Nahosea 11
11
Nlhuku nowaattuna attu aya anhiilhe
1Apwiiya Nlhuku aneera, “Attu o Israeli vaari aya achishaana, kahaattuna ni anari Umisri kahoweehana achishaana aka. 2Nansho vaathepilhe aka weehanacha, phi vaathepilhe aya urwaa utayi ni mii, ahothepacha ulhapelhacha nlhuku aneehaniya Baali, ni utushera ubani isinyago cho milhuku chaya. 3Mii kaheetuchiha attu o Uefraimu weeta, kahaakusha mmathathani mwaka, nansho khachuwenlhe wiira kihowaalhamiha. 4Kahaahoolhelhiha wo mikhoyi cho ikiriri, wo nripwe wo uttuna, kahaatheesha vachulhu thoko naangoro, mii kahokhoroma vathi ni waalhiha yolhia.” 5“Paahi, anoohokolhia wiilhaponi Umisri, anokootawariya ni amwene o ukhuma Uashuru, wo nlhatu ahokhotacha ukihokolhelha. 6Uphanga unoooruma mmawani mwaya, unowuuntakacha ikila cho mikhora chaya, ni umalhiha miruku chaya. 7Attu aka ahothanana ukihiya mii, keehanaka awe uwannyaka, khaawo ata mmoka nowa.”
8“Inyu attu o Uefraimu, kinooria chani uhiyaani, kinooria chani urihani inyu attu o Israeli? Kinooria chani upangani thoko ilhapo yo Uadma? Kinooria chani uhiyani thoko Useboimu! Nrima aka unokichiichiha, ikiriri aka ihothepa uparelha chinene. 9Kinoomaalhiha urushiya waka, akinaalhakalhiha tho attu o Uefraimu, ukhalhawaya mii phi Nlhuku, mena kakihii ntu. Mii phi ntakatifu mmilhokoni mwinyu, ni mii akinowa koorimeelhihani.” 10“Attu anokittwara mii Apwiiya Nlhuku kinoturuma thoko kharamu, vanohalha aka wiiwania anookiweelha ukhuma mpata uneelha nchuwa uno atetemelhaka. 11Anoowaacha ukhuma Umisri uno atetemelhaka thoko ashinuni, anoovava ukhuma Uashuru thoko nchiya, ni mii kinowaahokolhosha uwannya aya, mii Apwiiya Nlhuku kiheera.”
Attu o Uisraeli ni attu o Uyuda ahowonyacha
12Apwiiya Nlhuku aneera wiira, “Attu o Israeli anokiwiihera malhove o woothacha, ni attu o Israeli ahokhalha attu o uwoothacha, attu o Uyuda, anookirukunuwa mii Nlhuku Ntakatifu.”
The Bible Version in Makua @The Word for The World International and Makua Language translators. All rights reserved.