Esta 6
6
Namodekai anoovahiya nthimicho na amwene
1Uhiyu uyo, amwene Nahasuero kaapattilhe ikhove. Ahoolhehera ikitabu yo ulhepiya chittu cho wupuwelhiya wo kila nihuku iwiihiye, nkayaashomiya umihoolho waya. 2Vaashoma aya vawo Namordekai nkayoona vakittu vaalhepiye miruku cho wiiviya amwene chaapangiye ni Nabigthana ni Natereshi, eelhi munlhokoni mwa akarumiya a amwene, aneemelhelha ichuumba cha amwene. 3Amwene ahokoha wiira, “Chani, nihaavaha Namodekai nthimicho ama nttuvo naani wo ulha mwaha ulha?”
Akarumiya aya ahaakhulha wo wiira, “Khiiwo mpannge inyu wo nlhatu waya.”
4Amwene ahokoha tho wiira, “Haawo nhoolhelhi riyoothe upwaroni uwo?”
Ikatema iyo Nahamani aari anakenlhe ipwaro yo vathe uhano, aari anawiilhe wa amwene uvekelhani Namodekai eeviye vamwirini akooroshilhe aya. 5Paahi akarumiya ahonhimeria amwene wiira, “Nahamani aari upwaroni uwo, anothanana uwoonani.”
Amwene nkeera wiira, “Munhimerieke akelheke mpaani.”
6Paahi Nahamani vaakenlhe aya mpaani, amwene ahaakoha wiira, “Chani, kimpangelheke ittu yaani ntu kinottuna aka unvaha nthimicho?”
Nahamani nkoopuwelha munrimani mwaya, “Amwene nothanana unvaha mpani nthimicho? ama miyaano.”
7Paahi Nahamani ahaakhulha amwene, “Ntu anothanana aya wiira amwene unvaha ittuvo ni nthimicho, 8inothananiya anamitheko a amwene awihaache ikuwo yootelha chinowara aya amwene ni ifarasi awe mwanene anawanre ittaji ye imwene mmuruni. 9Ni mmoka a manyaaholhelhi inyu anothimichiya, ammwariheke ntu uyo ikuwo cho imwene chiyo, ni unholheelha anawenlhe ifarasi inyu mpaka uri ipuwa yo iwaani, uno ahimiaka wiira, ‘Chommo phi nopangelhiya awe ntu nothananiya uthimichiya na amwene!’”
10Yamalheke amwene aheerelha Nahamani, “Mwaakuvieke, nkusheke ikuwo ni ifarasi, mwaavaheke nthimicho ulha Namodekai Ayahudi, anokhalha vankhorani uhano. Nhihiye waapangelha ittu iriyoothe nhimmie inyu.”
11Paahi, Nahamani ahokusha ikuwo chiyo ni waawariha Namodekai, ni weetiha vachulhu ifarasi ya amwene ahomweetiha mmaphironi mwo iwaani ahimiaka umihoolho waya wiira, “Cho phi nopangelhiya awe ntu nothananiya awe uthimichiya na amwene!”
12Yamalheke, Namodekai ahohokolhia vankhorani uhano. Nansho Nahamani ahottawelha uwannya aya, uno anachariye ichuku ni nkayeekhuneelha ikhove aya wo ikuwo oonaka ishoni. 13Wowo ahaahimiachera Nazereshi, ahanu aya vamoka ni manyampwana aya onkhaye ittu yaapattilhe. Nazereshi ni manyampwana aya aheerelha wiira, “Yakhalhaka Namodekai ntu o nikosho na Ayahudi, ahochokholha ukurusha ipilhi inyu khannooria, unkottolha, nansho anouukottolhani.”
Nahamani anowiiviya
14Vaari aya athepaka wuulhumacha yayo, anamitheko a amwene ahophiyacha chitema ni unkusha Nahamani urwaa usikukuuni u Naesta.
The Bible Version in Makua @The Word for The World International and Makua Language translators. All rights reserved.