Esta 8
8
Malhehero a amwene anaacha Ayahudi
1Nihuku nennonenno, amwene Nahasuero ahonvaha ahano Naesta nhakhu wonkhaye wa Nahamani, mmalhaponi a Ayahudi. Naesta nkaahimeria amwene wiira Namodekai aari amuchi aya. Paahi, toka ikatema iyo, Namodekai ahovahiya nipesha no urwaa ukumaana ni amwene. 2Amwene ahorulha ipete aya anonyathelha nhuri aathurunlhe aya Nahamani, nkaavaha Namodekai. Naesta ni ayo ahaavaha Namodekai nhakhu u Nahamani eemelhelhe.
3Yamalheke Naesta ahomuulhumana tho amwene, aheewulhusha vathi, vamietoni va amwene, uno onlhaka, anlhapelha amwene wiira amalhiheke nnikwa wo unanara u Nahamani o iyari ya Naagagi, waapangilhe waya wiira waapatta Ayahudi. 4Amwene ahaathoonyera Naesta ikopo aya yo idhahabu, Naesta ni ayo nkeemelha ni wiira, 5“Mwattunaka inyu amwene, ni khalhaka nnookittuna ni mwoonaka inoolhoka, chonte nchiichiheke miruku cho uhilhoka chi Nahamani chaathananne aya upanga. Miruku chiyo phi chilhe cha anaaya Nahamedatha, iyari i Naagagi, chaathanana aya wiira Ayahudi onkhaye arimeelhihiye mu mikowa chonkhaye. 6Ukalhawaya kinohalha wooria chani uvilhelha woona attu aka anorimeelhihiya ni ashilhoko aka anowiiviya?”
7Amwene Nahasuero ahomwiirelha ahano Naesta ni Namodekai, Ayahudi alhe wiira, “Mwooneke! kihoonvaha Naesta nhakhu u Nahamani, ni uyo aheeviya wo nlhatu no miruku chaya wa Ayahudi. 8Paahi nnowooria waalhepelha Ayahudi ittu iriyoothe nnothanana inyu. Tho nnowooria ulhepa wo nchina naka ni unyathia nhuri wo imwene, ukhalhawaya ntangazo nikumihiye wo nchina na amwene ni unyathia nhuri wa amwene khinooriana urukunushiya.”
9Paahi, nihuku no makhumi meelhi khuwa ttaaru no mweeri wo neeraru uneehaniya Siwani, Namodekai aheehanacha amakatibu onkhaye a amwene, nkaalhehera wiira alhepeke iwarakha wa Ayahudi ni manyaaholhelhi olhuupalhe, atawara ni attu o ipilhi o mikoa chonkhaye imia imoka ni makhumi meelhi khuwa saba, uchokholhelha Uindia mpaka Ukushi. Chechiyo iwarakha chiyo chilhepiyeke wo kila nkoa wo moolhumo aya ni ihati aya yo ulhepiya, chirweehiyeke wa Ayahudi. 10Namodekai aalhempe iwarakha chiyo wo nchina na amwene Nahasuero, ni unyatha nhuri wo ipete a amwene. Ni attu aarweehilhe iwarakha chiyo aari namitheko awenlhe afarasi o uttawa chinene.
11Uvirelha iwarakha chilha amwene ahaalhehera Ayahudi mu kila iwaani nipesha no uthukumana wiira eechokholhe ukumi aya. Ahovahiya nlhove no utanganya, wiiva wo uhoona ikiriri ni ulhakalhiha vamoka ni manyoopani ni achishaana aya, ni uvara mateeka nhakhu aya nlhoko uriyoothe wa attu ama nkowa, anohalha waakelhelha wo ikerero. 12Mwaha uyo waathaniniye wiira upangiye u mikoa chonkhaye cha amwene Nahasuero, nihuku no khumi ni ttaaru no mweeri wo khumi ni piilhi uneehaniya mweeri wo Adari. 13Inakala cho ntangazo nno chiholhepiya ukhalha thoko nlhehero kila nkowa, nkachaawanelha wa kila ntu wo kila nkowa, wiira Ayahudi eechesheke chiire ulhivereriha mahuku aphiyaka. 14Wo malhehero a amwene, anamitheko eetiha afarasi o machiri ni uttawa chinene, ahothamacha chitema. Ntangazo nno tho nahokumihiya mu iwaani yuulhupalhe yo Ususa.
15Namodekai ahothama uhanoni wa amwene, anawarenlhe ikuwo cho imwene cho irangi cho ikibuluu ni cho uteelha, ni mwiinjiro wo uteelha yoorera ni irangi yo izambarau, ni ittaji yuulhupalhe yo idhahabu, attu o iwaani yo Ususa ahoopa ilhulhu wo ushangarara. 16Paahi Ayahudi ahokhalha ni mpuha, nthimicho ni ushangarara, aheechona wiira phi attu ari ni mpuha ni ukottolha. 17Mu kila nkowa ni kila iwaani, vashomiye ntangazo nna, Ayahudi ahothapelhelha wo ushangarara, nkaapangacha isikukuu ni wiituwa, ni attu akina enchi aheepanga Ayahudi, ukhalhawaya ahoovacha Ayahudi.
The Bible Version in Makua @The Word for The World International and Makua Language translators. All rights reserved.