Esta 7
7
1Paahi amwene ni Nahamani ahorwaacha u Naesta ulhiani isikukuu. 2Nihuku no nayeelhi, vaawuria aya idivai, amwene ahaakoha Naesta tho, “Vanova, ahano Naesta, nnovenda ittu yaani? Nkihimerieke etu, ni inyu nnoopatta. nivendo ninyu phi ittu yaani? Ata yakhalhaka inusu yo umwene aka kinouvahani.”
3Ahano Naesta ahaakhulha, “Yakhalhaka kihorumelhelhiya ni inyu amwene ni mwattunaka ukivaha ittu kinothanana aka, paahi attu aka ni ayo akhalheke vamoka ni mii. 4Ukalhawaya mii ni ashilhoko aka nihothumihiya wiira niiviye ni urihelhiya utayi. Yakaari ninottumihiya ukhalha ipotta ashilhopwana ni ashithiyana kammaalha, nansho nihothananiya wiiviya, ata chiicho mariro ihu khaawo ntu nooria ulhiva ihasara ilha wa amwene.”
5Paahi amwene Nahasuero ahaakoha ahano Naesta, “Phi mpani nothanana upanga ittu thoko yeyo? Ri vayi ntu uyo?”
6Naesta ahaakhulha eeraka, “Mmalhaponi ihu muulhupalhe anonivenga, phi Nahamani alha!” Vavawo Nahamani ahokelhiya ni woova, umihoolho wa ahano ni amwene.
7Amwene nkeemelha wo urushiya, ahohiya idivai aya, ni urwaa vathe vari ibustani yo uhano. Nahamani voonilhe aya wiira amwene ahorushiya ni uthanana untwarusha, ahohalha utulhi wiira ampepecheke ahano Naesta ookholhe ukumi awe. 8Yamalhekeru vavawo, amwene ahohokolhia ukhuma ubustanini, vaakenlhe aya uchuumbani vaawurielhiya idivai, ahonphwanya Nahamani aneewulhunshe vakhiviru ni ihiche ya ahano Naesta. Amwene vonne aya chiicho ahokhuwelha wo nlhove nuulhupalhe eeraka, “Ana ntu ulha, nothanana unvara wo machiri ahano umihoolho aka, tho uhanoni?”
Amwene hinamalhiha wuulhumacha, akarumiya ahonkhuneelha Nahamani wiitho. 9Naharboni, mmoka a akarumiya anopanga ntheko wa amwene, nkeera wiira, “Inyu amwene Nahamani hokorosha mwiri wo umwiivelha Namodekai ookholhe ukumi inyu, inyu amwene. Mwiri uyo, uhorekama imita makhumi meelhi ni piilhi, urii uwaannya uwo.”
Paahi amwene nkeera wiira, “Munthomieke Nahamani vamwirini aya vawo.”
10Nahamani, aheeviya vamwirini akoronshe awe mwanene wo nlhatu no umwiivelha Namodekai. Paahi, urushiya wa amwene nkawaamalha.
The Bible Version in Makua @The Word for The World International and Makua Language translators. All rights reserved.