Nahosea 14
14
Ulhapelha u Nahosea wa attu o Israeli
1Inyu attu o Israeli, mwaahokolhelheke Apwiiya Nlhuku, Nlhuku inyu. Nhowulhuwa wo nlhatu no uwonya winyu. 2Nkhoromeke wa Nlhuku wiira ohiyererekeni, mwaahokolhelheke ni weerelha, “Unihiyerereke uwonya wihu wonkhaye, ni mpochereke ittuvo chihu, ni hii ninoutotopelhani wo nrima thoko unilhupenlhe ihu. 3Attu o Uashuru khanooria unookholha, khaninokhulhuvelha tho afarasi o ikhoto. Mena khanineehana tho ‘Nlhuku ihu’ isinyago nihemme ihu naashinene chiyo. Uwannyu uwe Nlhuku achishaana o uhiya anoopatta ikiriri.”
Apwiiya Nlhuku anowaavaha ukumi tho attu o Israeli
4Apwiiya Nlhuku aneera, “Kinowaalhamiha uwonya waya wo ukhulhuvelhiya, kinowaattuna tho wo uttuna waka, ukhalhawaya akinaattunalhelha tho. 5Kinokhalha thoko ukame wa attu o Israeli ni ayo anothaphuruwa thoko makathia, anookhalhacha ni mithithari thoko mwiri wo mwerezi o Ulebanoni. 6Maritta aya anoowanelha, ni ureera waya unookhalha thoko mizeituni, nihiriri naya ninoonukhelha thoko ituva cho Ulebanoni. 7Anuokholhia ni ukhalha uno kaashungaka, anookondacha thoko ibustani yoombone, anoothaphuruwa thoko nzabibu, nihiriri naya noombone thoko idivai yo Ulebanoni. 8Inyu attu o Israeli, nlhatuni tho no uttuna isinyago. Mii phi neewelhelha ulhapelha winyu, mii phi kinoushungani. Mii kinouvahani nttuchi thoko mwiri wo mberoshi, nnopatta maphepu inyu o ukhuma uwannyaka.”
Malhove o Umalhihera
9Ntu riyoothe ri ni irusho eeweke malhove alha, ntu o nthimicho achuwelheke. Ukhalhawaya iphiro cha Apwiiya Nlhuku phi cho urera, attu anorumelhelha anoottwaracha, nansho o uwonya anookwakwathuwa mwommo.
The Bible Version in Makua @The Word for The World International and Makua Language translators. All rights reserved.