wiira athamache ahonkome vakhiviru mahema a Nakora, a Nadathani ni a Naabiramu.”
25Paahi ashinna Musa nkayaarwa u Nadathani ni Naabiramu, attwariyaka utulhi ni ashulhupalhe a attu o Israeli. 26Vaaphilhe aya nkayeerelha attu wiira, “Chonte nthamacheke u mahemani wa attu o uwonya alha, ni mena nhikwakwanye ittu aya iriyoothe, nhiwe mwaarimelhihiya vamoka ni ayo, wo nlhatu no uwonya waya wonkhaye.” 27Paahi attu nkayaathama mwaakhalhacha aya Nakora, Nadathani ni Naabiramu.
Nadathani ni Naabiramu nkayaathama umahemani mwaya ni weemelha unlhakoni aattukanaka ni manyaahanu aya ni achishaana aya onkhaye ata achishaana o waamwa alhe. 28Vavawo ashinna Musa nkayeerelha attu, “Vano phi nohalha inyu uchuwelha wiira Apwiiya Nlhuku phi akirumilhe upanga chittu chonkhaye chilha, mena kuhiwe wo uttuna waka kimwanene. 29Yakhalhaka alha attu alha anookhwacha nookhwa o kawaida, ama yapattaka itatako thoko attu akina, paahi nchuwelheke wiira Apwiiya Nlhuku khakirumilhe. 30Nansho Apwiiya Nlhuku apangaka ittu ihinapacha ukhumelhelha, ilhapo yapatakulhiyaka ni waamiria yalha attu alha vamoka ni kila ittu aya, nkayaarwaa unaminepa, anari akumi, paahi nchuwelheke wiira yalha attu alha ahaapangelha Apwiiya Nlhuku ittu yo uhilhoka.”
31Vaamalhinhe aya wuulhumaha yayo malhove yonkhaye ayo tu, ilhapo, vakittu vaari aya Nadathani ni Naabiramu yahopatakhulhia, 32ni waamiria yayo attu ayo, ashilhoko aya, vamoka ni attu onkhaye yaarumelhelha Nakora ni mihakhu chaya chonkhaye. 33Paahi yayo, vamoka ni chittu chonkhaye chaarina aya chiyo, nkayaakhuruwa unaminepa anari akumi. Ilhapo nkayaakhunelha, onkhaye nkayaathama. 34Attu onkhaye yaari vakhiviru veewilhe aya attu onlhachaka, ahottawacha yeeraka, “Ngwe nittawe mwaatti, ilhapo ihiwe yaanimiria ni hii chiicho.”
35Yamalheke, Apwiiya Nlhuku ahokurusha mooro nkawaarimelhiha attu imia piilhi ni makhumi nthanu yaarwelhe ututumihani ubani u Nihema Nitakatifu alhe.
Ittu yaapangelhiye ichetezo
36Baada yo yayo, Apwiiya Nlhuku nkayeerelha ashinna Musa wiira, 37“Mweerelheke Naeliazari anaaya opochera ishaani Naharuni akumihe ichetezo chiyo vamooroni, arihelheke utayi mooro urii nhina, ukhalhawaya ichetezo chiyo chitakatifu. 38Chihokhalha chitakatifu ukhalhawaya attu alha ahowiiha umadhubahuni va Apwiiya Nlhuku. Paahi nkusheke ichetezo cha attu eeviye wo nlhatu wo uwonya waya ayo, chihaniye chikhalhe cho uvevialha wiira chikhalhe ikifuniko yo ukhuneelha madhubahu. Yeyo inookhalha naamuko no waamuka attu o Israeli onkhaye.”
39Paahi opochera ishaani Naeliazari, ahokusha ichetezo cho ishaaba chawiihiye umihoolho wa Apwiiya Nlhuku ni alhe attu arimelhihiye chiyo, nkachaahaniya ukhalha ikifuniko yo urukurerihiya madhubahu. 40Nenno nahokhalha naamuko no waamuka attu o Israeli wiira, ntu riyoothe hirii opochera ishaani, yaani ahirii o nihimo ni Naharuni ahirwee umadhubahuni ututumiha ubani wa Apwiiya Nlhuku. Eeraka chiicho, noorimelhihiya thoko Nakora ni attu aya. Yayo onkhaye ayo yaapangelhe thoko Apwiiya Nlhuku chaalhehenre aya Naeliazari, wo iphiro ya ashinna Musa.
Naharuni anowookholha attu
41Waashelhe waya, attu o Israeli onkhaye yahochukulha wa ashinna Musa ni Naharuni yeeraka, “Nheevakacha attu a Apwiiya Nlhuku.”
42Nansho vaakumanne aya umihoolho wa ashinna Musa ni Naharuni wiira yuulhumache malhove ayo, yahorukunuwa awehaka Nihema Nitakatifu, nkayoona wiira nihute nihokhuneelha nihema, ni nchakarimia na Apwiiya Nlhuku waari unakhumelhenlhe vavawo. 43Ashinna Musa ni Naharuni nkayaarwaa, nkayeemelha umihoolho wo Nihema Nitakatifu, 44ni Apwiiya Nlhuku nkayeerelha ashinna Musa wiira, 45“Nkhalheke utayi, nhaatamerie yayo attu ayo, kaarimelhihe wo nkwaha mmoka.”
Nansho ashinna Musa ni Naharuni nkayaarupa makukhu. 46Ashinna Musa nkayeerelha Naharuni, “Nkusheke ichetezo inyu, nhelhe mooro ni weesha vathotho wo madhubahu, mwamalhihaka, nhelheke ubani, nrwaaneke wo waakuvia wa attu ni waapangelha ittu yo waathaniha ni Apwiiya Nlhuku. Mwaakuvieke, urushiya wa Apwiiya Nlhuku uhomalha waaphiyelha, ni mariro ahochokholha waakhuruwelha.” 47Paahi, Naharuni nkayaapanga thoko chaahimeriye aya ni ashinna Musa. Nkayaakusha ichetezo aya ni uttimakacha mpaka variyari wa attu yaathothokanne vamoka ayo. Voonilhe aya wiira mariro ahochokholha, ahohelha ubani nchetezoni ni waapangelha attu ittu yo waathaniha ni Apwiiya Nlhuku. 48Vaapannge aya chiicho, mariro ayo ahotondova, ni ayo nkayaahalha variyari va attu yaarimenlhe ni ahanlhe akumi alhe. 49Attu yaarimelhe wo yayo mariro ayo yaari 14,700, wo uhaalhakelha alhe arimenlhe wo nlhatu no waarumelhelha Nakora alhe. 50Mariro ayo vaamanlhe aya, Naharuni ahohokolhia wa ashinna Musa unlhakoni wo Nihema Nitakatifu.
The Bible Version in Makua @The Word for The World International and Makua Language translators. All rights reserved.