Nahosea 8
8
Ulhaviya wa attu o Uisraeli wo nlhatu no uthimicha isinyago
1Apwiiya Nlhuku aneera, “Mwoopeke mapalhapata! Amalhaponi anookhuruwa vathi wiilhaponi waka thoko nrepo! Attu aka ahohiya malhehano kaapangilhe aka ni ayo, ni ahohiya meettuchiho aka. 2Inakhalhaka chiicho, anookiihana mii Nlhuku aya ni uthanana wiira akhalhe attu aka ni wiira anookichuwelha, 3nansho ahokhotacha ittu yoombone. Wo yoyo nlhatu uyo, amalhaponi aya anowaattwarelhelha.”
4“Attu aka ahaathanlha mamwene, nansho apangilhe chiicho wo uttuna waya ashineneru. Ahokusha isiliva ni idhahabu cha, nkayeekoproshelha isinyago, ittu inohalha waarimeelhiha. 5Mii akinottuna isinyago yo mwaang'ope inothimicha aya attu o iwani yo Usamaria. Yeyo inookirusha chinene. Ni iyo inohalha ukhalha mpaka iyaakhani vanohalha aya uhiya uthimicha isinyago iyo? 6Ntu o Uisraeli phi hemme yeyo isinyago iyo, ni iyo kihii nlhuku ata vakani. Yoyo mwaang'ope nothimichiya Usamaria uyo nooharariya! 7Vanaalha aya iphioo, anowa unkhungura nayuupuru! Imata yo choolhia ihinapacha ukhunguriya choolhia, khinowa yaakhumiha nkatte ata mmoka. nansho yakhunguriyaka ittu, alheto anowa ulhia chechiyo. 8Ilhapo yo Uisraeli ihokhalha vano thoko ilhapo chikina, ni iyo ihokhalha thoko iyoopwe ipweshiye. 9Attu o Uisraeli ari ni itiyamaru thoko iphuta yo umwiini, inothemwathemwa veekha aya. Ukhalhawaya ahorwaa Uashuru uvekelhani nikaviho, ni ahokumiha malhivo wa attu o iwani chikina wiira enkelhe. 10Nansho vano, kinorwaa waathothokaniha vamoka ni waatwarusha. Vahinapicha, anoochokholha woona uweria vanohalha aya waamererihiya ni amwene o Uashuru.” 11“Madhubahu chinchi chihothekiya ni attu o Uisraeli wo nlhatu no ukumihera isadaka cho uthamiha uwonya, nansho madhubahu chiyo chihokhalha phi vakittu vo uwonya! 12Kiholhepa chittu chinchi cho weettuchiha attu aka, nansho anookhota ni woona thoko chittu chilheto.”
13Anokiwiihera isadaka ni ulhia inama cho isadaka. Nansho mii Apwiiya Nlhuku akinochivelhiya ata vakani. Mii kinowuupuwelha uwonya waya ni waatwarusha, ni kinowaahokolhosha upottani Umisri!
14“Attu o Uisraeli ahonlhiyalha Nlhuku aya, ni aheethekelha inupa cho nchurukhu mwinchi. Attu o Uyuda aheethekelhacha iwani chiri ni ikikhichero. Nansho mii kinooruma mooro wo upahakacha chechiyo iwani chiyo, ni urimeelhiha ikikhichero chaya.”
The Bible Version in Makua @The Word for The World International and Makua Language translators. All rights reserved.