Nahosea 6
6
Ukhoroma uhiri ni ikeekhene
1Attu aneera wiira, “Nngweeke, naahokolheelhe Apwiiya Nlhuku! Yayo anene ayo, ahonirakhalhiha, nansho anoonilhamiha, ahonirakhalhiha, nansho anoonittuka makhwata ihu. 2Aviraka mahuku meelhi ama mararu anoonivaha ukumi tho, wiira noorie ulhokelha vamoka ni ayo. 3Paahi etu nilhikacheke waachuwelha Apwiiya Nlhuku. Uwa waya unokhalha thoko mapikoosha, yoyo anooniweelha thoko mmeevelha wo iyitha unorupa mwiilhaponi.”
4Nansho Apwiiya Nlhuku aneera wiira, “Mwaattiva attu o Uisraeli ni attu o Uyuda, kuupangelhekeni ittu yaani? Ukittuna winyu uri thoko ittapwe yo wichishu, ama thoko ukame unowalhawalha wo waakuvia. 5Phi nlhatu atu no waaruma anamilhohi ni nlhove naka no uhukumulha ni uurimeelhihani. Ittu inothanana aka uwannyu irii irusho vamoka ni ulhoka. 6Ukhalhawaya uwannyu kinothanana uttunana kuheena isadaka, ni unchuwelha Nlhuku upwaha ukumiha isadaka cho upahiya vamooroni.” 7“Nansho ahontha nlhehero naka thoko Naadamu, ni wowo ahokipangelha chittu cho uhilhoka. 8Iwani yo Ugileadi phi iwani iri ni attu o uhilhoka ni attu o wiiva. 9Thoko attu anaakha chittu vaneevithelha aya mphironi, phi chiichammo chinopanga aya opochera ishaani. Anowaakha chittu attu uphironi unokelha Ushekemu, ni anopangacha chittu cho uhilhoka waapwaha attu akina. 10Kihoona ittu yo woopiha wiilhaponi Uisraeli ukhalhawaya anoottimakelha uthimichani milhuku chikina, ni ahowiihelhacha nsheru chinene.
11“Ni inyu mwaatti attu o Uyuda, kiheesha nihuku no utwarushani wo ulhikaana ni chittu chipangilhe inyu.
The Bible Version in Makua @The Word for The World International and Makua Language translators. All rights reserved.