Nahosea 4
4
Apwiiya Nlhuku anowaachacheracha attu aya
1Apwiiya Nlhuku ahaana nlhatu wo uhimia wa attu anokhalha velhaponi. Mwiiwelhelheke inyu attu o Israeli wo ittu anohimia aya wiira, “Khuuwo ukhulhuvelhiya, ama o uttuna velhaponi, ni attu khanokichuwelha mii wiira phi Nlhuku. 2Uhaawo ulhapa, wootha ni wiiva, wiiya ni ishembwere wo uhikhalha ni miinano, ni weevakacha mmoka baada yo nkina. 3Wo yoyo nlhatu uyo ilhapo yonkhaye ihokhalha ni nunlhiho, ni attu onkhaye anokhalha mwommo anooweriachiya, ashinama o mwiini, ashinuni o wiirimu, ni ihopa cho ubaharini anookhwacha.”
Nlhuku nowaarweeha opochera ishaani umilhatuni
4Nansho Apwiiya Nlhuku aneera wiira, “Hikhalhe ntu riyoothe nowiiha milhatu wa attu, ni ntu riyoothe hinthunalhelhe nkhunanawe, ukhalhawaya attu inyu ari thoko alhe anowiiha nlhatu vachulhu wa opochera ishaani.” 5Inyuva nnookwakwathuwa uthana, ni uhiyu anamilhohi anookwakwathuwa vamoka ni inyu. Paahi, kinowaarimeelhiha anumwaninyu. 6Attu aka anoorimeelha wo uhikhalha ni irusho, ukhalhawaya inyu nhokhota meettuchiho aka ni mii kinoukhotani inyu nhikhalhe opochera ishaani uwannyaka, ukhalhawaya nholhiyalha uvarechesha malhehero a Nlhuku inyu ni mii kinowaahiya achishaana inyu. 7“Ikatema opochera ishaani vonchereria aya, phi vaathempe aya upanga chittu cho uhilhoka uwannyaka, paahi, kinoorukunusha nthimicho aya ukhalha ishoni. 8Anowiiwoniha wo isadaka cha attu aka o uwonya, anoothanana chinene woona attu awonyaka. 9Nansho anohalha waapatta opochera ishaani, kinowaatwarusha wo nlhatu no meetelho aya, ni waalhivereriha wo mitheko chaya ashinene. 10Anoolhia nansho khanowonacha, anoopangacha ishembwere, nansho khanaapatta ashaana, ukhalhawaya ahokihiya mii Apwiiya Nlhuku ni uttwara milhuku chikina.”
Apwiiya Nlhuku nowaalhava attu anothimichera milhuku chikina
11Apwiiya Nlhuku aneera wiira, “Idivai yo khalhayi ni yo naanano chinoothamiha irusho. 12Attu aka anoovekelha malhove o ikekhiaye ukhuma umwirini ni ikopo aya yo woopelha nttiti phi inaavaha malhove. Nrima wo upanga ishembwere uhaapoteriha, ahopanga ishembwere wo uttwara milhuku chikina ahokihiya mii Nlhuku aya.” 13Anokumiha isadaka vachulhu miako ni isadaka cho urimelhihiya vamooroni vachulhu iruwa, wuuthi miri cho mialoni, migude ni miwepa, wowo uhokhalha ni nttuchi. “Wo chiichammo ashimialhi inyu anoopanga ishembwere ni manyaathiyana inyu anoopangacha ishembwere. 14Nansho akinaatwarusha ashimialhi inyu ikatema vanopanga aya ishembwere, mena manyaahokohi inyu vanopanga aya ishembwere, ukhalhawaya, ashilhopwana ashinene phi anottwaraana ni attu o ulhuva ni ukumiha isadaka vakittu vo uthimichelha milhuku, ni attu ahiri ni irusho anorimeelhihiya.”
15“Mwaattiva attu o Israeli phi attu o ishembwere! Nansho nhaapange attu o Uyuda ukhalha ni nlhatu.” Nhirwee Ugilgali mena nhirwee Ubeth aveni. Mena nhilhupelhe mweeraka, “Wo ikekheene thoko Apwiiya Nlhuku chinolhokelha aya.” 16Attu o Uisraeli ahokhalha attu o itiyamaru thoko iphuta. Nlhatuni etu Nlhuku nowaashunga thoko ashikhondoro mmatani mwo mathaakhuru makithi? 17Attu o Uefraimu aheettukacha ni isinyago, haya etu mwaahiyacheke athepeke upanga. 18Baada yo uwuuria idivai yinchi anooshangararelha wo upanga ishembwere, anoottuna ishoni upwaha nthimicho aya. 19Paahi, naayupuru nowaaveverusha utayi ni isadaka chaya chinowaahelha
The Bible Version in Makua @The Word for The World International and Makua Language translators. All rights reserved.