Waalhakelhiya attu 12
12
Namiriamu ni Naharuni anoochukulhacha wa ashinna Musa
1Yamalhekeru, Namiriamu ni Naharuni yahopachera woolhumelha malhove o uhilhoka ashinna Musa, wo nlhatu no unthelha nthiyana o Ukushi. 2Nkayeeracha, “Chani, Apwiiya Nlhuku anoolhumana ni waalhehera ashinna Musa vekha aya? Chani, khanooria unuulhumana ni hii?” Apwiiya Nlhuku nkayeewa yayo malhove ayo.
3Ashinna Musa aari ntu o makhalhelho oombone waapwaha attu akina onkhaye yaari velhaponi va. 4Paahi, wo uhipicha, Apwiiya Nlhuku nkayeerelha ashinna Musa ni Naharuni ni Namiriamu wiira, “Mmwaacheke u Nihema Nitakatifu mwaatti attu araru va.” Paahi onkhaye araru ahorwaa u Nihemani uwo.
5Vavawo Apwiiya Nlhuku ahokhuruwa nnipotoni mwo nihute, nkayeemelha vanlhakoni vo Nihema Nitakatifu, nkayeehana Naharuni ni Namiriamu. Oyeelhi onkhaye, nkayaachusha umihoolho. 6Yamalheke, Apwiiya Nlhuku nkayeerelhacha,
“Mwiiwelhelheke malhove aka.
Akhalhaka haawo namilhohi munlhokoni mwinyu,
Mii Apwiiya Nlhuku kinowiipatakulha uwannyawe ntorani,
Kinomuulhumana nkhoveni.
7Nansho inomwaacha karumiya aka Musa, inokhalha yo vekha aya chinene.
Yoyo kinonkhulhuvelha, ni kihommaha ntheko wo waashunga attu aka, Aisraeli onkhaye alha.
8Mii kinomulhumana wo woonana.
Mwaari wo uhuulhumacha wo malhikanihero.
Yoyo nookoona chiriaka, mii Apwiiya Nlhuku.
Chani woonaka mwaatti etu, khannoova,
nnoria chani umuulhumachera malhove o uhilhoka karumiya aka, Musa?”
9Vavawo Apwiiya Nlhuku ahorushiya, yamalheke ahothama, nkaarwaa. 10Nihute nathameke vachulhu Nihema Nitakatifu vawo, Namiriamu nkayoonia anakelhiye ni makutulha, o mavaathelha o teelha chinene. Naharuni arukunuweke ni waaweha Namiriamu, ahoomiya uwanoni, woona wiira Namiriamu ahokelhiya ni makutulha. 11Vavawo Naharuni nkayeerelha ashinna Musa wiira, “Inyu munna, nhinitwarushe, wo nlhatu no uwonya wo uwulhumelhani malhove o uhilhoka. 12Nhaahiye Namiriamu akhalhe thoko mwaana yarelhe nakhwilhe, ukhalhawaya kharibu nusu yo iruttu aya ihonta.” 13Paahi, ashinna Musa nkayonlhelha Apwiiya Nlhuku yeeraka, “Kinoulhapelhani, shonte Apwiiya Nlhuku, mwaalhamihe.” 14Nansho Apwiiya Nlhuku nkayeerelha ashinna Musa wiira, “Chani yakaari athumwanaya ahaashuwelha ishenye wiitho, waamuka wiira ahopanga ittu yo uhilhoka, khayoona ishoni wo mahuku saba? Paahi etu mwoomolheke arwee uchereshere nipuro, akhalheke wowo mahuku saba, yamalhaka mwaahokolhosheke unipuroni.” 15Paahi etu, Namiriamu nkayoomolhiya arwee uchereshere nipuro akhalhe wowo wo mahuku saba. Ni attu khayaarwelhe nkwaha nkina, mpaka Namiriamu vaahokholhoshiye aya tho unipuroni. 16Ni yamalheke yayo, attu ahorwaa nkwaha wo ukhuma Uhaserothi, nkayeesha nipuro naya uthakoni Uparani.
The Bible Version in Makua @The Word for The World International and Makua Language translators. All rights reserved.