Waalhakelhiya attu 11
11
Attu anoochukulhacha uthakoni
1Paahi yamalheke, attu ahochokholha uchukulha wa Apwiiya Nlhuku, wo nlhatu no uhuva waapatta aya. Apwiiya Nlhuku veewilhe aya, ahorushiya, nkayaakurushelha mooro. Yoyo mooro uyo nkawaapharelha variyari aya ni upaha mpata mmoka wo nipuro. 2Attu nkayonlhachera ashinna Musa, ni ayo nkayaalhapelha Apwiiya Nlhuku, mooro uyo nkawaatiphia. 3Paahi etu, vavawo vakittu vawo nkaweehaniya Tabera, maana aya, “vakittu wo upharelha” ukhalhawaya vavawo mooro wa Apwiiya Nlhuku wahopharelha variyari ya attu.
Ashinna Musa anowaathanlha ahoolhelhi makhumi saba
4Mmilhokoni mwa attu o Israeli wahaawo nkutiro waathukumanne ukhalhaka ni nnikwa mulhupalhe wo uthanana ukhuura inama. Paahi attu o Israeli wo nkwaha wo nayeelhi ahochukulhacha tho yeeraka, “Yanlhoka wiira, nikaapantte inama nikhuure. 5Ninowuupuwelha ihopa chaakhura ihu Umisri ulhe, wo uhilhiva ittu, vaakhura ihu mishiri, vaalhia ihu maraka, mathapa, ivitunguu ni ivitunguu saumu. 6Nansho vaa vano nihophweelhiya, ukhalhawaya khiiwo yoolhia ikina yaahikalhe imana ilha vekha ayaru.”
7Imana inene iyo yaari thoko imbeyu yo meelhe, irangi aya yaari yo manjano yaathakaneelhe ni yo teelha. 8Kila nihuku vaasha aya attu ahorukureriacha ni ulhokotta, nkayaashilha vanshilhoni ama uthitha mwiiraweni, nkayaapiacha nnyoopweni ni ukhalha maandazi, yaachiva thoko maandazi aapeiye ni makhura. 9Ukhalhawaya kila uhiyu ukame vaamora aya vanipuroni, imana ni iyo yahomora vathi.
10Ashinna Musa nkayeewa attu o kila iwani vaachukulhacha aya, kila ntu vanlhakoni wo nihema nawe. Paahi urushiya wa Apwiiya Nlhuku nkawaathepa chinene, ni ashinna Musa ni ayo ahorushiya. 11Phi vavawo ashinna Musa veerenlhe aya Apwiiya Nlhuku wiira, “Wo nlhatu waani nnokipangelha mwo uhilhoka mii karumiya inyu? Woonaka akinootelhihani nrima, mpaka nhokiria nsigo wo waashunga alha attu onkhaye alha? 12Chani phi mii kaayarachilhe, mpaka nkamwaakivaha wiira kaakushe mmathathani thoko naangoro vanonkusha awe mwaamwana mwankani, ni waarweha mpaka ilhapo ilhupenlhe inyu waavaha manyaapwiiya aya? 13Kinohalha upatta vayi inama yo waavaha yalha attu onkhaye alha? Ukhalhawaya anowunlhacha umihoolho waka yiirachaka, ‘Nnivahe inama nikhuure.’ 14Akinooria waashunga yalha attu onkhaye alha vekha aka, yeyo ittu yo urikarika chinene uwannyaka mii. 15Yakhalhaka phi chiichammo chinohalha inyu ukipanga, nambaya nkiiveke etu. Yakhalhaka nnookivaha nipesha umihoolho winyu, nhikihiye kihuvaka vekha aka etu.”
16Paahi yamalheke, Apwiiya Nlhuku nkayeerelha ashinna Musa wiira, “Mwaathothokaniheke ashulhupalhe makhumi saba o munlhokoni mwa attu o Israeli, mwaachuwenlhe inyu wiira anothimichiya ni urumelhelhiya ni attu wiira phi ahoolhelhi aya, mwaawiihe vari Nihema Nitakatifu, yeemelhacheke vakhiviru ni inyu. 17Kinookhuruwa wowo ni uwulhumanani, kinookusha mpata wo iphumu yuvahilhe akani, kaavahe yayo attu ayo. Ni ayo anookushacha ntheko wo waashunga yalha attu alha vamoka ni inyu, nhikushe nsigo uyo vekha inyu.
18“Vano mwaahimerieke attu cho, ‘Mwiittukurieke wo nlhatu wo meelho, nnookhura inama. Apwiiya Nlhuku aheewa vanochukulha inyu wiira khaawo novahani inama, ni wiira mwaakhalha wo mpuha chinene vaari inyu Umisri. Vano Apwiiya Nlhuku anouvahani inama mwaatti, ni inyu nkhuureke. 19Nnookhura yeyo inama iyo kuhii wo nihuku nimoka tu, ama mahuku meelhi, ama mahuku nthanu, ama mahuku khumi ama mahuku makhumi meelhi, 20nansho mweeri wonkhaye.’ Nnookhura mpaka yuunukheni mphulhani, mpaka yuuphweelheni. Yayo onkhaye ayo, anowa ukhalhawaya nhaakhota Apwiiya Nlhuku arii momu munlhokoni mwinyu mu, ni ukunlhelha mii mwiiraka, ‘Wo ishiyani unithamiha Umisri?’ ”
21Nansho ashinna Musa nkayeerelha Apwiiya Nlhuku wiira, “Attu kinaaholhelha aka alha va, ari attu laki sita, aneeta ni mweto, ni inyu nneera, ‘Kinowaavaha inama yo waathosha mweeri mmoka?’ 22Chani vanowooria uhithiya ikhondoro ni ing'ope cho waathosha? Chani ihopa chonkhaye mbaharini chiyo chimenjiye wo nlhatu waya?” 23Apwiiya Nlhuku nkayaakhulha ashinna Musa, “Chani wooria waka uhowukuwa? Nnowoona etu yakhalhaka nlhove naka ninookhalha no ikekheene uwaninyu ama kuhiwe.”
24Paahi ashinna Musa ahorwaa ni waahimeria attu alhe malhove ahimilhe aya Apwiiya Nlhuku ayo. Yamalheke, nkayaathukumaniha ashulhupalhe makhumi saba ukhuma mmilhokoni mwa ashulhupalhe ahoolhelhi, ni ayo nkeyeeshacha nthotho urukureria Nihema nno. 25Vavawo Apwiiya Nlhuku nkayaakhuruwa nnihuteni ni woolhumana ashinna Musa. Baada yo vavawo, nkayaakusha mpata wo iphumu yaavahilhe aya ashinna Musa, nkayammaha kila mmoka ya ashulhupalhe makhumi saba alhe. Yakhelhiyeke yeyo iphumu iyo, ashulhupalhe ayo ahochokholhacha wuulhumacha malhove o unamilhohi, nansho khayaahokolhenlhe upanga chiicho.
26Ashulhupalhe eelhi munlhokoni wa makhumi saba yaathanlhiye alhe, Naeldadi ni Namedadi, yaari anahanlhe unipuroni ikatema akhunanaya vaarwelhe u Nihemani. Iphumu ya Nlhuku yahaarwelha wowo nnipuroni uwo, ni ayo nkayaachokholhacha wuulhumacha malhove aarumiye ni iphumu iyo, vavawo vakittu vaari aya vawo. 27Mmirawo mmoka ahokhuma attimakachaka ni weerelha ashinna Musa wiira, “Naeldadi ni Namedadi anowuulhumacha malhove o arumiye ni iphumu, unipuroni ulhe.” 28Vavawo, Nayoshua, anaaya Nanuni, aari nkavihi a ashinna Musa toka umirawo waya, nkayeerelha ashinna Musa wiira, “Pwiiya, mwaachichihe.” 29Nansho ashinna Musa nkayaakhulha wo wiira, “Chani nnoona ihache wo nlhatu waka? Nambaya etu Apwiiya Nlhuku yakaavanhe attu aya onkhaye iphumu aya, ni ayo nkayaakhalha anamilhohi.” 30Yamalheke, ashinna Musa nkayaahokolhia unipuroni vamoka ni ashulhupalhe makhumi saba o attu o Israeli alhe.
Apwiiya Nlhuku anookurusha ikhwalhi unipuroni
31Wo uhipicha, Apwiiya Nlhuku ahowukiha iphioo yo machiri, nkaakurusha ikhwalhi ukhuma ubaharini ni ukorweehacha uchereshere nipuro. Ikhwalhi chahocharacha vathi, vakittu venchi chinene, kila mpata, urukureria nipuro nno, chiphiyelhaka nchusha no imita imoka nchulhu. 32Paahi nenno nihuku nonkhaye nno, ni ushelhelhiha, ni waashelhe waya, attu yaari athemwachaka ukhupacha ikhwalhi. Ni khaawo ntu aakhumpe ikhwalhi cho uwukuwa ikilo elufu imoka. Nkayaanelhacha kila vakittu vachereshere nipuro wiira chuume. 33Inama vaari aya chinachanre mmanupani, ni attu ahinaya umalhiha ukhuura, Apwiiya Nlhuku yahaathunanelha attu, nkayaatwarusha attu mariro menchi chinene. 34Paahi etu, vavawo vakittu vawo vaheehaniya Kibroth Hataava, maana aya akhalhaka, “mahiye o attu o umenyekha” ukhalhawaya phi wowo waavithachiye aya attu o umenyekha.
35Ukhuma vavawo va Kibroth Hataava vawo, attu yahorwaa mpaka Uhaserothi, nkayeesha nipuro naya ni ukhalha wowo.
The Bible Version in Makua @The Word for The World International and Makua Language translators. All rights reserved.