Nahosea 12
12
1“Kila ittu inopanga aya attu o Israeli toka vanosha aya mpaka uhiyu iri yo uhikhalha ni marumbo ni yo waalhakalhiha. Woothacha ni chittu cho uwiiha injarare. Ni anoorumelhelhana ni attu o Uashuru ni upanga maronda ni attu o Umisri.”
2Apwiiya Nlhuku ahaana nlhatu wa attu o Uyuda, ni anowaatwarusha attu o Israeli wo ulhikaana ni chittu chinopanga aya. Anoowaalhivihera wo nlhatu no mitheko chipangilhe aya. 3Vaaria aya munthukwani mwa anumwanawe, Nayakhobo ahaavara ikhotokhoto Naesau amunna awe, ni vonnuwilhe aya, ahaatakana ni Nlhuku. 4Ahaatakana ni nnepa ni ahonkottolha, ahonlha ni unvenda anvahe ibarakha. Ni Nlhuku ahowa Ubetheli ni woolhumana. 5Yalha phi Apwiiya Nlhuku, Nlhuku o machiri, Apwiiya Nlhuku phi nchina naya ni mwaakhulhuvelhe yayo ikatema chonkhaye. 6Nansho vano mwaahokolheelheke Apwiiya Nlhuku inyu. Nlhipiheke uttunana ni uvarechesha ikekhiaye, ni inyu mummweherere Nlhuku inyu mahuku onkhaye.
Malhove o uthepa ihukumu
7Apwiiya Nlhuku aneera, “Attu o Uisraeli khanokhulhuvelhia thoko attu o Ukanaani, anottuna waanyenga attu anaathumihera aya chittu wo waaphimelha wo akapani o woothacha. 8Attu o Uisraeli aneera, ‘Hii phi ntu o nhakhu, ni nihaana nhakhu mwinchi. Ni khaawo ntu nooria unikhupulhacha wo nlhatu no ukhalha ni nhakhu mwinchi.’ 9Nansho mii Apwiiya Nlhuku inyu kuuthamihilheni wiilhaponi Umisri, kinoupangani nkhalhe tho mmarapattani, thoko mahuku aawiilhe aka uwannyu uthakoni ulhe.
10“Mii kahoolhumana anamilhohi, ni mii kahaavaha cho woonia chinchi, ni wo iphiro ya anamilhohi kahaamuka attu aka. 11Nansho mpaka nna, isinyago chinoothimichiya Ugileadi, ni attu onkhaye anothimicha ayo anookhwaacha. Madume o ing'ope anookumihiya isadaka Ugilgali uwo, ni madhubahu anoowa aaphomolhachiya ni ukhalha mafungu o malhuku mmamatani.”
12Athumwanihu, Nayakhobo, ahottawelha Uaramu, anari wowo ahopanga ntheko wiira ampatte nthiyana, ahopanga ntheko wa ntu nkina wo ushunga ikhondoro. 13Wo iphiro ya anamilhohi, Apwiiya Nlhuku ahaathamihacha attu o Uisraeli ukhuma Umisri, ni wo iphiro ya anamilhohi Nlhuku ahaashunga attu o Uisraeli. 14Attu o Uisraeli ahaathunalhiha chinene Apwiiya Nlhuku. Ni Apwiiya Nlhuku anowaalhiva wo nlhatu no uwonya waya, ni anowaatwarusha wo nlhatu no chittu cho uhilhoka chipangilhe aya.
The Bible Version in Makua @The Word for The World International and Makua Language translators. All rights reserved.