Nahosea 9
9
Nahosea anoohimiacha ntwarusho wa attu o Uisraeli
1Nhittapelhelhe inyu attu o Uisraeli. Nhishangarare thoko ilhapo chikina, ukhalhawaya khaawo ntu o ukhulhuvelhiya wa Nlhuku inyu, nhokhalha attu o ishembwere wo nlhatu no unhiya Nlhuku inyu, ni kila vakittu vaneepettelhiya choolhia nholhiviya wo nlhatu no ishembwere inyu. 2Nansho khunokhalha choolhia chinchi ni makhura o mizeituni, ni khunokhalha ni idivai. 3Attu o Uisraeli khanokalhacha mwiilhaponi mwa Apwiiya Nlhuku, attu o Uefraimu anoohokholhia upottani Umisri, ni anoolhia yoolhia yo unanara Uashuru uwo. 4Khanaakumihera Apwiiya Nlhuku isadaka cho idivai, mena khanonteelhiha wo nlhatu no isadaka chaya, nansho isadaka chiyo chinookhalha thoko yolhia inolhia umarironi, ni attu onkhaye anohalha ulhia anowiihelha nsheru, ni mena yoolhia iyo khinolhoka uwiihiya unupani wa Apwiiya Nlhuku. 5Nnohalha upanga ittu yaani nihuku no isikukuu inyu, ama isikukuu ya Apwiiya Nlhuku? 6Vanohalha inyu uttawa uhirimeelhihiya wo ilhapo inyu, ilhapo yo Umisri inoupocherani, iwani yo Umemfisi anookhalha mahiye o uvithani. Isadaka chaya cho isiliva chinoorukureriya ni michongoma, ni miiwa chinookhuneelha mmahemani mwaya. 7Mahuku o utwarushiya ahaatameria, mahuku o ulhivereriha ahaaya, attu o Israeli anoothananiya achuwelhe ilha ittu ilha, ukhalhawaya uwonya winyu winchi chinene ni uhilhoka winyu phi wuulhupalhe chinene. Mwaatti nnera, “Namilhohi uyo, noonia nkumbafu, noohoolhelhiya ni nnepa wa nahalhahalha.” Nneera yayo, nnoolhumacha chechiyo wo nlhatu no uhiulhoka waya. 8Namilhohi phi neenanelha attu o Uefraimu vamoka ni Nlhuku aka, phi ata chiicho miriankho chinooreiya mmaphironi mwawe mwonkhaye thoko cho unria mwaanuni, ni uhilhoka unoopangiya unupani wa Nlhuku aya. 9Mwaattiva nhopanga chittu cho uhilhoka, thoko chaakhalha inyu Ugibea. Nlhuku nowuupuwelha uwonya waya, ni nowaatwarusha wo nlhatu no uwonya waya.
Utwarushiya wa attu o Israeli wo nlhatu no uwonya waya
10Apwiiya Nlhuku aneera wiira, “Vaaphwanyilhe aka attu o Israeli, aari thoko izabibu uthakoni. Voonilhe aka manyaathumwaninyu, aari thoko konne thoko itini cho milhipu. Nansho vaapilhe aya wowo Ubaal Peori uwo, aheettukuria wo nlhatu no isinyago yo wuulhiha muru, ni ayo ahonanaracha thoko ittu yaattunne inyu ilhe. 11Nthimicho wa attu o Israeli unoovava thoko mwaanuni, khuuwo uyara, mena khuuwo urupalha irukhulhu, mena manyaathiyana khanorupalha irukulhu tho. 12Ata anaalhelhaka ashaana, akinaahiya akhalhe akumi, kinoweeva kila mmoka. Kinohalha waahiya vekha aya.” 13Kihoona achishaana a attu o Uefraimu thoko attu o Utiro amelhihiye vakittu voombone, nansho attu o ukhuma Uefraimu anowawiiha achishaana aya eeviye. 14Mwaatwarusheke attu alha inyu Apwiiya Nlhuku. Nansho nnohalha waatwarusha wo iphiro yaani? Mwaattukeke mathunkwa manyaathiyaana aya wiira ahiyare, ni mwoomiheke mapelhe aya hikhume wiira ahaamwihe achishaana aya!
Apwiiya Nlhuku anowaahukumulha attu o Uisraeli
15Apwiiya Nlhuku aneera wiira, “Uwonya waya wonkhaye uri Ugilgali, kahaavinga ukhuma wowo. Wo nlhatu no uwonya waya, kinowoomolha wiinupani waka. Akinaattuna tho, manyahoolhelhi aya onkhaye phi attu o uhilhoka. 16Yakhalhaka attu o Uefraimu ahokottolhiya, ahokhalha thoko mwiri uri ni mithithari cho wuuma, khanaayaracha ashaana ariyoothe. Ata aayaraka kinoweevakacha achishaana aya anaattuna aya ayo.”
Namilhohi nowoolhumana attu o Uisraeli
17Nlhuku aka nowaarihelha utayi ukhalhawaya khaarumelhenlhe, anookhalhacha attu o uhuvahuva mwiilhaponi.
The Bible Version in Makua @The Word for The World International and Makua Language translators. All rights reserved.