Waalhakelhiya attu 14
14
Attu o Israeli anowunlhacha tho
1Attu onkhaye o Israeli yahokurusha ikutto yulhupalhe, attu nkayonlha yoyo uhiyu uyo. 2Nkayaachukulhacha wa ashinna Musa ni Naharuni yeerachaka wiira, “Nambaya nkanihilhe nikhwelhe Umisri ulhe. Nambaya nikakhwenlhe vava va uthakoni va. 3Wo nlhatuni Apwiiya Nlhuku anonirweeha yeyo ilhapo iyo? Ninokowiiviya ukhotoni, ni ahanu ihu ni achishaana ihu anokoovariya ni ukushiya mateeka. Nambaya ngati nihokolhie Umisri?” 4Paahi nkayaachokholha wiirelhanacha ashineneru, “Ninthanlheke nholhelhi nkina, nihokolhie Umisri.”
5Vavawo ashinna Musa ni Naharuni nkayaawulhuwa makukhu umihoolho wa attu onkhaye o Israeli. 6Nayoshua anaaya Nanuni, ni Nakalebu, anaaya Nayefune, yaari ni ayo mmilhokoni mwa attu yaarwelhe uhotelhani yeyo ilhapo iyo alhe, ahorushachiya chinene, nkayaahulhacha ikuwo chaya 7ni weerelha attu onkhaye o Israeli wiira, “Ilhapo yaarwelhe ihu uhotelhani iyo, yorera vo ushangiha. 8Yakhalhaka Apwiiya Nlhuku ahonittuna hii, anoonirweha wowo ni univaha ilhapo yorera ulhima ni uhuwa mihuwo iyo. 9Nansho nihaawonye Apwiiya Nlhuku, mena nhoovache ayari o yeyo ilhapo iyo. Ukhalhawaya yayo khave ittu uwanihu, waakihiya waya uhothamihiya, Apwiiya Nlhuku arii vamoka ni hii, nhoovache mena.” 10Nansho attu onkhaye nkayoopopiha Nayoshua ni Nakalebu wiira anowaatiya malhuku. Wo uhipicha, nchakarimia na Apwiiya Nlhuku wahokumelhelha vachulhu vo Nihema Nitakatifu, umihoolho wa attu o Israeli onkhaye.
Ashinna Musa anowalhapelhelha attu
11Yamalhekeru, Apwiiya Nlhuku nkayeerelha ashinna Musa wiira, “Chani alha attu alha khanokihelhelha mpaka iyaakhani? Ni mpaka yaakhani vanohalha aya ukiiwelhelha, ata vamoka ni cho ushangiha chonkhaye chinopanga aka munlhokoni mwaya? 12Paahi etu, kinowaawiihera mareta ni waahiya attwaruwe, nansho wo nlhatu winyu inyuva, kinoopanga ilhapo ikina yulhupalhe, yo machiri waapwaha yayo.”
13Nansho ashinna Musa nkayeerelha Apwiiya Nlhuku wiira, “Mwahaathamiha yalha attu alha mwiilhaponi Umisri wo machiri inyu. Amisri vanohalha aya wiiwa wiira nhaapangelha chiicho attu inyu, 14anowaahimeria attu o ilhapo ilha. Ukhalhawaya attu o ilha ilhapo ilha aheewa wiira inyuva, inyu Apwiiya Nlhuku nri vamoka ni hii, ukhalhawaya inyuva Apwiiya Nlhuku nnowoonia mwaari, nihute ninyu neemelhaka vachulhu ihu, ni wiira inyuva nnooniholhelha uthana wo nipoto no nihute, ni uhiyu wo nipoto no mooro. 15Paahi etu vano, mweevakachaka attu inyu onkhaye wo nkwaha mmoka, ilhapo chiiwilhe ipilhi inyu chinowiiracha, 16‘Apwiiya Nlhuku aheevakacha attu aya uthakoni wo nlhatu no woochelha waarweha ilhapo yaalhehilhe aya waavaha.’
17“Paahi vano, kinoulhepelhani, inyu Apwiiya Nlhuku, nnoonihe machiri inyu wo upanga thoko chinilhehilhe inyu, venre inyu, 18‘Mii phi Apwiiya Nlhuku, o uhaakuvia uthunalha, o ikiriri chinene, o uhiyerera uwonya ni chittu cho uhilhoka. Nansho wo chonkhaye chilhe akinohiya mena untwarusha ntu notteka, kuhii achishaana ni ashichulhu aya vekha, nansho ata iyari yo neraru ni yo necheshe wo uwonya wa manyanaangoro aya.’ 19Kinoulhepelhani wiira, mwaahiyerere yalha attu alha uwonya waya, wo ikiriri inyu yinchi, thoko chaahiyerenre inyu toka vaathamilhe aya Umisri mpaka vano.”
20Apwiiya Nlhuku nkayaakhulha yeeraka, “Kihaahiyerera thoko chilhapenlhe inyu. 21Nansho wo ikekhiaye, thoko chinokhalha aka, ni thoko ilhapo chinohalha aya uchara nchakarimia naka, 22khaawo ata mmoka aya panche woona nchakarimia naka ni cho ushangiha chaka, chipangilhe aka Umisri ni uthakoni, nkaathepa ukilhikacha mikwaha chonkhaye chilha, wo uhiiwelhelha nlhove naka, 23nohalha woona ilhapo kilhupenlhe aka waavaha manyaapwiya aya. Ata ni ayo ahinokihelhelha ayo, khanowa mena yoona. 24Nansho ukhalhawaya karumiya aka, Kalebu, homwalhaana ni ayo, hokirumelhelha wo ukittuna, kinompiiha urii ilhapo ikenlhe awe, ni achishaana awe inokhalha yawaya. 25Ukhalhawaya Aamaleki ni attu o Ukanaani anokhalhacha mmatimbeni mwo ilhapo iyo, meelho nrukunuweke utulhi nrwaacheke uthakoni unolhukama ibahari yo Shamu.”
26Yamalheke, Apwiiya Nlhuku nkayaakoha ashinna Musa ni Naharuni wiira, 27“Yolha nkutiro wa attu o uwonya ulha unohalha ukichukulhelha mpaka iyaakhani? Kihoochaa malhove a attu o Israeli anokichukulha aya alha. 28Vanova mwaakhulheke wiira, ‘Thoko chinokhalha aka, kineera mii Apwiiya Nlhuku, kinoupangelhani yaalhe kiiwilhe aka muulhumachaka alhe. 29Nnookhwacha ni iruttu chinyu chinorihiya mwomumwomu muuthakoni mu, ukhalhawaya nhochukulhacha wo uthepa ukaacha mii. Paahi etu, khaawo ata mmoka inyu ri o malhipa o uchokholha iyaakha makumi meelhi ni uthepa, 30nohalha ukelha ilhapo kilhupenlhe aka uvahani ikhalhe yawinyu mmwo, yaahikhalhe Nakalebu anaaya Nayefune, ni Nayoshua anaaya Nanuni. 31Inyuva mwaatti mwahohimia wiira achishaana inyu anoovariya mateeka, nansho mii kinowaapiiha achishaana inyu urii ilhapo inyoholhanche inyu, wiira achuwelhe ni ikhalhe phi mapuro aya. 32Nansho inyuva, nnokhwelha mwomumwomu muuthakoni mu! 33Achishaana inyu anookukuriacha ni uhuva mwomu muuthakoni mu, iyaakha makumi ncheshe, wo uwonya winyu wo uhiya upisha nrima, mpaka ntu inyu o umalhelha vanohalha awe ukhwelha mu uthakoni mu. 34Wo nlhatu no uwonya winyu, nnootwarushiya iyaakha makhumi ncheshe, wo ulhikaana ni mahuku makhumi ncheshe aahotenlhe inyu ilhapo ilhe, iyaakha imoka wo kila nihuku nimoka, vavawo nnoochuwelha chinre aka wo uvengana ni inyu.’ 35Mii Apwiiya Nlhuku kiheera. Wo ikekhiaye, kinoupangelhani chiicho inyu onkhaye nkumanne va ukikhota. Onkhaye anoomalhelha mwomu muuthakoni mu, anohalha ukhwelha momu.”
36Attu aarumiye ni ashinna Musa urwaa uhotelhani ilhapo, nkayaahokolhia ni woopopiha attu, ni waahelha ichuku wa Apwiiya Nlhuku wo uhimiacha chittu cho uhilhoka alhe, 37mwaha waacha uhilhoka wo yeyo ilhapo iyo, yahokhwaacha wo mareta molhupalhe umihoolho wa Apwiiya Nlhuku. 38Nansho Nayoshua anaaya Nanuni, ni Nakalebu anaaya Nayefune, yahohalha akumi, mmilhokoni mwa attu yaarwelhe uhotelhani yeyo ilhapo iyo alhe.
Ulhikachiya ukelhelha ilhapo wo upachera
(Itor1:41-46)
39Ni ashinna Musa vaahimianche aya yayo malhove ayo, attu o Israeli onkhaye ahonlhacha wo uweria chinene. 40Waashelhe waya, nkayonkwacha mapikoosha nkayarwaa vakittu umiakoni, nkayeera, “Ninoorumelhelha wiira nahowonya. Vano nirii tayari urwaa vakittu Apwiiya Nlhuku unonivaha aya.”
41Nansho ashinna Musa nkayeera wiira, “Woonaka vano nnoohiya malhehero a Apwiiya Nlhuku? Vavawo khannophura ittu. 42Nhirwee wowo umiakoni uwo nhiwe mwaatakachiya ni amalhaponi inyu, ukhalhawaya Apwiiya Nlhuku kharii vamoka ni inyu. 43Mwaatakanaka Aamaleki ni Akanaani, nnokokhwelha ukhotoni uwo, ukhalhawaya nhohiya waattwara Apwiiya Nlhuku, ni ayo khanokhalha vamoka ni inyu mwaatti.”
44Anoolhumachaka chiicho etu, attu ayo ahominda wiira arwee uchulhu umiakoni, inakhalhaka Nsanduku no Malhehano na Apwiiya Nlhuku, mena ashinna Musa kaathamilhe vanipuroni valhe. 45Phi vavawo Aamaleki ni Akanaani, yaakhalha ilhapo umiakoni ayo, vaakhuruwilhe aya, nkayaatakacha ni waakottolha attu o Israeli. Nkayoomolhachiya mpaka iwani yo Uhorma.
The Bible Version in Makua @The Word for The World International and Makua Language translators. All rights reserved.