Nahosea 2
2
1Paahi, mweehaneke manyonninyu, “Attu aka,” ni manyaarokorinyu, “Ahoonelhiya ikiriri.”
Nthiyana o ulhavalhava phi ilhapo ipotenre yo Israeli
2Mwaachachereke anumwaninyu wiira, ukhalhawaya vano yayo kaheena ahanu aka mena mii kahiwena owannyaya. Athamiheke ikhove aya yo ishembwere umihoolho waka, ni ulhuva waya. 3Wo chiicho kinowaarulha ikuwo ahalheke pwithipwithi, kinoohiya akhalhe thoko chiyariye aya. Kinowaapanga akhalhe thoko ithakhwa, kinoowaahiya oomeke. Kinooweeva wo nttona. 4Ni achishaana aya, akinoonelha ikiriri, ukhalhawaya ahokhalha achishaana o muulhuvani. 5Anumwanaya ahopanga ishembwere, nkaarupalha irukulhu ahopanga ittu yo uhilhoka. Nagomeri aheera wiira, “Kinoorwaa wa manyaalhopwana aka, anokivaha yolhia ni maashi, ikhuwo yo isufu ni ikitani, makhura ni idivai.” 6Paahi, kinootiyelhelha iphiro chaya wo miiwa, kinoorukureriha ishiri, ahipatte iphiro yo ukhuma vathe. 7Anowaattwara manyaalhopwana aya, nansho khanaapata, anowaavia nansho khanaapata. Vavawo phi vanohalha aya uhimia wiira, “Kinoohokolhia wa owannyaka o upachera, ukhalhawaya wowo kaari ni mpuha chinene upwaha vano.”
8Nagomeri khaachuwenlhe wiira phi mii kaavahilhe yolhia, idivai ni makhura, kaavahilhe nhakhu ni idhahabu wo wiinchiva, nkanrwehelha Baali. 9Paahi ikatema yo ukhungura kinookusha choolhia chaka, kinoothamiha idivai aka ikatema aya. Kinothamiha idivai aka ikatema aya, kinoowakha ikuwo cho isufu ni ikuwo yo ikitani, chitumikilhe waakhuneelha umattepe waya. 10Kinowaarulha ahalheke pwithipwithi umihoolho wa manyaalhopwana aya, mena khaawo ntu nooria ukihiiha kihipange chiicho. 11Kinoomalhiha mpuha aya wonkhaye, isikukuu chaya cho mweeri wo upachera ni mahuku o wiittuwa, ni isikukuu chaya chonkhaye chilheheriye. 12Kinootanganyacha mizabibu chaya ni itini, ni anoohimia wiira chechiyo phi malhivo aya. Kinoopanga chikhalhe ithuphi, ni ashinama o wiithuphini anoolhia. 13Kinoolhivereriha isikukuu cha Baali chipangilhe aya, ikatema apangilhe aya waattusherera ubani, ni wiireeriha wo ipete chawe ni miinjiro, mii Apwiiya Nlhuku phi kineera,
Apwiiya Nlhuku anowaattuna attu aya
14Paahi chiichammo etu kinokowaapepecha, kinowaarweeha uthakoni ni wumuulhumana wo malhove o mpuha. 15Wowo kinokowaahokolhoshera imata chaya cho mizabibu, nikoote no Uakori kinoopanga nkhora wo ukhulhuvelhiya. Anokittwara wo uttuna waya thoko vaari aka mmirawo, thoko ikatema vaakhumme aya wiilhaponi Umisri. 16Tho, mii Apwiiya Nlhuku kineera cho, nenno nihuku nno inyuva nnokiihana “owannyaka”, kuhiwena tho “Baali aka.” 17Kinoothamiha machina a Mabaali ukhuma mmalhakuni mwaya, mena khanolhapelha tho wo machina aya. 18Kinoopanga malhehano ni ashinama o wiithupini, ashinuni o wiirimu vamoka ni chittu chonkhaye chineepurulha, ahurakhalhiheni. Kinookwanyulhacha muupa, uphanga ni ikaruma cho waatakanelha ikhoto mwiilhaponi, ni upangani nlhokelhe wo mpuha. 19Kinoupangani ahanu aka o mahuku o uhimalha, nkhalheke awaka wo ukhulhuvelhiya ni ikekhiaye, wo uttuna ni wo ikiriri. 20Eiyo, kinouvekani wo ikekhiaye, ni inyu nnookichuwelha mii Apwiiya Nlhuku. 21Nenno nihuku nno, mii Apwiiya Nlhuku kineera wiira, kinoorumelhelha ulhapelha winyu wiira irimu irupihe ipulha, irimu ni chiyo chinoorumelhelha chinottuniya ni ittaya. 22Ni ilhapo inowaakhulha wo uyara choolhia, uwiiha idivai ni makhura, ni chiyo chinoothosha wa attu o Nayezreeli. 23Kinowaamelhiha Nayezreeli velhaponi, kinowoonelha ikiriri “Ahinoonelhiya ikiriri” ni ayo aneehaniya “Kahiwena awaka” kinoweerelha, “Inyu phi attu aka.” Ni ayo anowiiracha, “Uwe phi Nlhuku ihu.”
The Bible Version in Makua @The Word for The World International and Makua Language translators. All rights reserved.