Waalhakelhiya attu 15
15
Malhehero anaacha isadaka
1Yamalheke, Apwiiya Nlhuku nkayeerelha ashinna Musa wiira, 2“Mwaahimerieke attu o Israeli wiira, vanohalha inyu uphiya ilhapo inouvahaakani, inohalha inyu ukhalha, 3mwakikumihereke mii Apwiiya Nlhuku isadaka ukhuma mmihuwoni mwinyu, isadaka yo ulhapelhelhiya ama isadaka yo upahiya vamooroni, wiira ntu athaphulhe ishaani ittukilhe awe ama ukumiha isadaka yo uttuna wawe, ama isadaka yo isikukuu chinyu cheeshiye, ni unukhelha nihiriri noombone no ukichivelha mii Apwiiya Nlhuku, 4paahi yoyo ntu nokumiha isadaka awe uyo, aawiihereke tho Apwiiya Nlhuku isadaka yo ikilo imoka yo iphepa yo ushilhia ikatahunyiye ni uthakanihiya ni ilita imoka yo makhura, 5vamoka ni idivai yo isadaka yo uwuriya, ilita imoka. Chittu chiyo chilhutaaneke ni kila mwannama o isadaka yo upahiya, ikhondoro ama ipuri. 6Ikatema yo ukumiha isadaka yo ikhondoro ilhopwana, ikilo piilhi cho iphepa ikatahunyiye ni ilita imoka ni nusu yo makhura, chikumihiyeke ukhalha isadaka yo choolhia, 7vamoka ni isadaka yo uwuriya, idivai ilita imoka ni nusu, inohalha unukhelha nihiriri nomboone no isadaka inokichivelha mii Apwiiya Nlhuku. 8Ikatema vanohalha inyu waakumihera isadaka Apwiiya Nlhuku, n'dume no ing'ope no isadaka yo urimelhihiya ama yo upahiya vamooroni, wiira nthaphulhe ishaani, ama wo nlhatu no isadaka cho uwiiha mpuha, 9ntu akumiheke ukhalha isadaka vamoka ni isadaka yo iphepa yo ushilhia ikilo ttaru ni ilita piilhi cho makhura, 10vamoka ni isadaka yo uwuriya ilita piilhi cho idivai, inohalha unukhelha nihiriri noombone no isadaka inokichivelha mii Apwiiya Nlhuku.
11“Chechiyo phi chittu chinohalha ukumihiya vamoka ni kila n'dume no ing'ope, ikhondoro ilhopwana, ama nibeberu no ipuri. 12Ihesabu yo chittu chiyo yonchererieke wo ulhikaana ni ihesabu ya ashinama anokumihiya. 13Kila nnenchi o Israeli attwareke alha malheheriyo alha ikatema vanokumiha awe isadaka yo ulhapelhiya, yo nihiriri noonukhelha ninokichivelha mii Apwiiya Nlhuku. 14Ni yakhalhaka haawo nlheto nokhalha vamoka ni inyuva wo ikatema ikani ama mahuku o uhimalha, athananaka ukumiha isadaka awe yo upahiya vamooroni, yo nihiriri no nukhelha ninokichivelha mii Apwiiya Nlhuku, yoyo ntu uyo apangeke thoko chinopanga inyu mwattiva. 15Ni wo iyari yonkhaye chinowa, chittwareke alha malheheriyo alha, anottwara inyu mwaatti, ni phi ayo anothananiya awe uttwara nlheto riyoothe nohalha ukhalha vamoka ni inyu, vavawo nnookhalha rata umihoolho wa Apwiiya Nlhuku. 16Mwaatti ni yoyo nnookhalha ntawariyaka ni malhehero yayo mamoka iyo ni malheheriyo yayoyayo.”
17Tho, Apwiiya Nlhuku nkayeerelha ashinna Musa wiira, 18“Mwaahimerie attu o Israeli wiira, ikatema vanokelha aya ilhapo kinaarweha aka, 19kila vanohalha inyu ulhia choolhia cho yeyo ilhapo iyo, mmweeke mweesha mpatta vakani ni ukivaha mii Apwiiya Nlhuku. 20Vanohalha inyu waapia mikatte, nkatte wo upacha wo milhipu cho choolhia chinyu, ukumihiyeke ukhalha isadaka yo ukhuma vakittu vaneepettelhiya choolhia. 21Nkikumihereke mii Apwiiya Nlhuku ilha isadaka yo vekha aya ilha, mu iyari chinyu chonkhaye chinowa.
22“Nansho yakhalhaka nnowoochelha uttwara malheheriyo onkhaye akumihilhe aka mii Apwiiya Nlhuku, wo iphiro ya ashinna Musa, 23ni yakhalhaka mahuku anowa, attu khanottwaracha alha onkhaye mii Apwiiya Nlhuku kinaalhehera aka ashinna Musa alha, 24paahi, yakhalhaka uwonya uwo upangiye wo uhilhakelhiya, wo uhichuwelhiya ni attu o Israeli onkhaye, nlhoko wonkhaye etu ukumiheke n'dume no ing'ope nimoka nikaani ukhalha isadaka yo upahiya vamooroni, yo nihiriri no unukhelha ninokichivelha mii Apwiiya Nlhuku, vamoka ni isadaka aya yo choolhia ni idivai wo uttwarana ni malheheriyo aya. Thothoni tho, attu akumiheke nibeberu nimoka ukhalha isadaka yo ulhevelhelhiya uwonya. 25Opochera ishaani apangeke ittu yo waathaniha, wiira wa Apwiiya Nlhuku, wo nlhatu no nlhoko wonkhaye wa attu o Israeli, ni ayo anoohiyereriya, ukhalhawaya khawonyilhe wo ulhakelha. Ni ahowiiha isadaka aya, isadaka yo upahiya vamooroni uwannyaka mii Apwiiya Nlhuku, ukhalha isadaka yo ulhapelhiya, ni yo ulhevelhelhiya uwonya, wo nlhatu no uwonya uwonyilhe aya. 26Nlhoko wonkhaye wa attu o Israeli, vamoka ni alheto anaakhalhana aya, anoohiyereriya ukhalhawaya onkhaye ahowonya wo uhichuwelha.
27“Ntu mmoka awonyaka wo uhichuwelha, akumiheke ipuri ithiyana yo iyaakha imoka, imoka ukhalha isadaka yo ulhevelhelhiya uwonya. 28Opochera ishaani apangeke ittu yo waathaniha umihoolho waka mii Apwiiya Nlhuku, wiira akihokolhelhe, wo nlhatu no yoyo ntu o uwonya wo uhilhakelha uyo, ni uyo noohiyereriya. 29Nvarechesheke malhehero aka alha, kila ntu nohalha uwonya wo uhilhakelha, akhalhe nnenchi ntu o Israeli ama nlheto nnonkhalhana inyu vamoka.
30“Nansho ntu riyoothe nowonya wo ulhakelha, ikhalhe nnenchi ama nlheto, nohalha ukhalha thoko nokithweelhiha mii Apwiiya Nlhuku, yoyo eeviyeke munlhokoni mwa attu awe. 31Ukhalhawaya hokhota alha malhove ahimmie aka mii Apwiiya Nlhuku alha, ni wuntha nimoka no malhehero aya. Yoyo ntu uyo eeviyeke, ni nlhatu wo ukhwa wawe ukhalheke wawawe mwanene.”
Milhatu cho uhiya uvarechesha Nihuku no Wiittuwa
32Nihuku nimoka, ikatema attu o Israeli varii aya uthakoni, yahomwoona ntu mmoka alhokottaka ikhuni Nihuku no Wiittuwa. 33Paahi yoyo ntu uyo ahorweehiya umihoolho wa ashinna Musa, u Naharuni ni nlhoko wonkhaye. 34Yayo nkayanttuka, ukhalhawaya waari ihinaya uhimiya iphiro yo upanga wa ntu nopanga thoko chiicho. 35Phi vavawo Apwiiya Nlhuku veerenlhe aya ashinna Musa wiira, “Yoyo ntu uyo eeviyeke, nlhoko wonkhaye wa attu o Israeli umwaateke malhuku uchereshere nipuro uwo.” 36Paahi attu nkayaanthamiha yoyo ntu uyo mpaka uchereshere nipuro, nkayaamwata malhuku mpaka ukhwa, thoko Apwiiya Nlhuku chaalhehenre aya ashinna Musa.
Malhuto o mmiinanoni mwo ikuwo
37Yamalheke, Apwiiya Nlhuku nkayeerelha ashinna Musa wiira, 38“Mwaahimerieke attu o Israeli, ni waalhehera wiira attaveke malhuto mmiinanoni mwo ikuwo chaya, ni utottelha nttoche no kibuluu vachulhu wo kila nlhuto. Mwaahimerieke wiira, apangacheke chiicho wo iyari chaya chonkhaye chinowa. 39Yayo malhuto ayo, akhalheke nuupusho uwannyu. Kila vanohalha inyu woona, mmweeke mwoopuwelha malhehero aka onkhaye ni uttwara, wiira nhiwe mwaattwara makakata inyu mwaashinene, ni alhe nnona inyu wo miitho inyu mwaashinene. 40Yayo malhuto ayo anowuupushani malhehero aka onkhaye, ni inyu nvarechesheke chinene, ni inyu nnookhalhacha attu aka atakatifu. 41Mii phi Apwiiya Nlhuku, Nlhuku inyu, kuuthamihilheni ukhuma ilhapo yo Umisri wiira kikhalhe Nlhuku inyu. Mii phi Apwiiya Nlhuku, Nlhuku inyu.”
The Bible Version in Makua @The Word for The World International and Makua Language translators. All rights reserved.