Nahosea 13
13
Uhukumulhiya wo umalhelha wa attu o Israeli
1Mpacho vawo, attu o nikosho ni Naefraimu voolhumanche aya, makosho makina o Israeli ahoovacha, aheewelhelha attu o Uefraimu. Nansho attu ahowonya wo unthimicha Baali, ni wo yoyo mwaha uyo aheewiihera mariro. 2Attu o Uisraeli ahothepa uwonya, wo ukooroshacha isinyago cho uthulhushiya wiira athimiche, isinyago chaakoroshilhe wo isiliva, chaapangiye wo ntheko wa attu anokoorosha chittu. Eeraka wiira, “Nkumihere isadaka!” Ni ntu nooria chani ukumbatira chechiyo isinyago cho mwaang'ope chiyo. 3Paahi, yayo attu ayo anoowalhawalha thoko ittapwe yo wichishu, thoko ukame unaakuvia uwalhawalha, anookhalha thoko nankanka noveverushiya ni iphioo vakittu vanoveeriya choolhia, ni thoko mwiishi unokhuma vamwiitheni.
4Apwiiya Nlhuku aneera, “Miyaano phi Apwiiya Nlhuku, phi Nlhuku inyu, kuuthamihilheni ukhuma Umisri, ni khaawo Nlhuku nkina kihikhalhe mii. Mii vekha aka phi moopolhi inyu. 5Phi mii kooshungilheni uthakoni, ilhapo yo wuuma. 6Nansho vaaphilhe inyu uri ilhapo yoombone, mwaholhia ni urupalha, vavawo mwahochokholha wiifuna ni ukilhiyalha mii. 7Paahi kinookhalha thoko kharamu uwannyu. Ni kinookhalha thoko havara ni uwiithelhani mphironi. 8Kinouthuphelhani thoko nannyoma aakhiye achishaana awe. Ni kinourakhalhihani vakhakachani winyu, ni ukhuurani vavawo vavawo thoko kharamu, kinoutupulhani ivipande vipande thoko mwannama o wiithupini.
9“Kinourimeelhihani mwaattiva attu o Uisraeli. Mpani nooria uukavihani? 10Nnokoherera, ukhalha ni mwene ni manyaahoolhelhi, nansho yayo anohalha wooria chani wookholha ilhapo? 11Wo urushiya waka kahoovahani mamwene, ni vaathunanlhe aka, kahaathamiha.
12“Uwonya wa attu o Israeli ni utteka waya uholhepiya, ni chittu chilhepiye chiyo chihoshungiya unikhuphini. 13Attu o Israeli ahaana nipesha no ukhalha akumi, nansho inookhalha ukumbafu muulhupalhe thoko mwaana noyaria, nokhota ukhuma munthunkwani. mwa anumwanawe. 14Akinookholha alha attu alha, ukhuma ilhapo ya attu akhwilhe ama wookholha ukhuma machiri o nookhwani. Akinokhalha tho ni nlhikiti no waavitha alha attu alha. 15Inakhalhaka chiicho, attu o Israeli anooshichira thoko manyashi. Kinooruma iphioo yo uviha yo ukhuma uthakoni, inohalha wuumiha minyepu ni ilhushi chaya. Inoolhakalhiha kila ittu. 16Attu o Usamaria anottwarushiya wo uwonya waya. Ukhalhawaya ahonhiya Nlhuku aya. Ni anowiiviya wo uphanga, ni achishaana aya anoonyakathachiya, ni manyaathiyana o irukulhu anoophulhakachiya mathunkwa aya.”
The Bible Version in Makua @The Word for The World International and Makua Language translators. All rights reserved.