Nahosea 5
5
1“Mwaatti mwiiwelhelheke ilha ittu ilha, inyu opochera ishaani! Mwiiweke rata inyu attu o Israeli! Mwiiweke inyu nikosho na amwene! Inyu, nhothananiya uvarechesha ikekhiaye, nhokhalha nrianko Umizpa uwo, nhokhalha nttavi no wamenjera attu o Utabori, 2nhothipa nlhikiti no urekama no wamenjera attu o Ushitimu. Nansho mii kinowatwarusha attu onkhaye. 3Kinowaachuwelha attu o Israeli keevithilhe uwannyaka. Inyu attu o Uefraimu nholhuvacha, ni attu o Israeli aheenanarihacha.”
Nahosea anowaamuka attu mwaha wo uthimicha isinyago
4Mitheko chaya chinowaatiyelhelha wiira ahikihokolhelhe mii Nlhuku aya. Mmamirimani mwaya ahocharacha ishembwere, khanokuupuwelha mii Apwiiya Nlhuku. 5Ni uwonya wa attu o Israeli unowooniya, ni attu o Uyuda anookwakwathuwa muuwonyani vamoka ni ayo. 6Anorwaa ni mikutiro chaya cho ikhondoro ni ing'ope, waavia Apwiiya Nlhuku, nansho khanooria waapatta, ukhalhawaya ahokhalha utayi ni ayo. 7Yayo ahohiya ukhulhuvelhiya ni Apwiiya Nlhuku, ahaayaracha achishaana o muuwonyani. Isikukuu chaya cho woonia mweeri chinowarimeelhiha yayo vamoka ni imata chaya.
Ikhoto ya attu o Uyuda ni attu o Uisraeli
8Mwoopeke mapalhapatta Ugibea uwo, ni maphenga Urama uwo. Mwiipeke iphivi cho ikhoto Ubeth Aveni. Nhoolhelheke inyu mwaatti attu a Nabenyamini. 9Nihuku no waatwarusha Naefraimu anookhalha thoko uthako! Kinohimiacha aka mwaattuni mwa Aisraeli phi ittu inohalha ukhumelhelha wo ikekhiaye. 10Apwiiya Nlhuku aneera wiira, “Manyaaholhelhi o Uyuda ahokhalhacha attu o urukunusha miinano cho ilhapo. Paahi mii kinowaamichera urushiya waka thoko ittu yo uweria. 11Attu o Uefraimu ahotwarushiya, ikekhiaye aya ihokushiya, kwaani ahothanana uttwara ukumbafu. 12Chiichammo mii kiri thoko ikutihi wa attu o Israeli, ni kiri thoko nikhwata wa attu o Uyuda.” 13“Yamalheke attu o Israeli voonilhe awe ureta aya, attu o Uyuda makhwata aya, attu o Uefraimu ahorwaa Uashuru ni uvekelha nsaada wa amwene olhupalhe, nansho yayo khorialhe waalhamiha, mena khorialhe uulhamihani makhwata inyu. 14Ukhalhawaya kinokhalha thoko kharamu o ilhapo yo Uefraimu, thoko kharamu muulhupalhe wa attu o Uyuda, kinowaamianihacha ivipande vipande ni urwaa. Kinowaakusha ni waarweeha utayi ni khaawo ntu nohalha wookholha.” 15“Yamalhaka, kinoohokholhia vakittu waka ni wiichesha utayi ni ayo mpaka vanohalha aya urumelhelha uwonya waya. Uhuva waya unooweetuchiha akaavie wo machiri.”
The Bible Version in Makua @The Word for The World International and Makua Language translators. All rights reserved.