Nahosea 1
1
1Nlhove na Apwiiya Nlhuku nahaakhuruwelha Nahosea anaaya Nabeeri ikatema yo utawara waya Nauzia ni utawara waya Nayothamu ni utawara waya Naahazi ni utawara waya Nahezekia amwene o Uyuda, ni ikatema yo utawara u Nayeroboamu anaaya Nayekoashi amwene o Uisraeli.
Ahanu a Nahosea ni achishaana aya
2Yamalheke Apwiiya Nlhuku vaachokhonlhe aya wuulhumacha ni attu o Uisraeli wo unlheehera Nahosea, aheerelha wiira, “Nrweeke mwaanveke nthiyana o ishembwere ni mwannyaraneke achishana o ishembwere, wo nlhatu na attu o ilhapo ilha wiira anoopanga ishembwere wo upwaha mpaka ukilhiyalha mii Nlhuku.” 3Paahi, Nahosea ahorwaa, ni waaveka Nagomeri, anaaya Naadiblaimu. Ni ayo ahorupalha irukulhu ni waayarelha Nahosea mwaana mwanlhopwana. 4Yamalheke Apwiiya Nlhuku aheerelha Nahosea wiira, “Mwaana uyo mmwiihaneke nchina nawe ‘Yezreeli’, maana aya ihohalha ikatema vakani kinottwarusha inupa i Nayehu wo nlhatu no weeva attu o unikote no Uyezreeli uwo, ni mii kinomalhiha umwene a attu o Uisraeli. 5Ni nikote no Uyezreeli ikatema iyo kinootanganya machiri o mphingo wa attu o Uisraeli.” 6Nagomeri ahorupalha irukulhu ikina tho ahonnyara mwaana mwanthiyana. Yamalheke Apwiiya Nlhuku aheerelha Nahosea wiira, “Mwaana uyo mmwiihaneke nchina nawe ‘Lo Ruhama,’ Maana aya akinooniha tho uttuna inupa yo Israeli, wiira kihiwe tho koonelha ikiriri. 7Nansho kinowooniha uttuna wa attu o Uyuda ni wookholha. Mii Apwiiya Nlhuku, Nlhuku aya, kinowookholha, nansho kahiwena wo machiri o mphingo, ama muupa, ama uphanga, ama afarasi, ama attu o weetiha afarasi.”
8Nagomeri ahonhiiha mwaana Lo Ruhama waamwa nipelhe, ahorupalha irukulhu tho, nkaayarelha Nahosea mwaana nkina mwanlhopwana. 9Yamalheke Apwiiya Nlhuku aheerelha Nahosea wiira, “Mummaheke mwaana uyo nchina nawe Lo Ami, maana aya inyu ‘Kanhiwena attu aka,’ Ni mii kahiwena Nlhuku inyu.”
Iwani yo Israeli inothananiya uthekiya tho
10Nansho attu o Israeli anokhalha thoko nhaava wo ubaharini, ni uyo khunooria uphimiya mena waalhakelhiya, vano Nlhuku neerelhacha wiira, “Inyu mwaattiva kanhiwena attu aka,” nansho mahuku anowa vanohalha aya uweerelha, “Inyu phi achishaana a Nlhuku ri nkumi.” 11Attu o Uyuda ni attu o Israeli anolhutaana vamoka ni unthanlha nhoolhelhi aya mmoka, ni ayo anoshichira mu ilhaponi mmo. Yeyo inookhalha nihuku nuulhupalhe ni Nayezreeli.
The Bible Version in Makua @The Word for The World International and Makua Language translators. All rights reserved.