Waalhakelhiya attu 13
13
Attu o uhotelha anoorumiya Ukanaani
(Itor1:19-33)
1Yamalheke, Apwiiya Nlhuku nkayeerelha ashinna Musa wiira, 2“Mwaarumeke attu arwee ahotelhe ilhapo yo Ukanaani inohalha aka waavaha attu o Israeli. Munrumeke ntu mmoka ukhuma kila nikosho no attu o Israeli, ni yoyo ntu uyo akhalheke nholhelhi o nikosho nawe.”
3Paahi wo ulhikaana ni malhehero a Apwiiya Nlhuku, ashinna Musa yahaaruma attu ukhuma uthako wo Uparani. Attu onkhaye yaarumiye yaari ahoolhelhi o makosho makosho o attu o Israeli. 4Ni alha anottwara alha phi nlhoko wo machina o yayo attu ayo. Ukhuma nikosho ni Narobeni, aari Nashamua anaaya Nazakuri.
5Nikosho ni Nasimioni, aari Nashafati anaaya Nahori.
6Nikosho ni Nayuda, aari Nakalebu anaaya Nayefune.
7Nikosho ni Naisakari, aari Naigali anaaya Nayusufu.
8Nikosho ni Naefraimu, aari Nahoshea anaaya Nanuni.
9Nikosho ni Nabenyamini, aari Napaliti anaaya Narafu.
10Nikosho ni Nazabuloni, aari Nagadieli anaaya Nasodi.
11Nikosho ni Namanase yaani nikosho ni Nayusufu, aari Nagadi anaaya Nasusi.
12Nikosho ni Nadani, aari Naamieli anaaya Nagemali.
13Nikosho ni Naasheri, aari Nasethuri anaaya Namikaeli.
14Nikosho ni Naftali, aari Nanabi anaaya Nawofsi.
15Nikosho ni Nagadi, aari Nageueli anaaya Namaki.
16Alha phi ayo machina a attu aarumiye ni ashinna Musa urwaa uhotelhani ilhapo yo Ukanaani. Ni ashinna Musa ahaavaha Nahoshea anaaya Nanuni nchina no naanano, nkeehaniya Yoshua.
17Vaarumilhe aya urwaa uhotelhani ilhapo yo Ukanaani vawo, ashinna Musa yeerenlhe wiira, “Nrwaacheke uchulhu ulhe, ilhapo yo mpata wo uchawa, mpaka uri miako. 18Mwahotelheke mwoone chiri aya yeyo ilhapo iyo. Mwaweheke chiicho yakhalhaka attu anokhalha mwommo ayo o machiri ama o uhupeeriacha, ari enchi ama ari vakani. 19Nhotelheke wiira ilhapo iyo yorera ama kihena yorera, ni iwani chaya chinokhalha aya chiri chani, mapuro ama inupa chirukureriye ni ningome ama kuhiwe. 20Mwawehaweheke chiicho wiira, ilhapo inene iyo yo nhakhu ama khuuwo nhakhu, chihaawo ithuphi ama khachiwo. Mwakhalheke attu o nrima wo wiishamiri ni ikatema vanohokolhia inyu nkushacheke maphepu o yeyo ilhapo iyo.” Vavawo waari nlhalha, izabibu, vaachokholha aya utokotta. 21Paahi, yayo attu ayo ahorwaa ni uhotelha ilhapo toka uthako wo Usinai mpaka Urehobu, vakhiviru ni iphiro yo ukelhelha Uhamathi. 22Nkayarwaa mpaka mpata wo uchawa wo Ukanaani, nkayaavira mpaka ilhapo yo Uhebroni. Mwommo yahaapwanya attu o makosho a Aahimani, Asheshai ni Atalmai, ayari a Naanaki. Ilhapo yo Uhebroni yaathekiye iyaakha saba ihinaya uthekiya iwani yo Usoani, irii ilhapo yo Umisri. 23Vaaphilhe aya ntette no Ueshkoli, yayo attu ayo ahotupulha ikhuche yo izabibu yeemilhe chinene, ni iyo nkayaakushiya ni attu eelhi nsegasega. Tho, ahokushacha makomamanga vakani ni itini. 24Vavawo vakittu vawo veehaniya Ntimbe no Ueshkoli, maana aya “Ntette no ikhuche.” Wo nlhatu no ikhuche yaatupunlhe aya attu o Israeli ukhuma vavawo vakittu vawo.
25Amalhiheke uhotelha yeyo ilhapo iyo wo mahuku makhumi ncheshe, yayo attu ayo ahohokholhiacha. 26Nkayaarwaa wa ashinna Musa, u Naharuni ni nlhoko wa attu o Israeli, wowo Ukadeshi uwo, uthako wo Uparani. Nkayaahimiacha chittu choonilhe aya ni wooniha maphepu o yeyo ilhapo iyo. 27Nkayeerelha ashinna Musa wiira, “Nahophiya ilhapo mwaanirumilhe inyu wiira nirwee nahotelhe. Yeyo phi ilhapo iyo inoolhoka ulhima ni uhuwa mihuwo, ni nna phi niphepu naya. 28Nansho anenchi o wowo ayo, attu o machiri chinene, ni iwani chaya cho machiri ni cho wunnuwa chinene. Wo uthepa vavawo, wowo nahoona attu o iyari i Naanaki, manyanttu olhupalhe. 29Aamaleki anokalha ilhapo yo mpata wo uchawa, Ahiti, Ayebusi ni attu o Uamori anokhalhacha umiakoni. Ni tho, nahoona attu o Ukanaani anokalha vakhiviru ni ibahari yo Mediteraniya ni vakhiviru ni wo mwoolhoko wo Uyordani.”
30Nansho Nakalebu ahaamaalhiha attu umihoolho wa ashinna Musa, nkayeera, “Nihipiche, ngwee, nirwee nakhalhe yeyo ilhapo iyo. Ukhalhawaya nihanaa machiri menchi o waapwaha.” 31Nansho attu yaattukanne aya uhotelhani yeyo ilhapo iyo yaheera wiira, “Khaninoria waatakana ni yayo attu ayo, ukhalhawaya yayo manyaattu ayo o machiri unipwaha hii.” 32Paahi etu, nkayaawanelhiha chittu cho woothacha mmilhokoni mwa attu o Israeli chinaacha ilhapo yaarwelhe aya uhotelhani yeeraka wiira, “Yeyo ilhapo iyo inowevakacha attu aya. Tho, attu onkhaye nonilhe ihu wowo ayo, olhupalhe chinene. 33Nahoona amanyanttu olhupalhe wowo, ayari a Naanaki. Hii neechona thoko ichorope umihoolho waya, phi chiichammo chaanoona aya ni hii.”
The Bible Version in Makua @The Word for The World International and Makua Language translators. All rights reserved.