Esta 9
9
Ayahudi anowaakottolha amalhaponi aya
1Nihuku no khumi ni taaru no mweeri wo khumi ni piilhi, uneehaniya mweeri wo Adari, nihuku naahimiachiya ntangazo na amwene, naalhakelhiye wiira amalhaponi eevakache Ayahudi, nansho nihuku nno nkanaarukunushiya ukhalha phi nihuku no ukottolha wa Ayahudi vachulhu amalhaponi aya. 2Ayahudi ahokumaana mu kila iwaani cho mikowa cha amwene Nahasuero, Ayahudi aheechesha chiire wiira ankelhelheke ntu riyoothe nothanana waarakalhiha. 3Paahi, manyaaholhelhi onkhaye o mikowa, atawara, ashuulhupalhe ni attu o ipilhi a amwene, ni ayo ahaakaviha Ayahudi, ukhalhawaya onkhaye ahomwoova Namodekai. 4Namodekai nkaakhalha ntu o ikuru yuulhupalhe uhanoni, ni mwaha aya wahowanelha mu mikowa chonkhaye wiira machiri awe ahowunchereria. 5Paahi, Ayahudi ahaakelhelhacha amalhaponi aya wo uphanga, nkaahithakacha, ni waarimeelhiha ni waapangelha thoko chaathanana aya.
6Ayahudi aheevacha attu imia nthanu o iwaani yo Ususa. 7Tho aheevacha Naparshandatha, Nadalfoni, Naaspatha, 8Naporatha, Naadalia, Naaridatha, 9Naparmashta, Naarisai, Naaridai ni Nawaizatha, 10achishaana khumi a Nahamani anaaya Nahamedatha, Nahamani uyo phi aari mmalhaponi a Ayahudi. Ata chiicho, khavarilhe mateeka ittu iriyoothe.
11Nihuku nennonenno amwene ahokumiha malhakelhiyo ya attu eevakachiye mu iwaani yo Ususa. 12Paahi amwene aheerelha Naesta wiira, “Iwaani yuulhupalhe vekha aya Ayahudi aheeva attu imia nthanu, vamoka ni achishaana khumi a Nahamani. Nnaanyihera wiira apanngeni umikoani uwo! Nnothanana ittu yaani vano? Ukhalhawaya nnoovahiya. Nkihimerieke, nnothanana ittu inothepa vavawo, ni inyu nnoovahiya.”
13Naesta nkeera, “Mwoonaka inoorera, inyu amwene, meelho mwaavaheke nipesha Ayahudi ari Ususa apangache thoko chineera aya ntangazo no lhelho nna. Tho, nlheehereke wiira achishaana khumi a Nahamani athomieke mmwirini mwo wiivelha.” 14Amwene aholheehera mwaha uyo utimirihiye, ni ntangazo nkaanakumihiya Ususa uwo. Achishaana khumi a Nahamani ahothomeiya umihoolho wa attu. 15Nihuku no khumi no ncheshe no mweeri wo Adari, Ayahudi ahokumaana tho, nkeevakacha attu imia ttaru o Ususa uwo. Nansho khaavarilhe mateeka nhakhu wa attu.
16Ayahudi anokhalha umikoani ni ayo ahokhalha chiire wookholha ukumi aya. Ahohokholhiya ukhuma wa amalhaponi aya, nkeevakacha attu maelufu makhumi saba ni nthanu, nansho khakushilhe mateeka ittu iriyoothe. 17Nenno naari nihuku no khumi ni ttaaru no mweeri uneehaniya Adari. Nihuku naatwanre no khumi ni ncheshe, aheettuwacha, ahopangacha ukhalha nihuku no isikukuu ni uthapelhelha. 18Nansho Ayahudi o iwaani yuulhupalhe yo Ususa ahokumaana tho nihuku no khumi ni ttaaru ni nihuku no khumi ni ncheshe ni nihuku no khumi ni nthanu no mweeri uyo nkeettuwacha. Nkaapangacha ukhalha isikukuu yo yolhia ni ushangarara. 19Wo nlhatu nno, Ayahudi anokhalhacha mu ittoko ni mu iwaani chikaani anoopangacha nihuku no khumi ni ncheshe no mweeri wo Adari ukhalha phi isikukuu, ni uttuvana, ni akina anokhalhacha mu iwaani chuulhupalhe anoopanga nihuku no khumi ni nthanu no mweeri wa Adari thoko nihuku no wiittuwa, ni uttuvana chiicho.
Isikukuu yo ukottolha ineehaniya Purimu
20Namodekai aholhepa chittu chikhumelhenlhe chonkhaye. Yamalheke ahaalhepelha iwarakha Ayahudi onkhaye aari mu utawarani wa amwene Ahasuero, 21ahaalheehera wiira kila iyaakha apangache isikukuu, nihuku no khumi ni ncheshe no nihuku no khumi ni nthanu no mweeri uneehaniya Adari. 22Ayahudi ahaakottolha amalhaponi aya mu mahuku ayo, ni mweeri uyo ichuku aya yahorukunushiya ukhalha ushangarara, ni mariro aya ukhalha isikukuu. Aholheehera wiira oopuwelhache mahuku ayo wo upanga isikukuu ni ushangarara, ni uttuvana choolhia ni waakaviha amashikini. 23Paahi, Ayahudi ahorumelhelha upanga thoko chenre aya wo urumelhelhana ni thoko Namodekai chaalhempe aya.
24Nahamani anaaya Nahamedatha, o Uagagi ni mmalhaponi a Ayahudi ahopanga miruku cho waarimeelhiha Ayahudi, tho ahoopa Puri, yaani ikhura, wiira achuwelhe nihuku no waanyakathacha ni waarimeelhiha Ayahudi. 25Nansho Naesta vaarwelhe aya wa amwene, amwene ahokumiha malhehero wo ulhepa iwarakha wiira miruku chohilhoka cha Nahamani chapangilhe aya wa Ayahudi, chinhokolheelheke mwanene uyo, achishaana aya eevakachiyeke wo uthomeiya vamwirini wo wiivelha. 26Wo chiichammo etu, Ayahudi aheehana mahuku ayo Purimu, wo ulhikaana ni nlhove puri yaani ikhura. Wo nlhatu no iwarakha ya Namodekai ni chittu choonne aya ashineene ni chilhe chaapantte aya. 27Ayahudi ahopanga ukhalha nlhehero nuulhupalhe uwannya aya, ni wi iyari aya ni wa ntu riyoothe nothanana ulhutaana ni ayo, wo kila yaakha ithananiye, wo uhihiya, mahuku meelhi ayo athapelhelhiye isikukuu ulhikaana ni malhehero a Namodekai. 28Tho ahorumelhelhana wiira kila nikosho na Ayahudi, iyari ni iyari, kila nkowa ni iwaani, inothananiya oopuwelheke nihuku no Purimu ni uttapelhelha mahuku o uhimalha.
29Paahi ahano Naesta, abiti Naabihaili, aholhepa iwarakha wo ipilhi aya yonkhaye, anari vamoka ni Namodekai Ayahudi uhimiechesha chittu chaalhempe aya Namodekai mpacho vawo, chinaacha mwaha wo Purimu. 30Iwarakha iyo yaalhepiye wa Ayahudi onkhaye, ni inakala aya urweehiya umikoa chonkhaye imia imoka ni makhumi meelhi khuwa saba cho utawara wa Nahasuero. Iwarakha chiyo chahaavaha Ayahudi mpuha ni ukumi, 31ni waahimeria ashinene ayo ni iyari chaya wiira apangache isikukuu cho Purimu wo ikatema aya inothananiya, thoko valhe vaari aya oopuwelhaka malhehero o uttuka wo uhilhia ikatema vonlha aya. Yayo malhehero ayo alheheriye ni Namodekai, Ayahudi, vamoka ni ahano Naesta. 32Malhehero a Naesta ahohimiechesha chittu chinaacha Purimu chiyo, niayo aholhepiya nkitabuni.
The Bible Version in Makua @The Word for The World International and Makua Language translators. All rights reserved.