Nahosea 10
10
Utanganyachiya wo chittu cho ulhapelha
1Attu o Uisraeli aari thoko nzabibu woombone, nzabibu wo uyara maphepu. Maphepu vaathepa aya wunchereria phi chiichammo chaathepa aya wiithekelha madhubahu. Ni ilhapo aya vaathepa aya ushichira ni ayo ahothepa ulhokiha mapoto o malhuku o uthimichelha. 2Mirima chaya chichanre woothacha, vano anoottwaruwa wo nlhatu no uwonya waya. Nlhuku noophomolhacha madhubahu chaya ni ukakha mapoto aya.
3Yeyo ikatema iyo attu anowiiracha, “Khanirina mwene hii ukhalhawaya khaninaathimicha Apwiiya Nlhuku. Nansho ata nakhalhanaka mwene, nohalha wooria unipangelha ittu yaani?” 4Inohimiacha aya irii malhove ahiri ni ittu yo maana, anolhupelha ni upanga malhehano o uhilhoka, mena khiiwo ikekhiaye tho, wo chiichammo etu milhatu chaya chinoomelha thoko mahichi o ittu yo uhapalha mmatani.
5Attu anokhalha Usamaria anothukumelha, ni anowunlha wo nlhatu no umpoteriha mwaang'ope o idhahabu Ubetheli uwo. Attu aya vamoka ni opochera ishaani aya anomunlhelha, kwaani nthimicho wa mwaang'ope uyo uhopotera. 6Isinyago iyo inookushiya ni urweehiya Uashuru thoko nlhiviho wa amwene olhupalhe. Attu o Uisraeli anowoona ishoni wo nlhatu no isinyago aya. 7Amwene aya anookushiya, thoko ikipande yo mwiri vachulhu maashi. 8Vakittu vo uhilhoka vo uthimichelha isinyago Uaveni, vakittu vanowonya aya attu o Uisraeli, vanotanganyiya. Miiwa ni mahichi anoomelha mmadhubahuni mwaya. Ni ayo anowiirelha miako, “Nnikhuneelheke.” Ni ashimiako chiicho, “Nniwulhuwelheke!”
Apwiiya Nlhuku anoowaahukumulha attu o Uisraeli
9Apwiiya Nlhuku aneera, “Inyu mwaatti attu o Uisraeli, khannahiya uwonya ukiwonya mii, toka nnari Ugibea. Paahi nnoorimelhihiya wo ikhoto wowo Ugibea uwo. 10Kinowaawelha attu apotenre alha ni waatwarusha, ni attu o ilhapo chikina anoothukumanacha wiira aakelhelhe, vanohalha aya utwarushiya wo nlhatu no uwonya waya mwinchi.
11“Attu o Israeli aari thoko mwaang'ope eettuchihiye rata, oorie ukukhurulha choolhia. Nansho kahonttuka nikonkwa nshikoni mwawe mwoombone, kahaapanga attu o Uyuda alhime wo ihipa yo upurulhiya ni ing'ope, ni Nayakhobo alhime wo ihipa yo ulhimelha. 12Kaheera, ‘Nlhimeke imata yo naanano wo nlhatu winyu, mwaalheke ikekhaye, ni nkhungureke ibarakha chinohalha uyariya ni ukhulhuvelhiya winyu uwannyaka. Vano phi ikatema yo ukirukunuwelha, mii Apwiiya Nlhuku inyu, ni mii kinoowa uuvahani ibarakha.’ 13Nansho vatulhi waya, mwaattiva nhaalha uwonya, ni ukhungura. Nholhia maphepu o uwoothacha winyu.
“Ukhalhwaya mwaattiva mwaakhulhuvenlhe mikukuta chinyu cho waatakanelha ikhoto, ni winchiva wo manyaasikari inyu, 14wo chiichammo etu ikhoto inowaakhuruwelha attu inyu, ni ikikhichero chinyu chonkhaye chinootanganyiya. Inookhalha thoko nihuku Amwene Nashalmani vaatanganyilhe aya iwani yo Ubeth arbeli ukhotoni, manyaanangoro vamoka ni achishaana nkaanyakathachiya. 15Phi chiichammo chinohalha aya ukhalha uwannyu inyu attu o Ubetheli, wo nlhatu no uwonya winyu wuulhupalhe. Vanohalha aya uchokholha ikhoto, amwene o Uisraeli anowiiviya.”
The Bible Version in Makua @The Word for The World International and Makua Language translators. All rights reserved.