Esta 5
5
Naesta ahaalhatulha amwene ni Nahamani Usikukuuni
1Nihuku no neraru no uttuka waya, Naesta ahowarelha ikuwo chaya cho uhano, ahorwaa ni weemelha ntenje no nhina no inupa ya amwene awehaka ipwaro ya amwene. Amwene ari mpani mmo anakhalhenlhe ihiche ye imwene, miitho aya awehaka vari nkhora wo ukelhelha. 2Amwene vonne aya ahano Naesta aneemenlhe vapwaroni, ahoteelhiya, nkayanthoonyera ikopo aya yo idhahabu avarenlhe aya mmathathani. Naesta ahochushera, nkaavara ikopo iyo. 3Vavawo Amwene nkaakoha eeraka, “Nnothanana ittu yaani Naesta? Nkihimerie ittu nnothanana inyu, ni inyu nnoopatta ata khalhaka inusu yo imwene aka kinouvahani.”
4Naesta nkaakhulha eeraka, “Mwattunaka, inyu amwene, mmweeke lhelho vamoka ni Nahamani, usikukuuni yo yolhia kinohalha aka uutterekelhani inyu amwene.”
5Amwene aholhehera wiira Nahamani aweeke chitema, thoko chivekenlhiaya Naesta. Paahi amwene ni Nahamani ahorwaa usikukuuni alhatulhiye ni Naesta. 6Vaari aya awuriachaka idivai, amwene ahaakoha tho Naesta, “Nnothanana ittu yaani vano? Nkihimerieke etu, ni inyu nnoopatta. Nnovekelha ittu yaani? Ata yakhalhaka inusu yo umwene aka kinouvahani.”
7Naesta ahaakhulha eeraka, ittu kinolhapelha aka phi ilha, 8“Mwoonaka inoorera amwene, nrumelhelheke uvenda waka, inyu ni Nahamani mmwaacheke meelho ulhia yoolhia uwannyaka kinohalha aka uwaapelhani. Vavawo kinouuhimeriani ittu kinolhapelha aka.”
Nahamani anopanga miruku yo weeva Namodekai
9Nahamani vaathama aya usikukuuni uwo aari ni mpuha mwinchi munrimani mwaya. Nansho vamwoonilhe aya Namodekai vankhorani wo ukelhelha uhanoni, khaneemelha mena wooromelha, ahorushiya chinene. 10Nansho ahovilhelha ni urwaa uwaannya aya. Nkeehanacha manyampwana aya, ni unhimeria Nazereshi, ahanu aya ni uyo awe. 11Vavawo ahochokholha wiishipa wo nlhatu no nhakhu arinaya, ni achishaana arinaya, ni ipilhi avahiye aya ni amwene, ni uyuulhupalhe arinaya waapwaha manyaaholhelhi akina onkhaye a amwene. 12Nahamani ahothepa wiishipa eeraka wiira, “Mii phi ntu o yeekha kilhatulhiye usikukuuni ni Ahano Naesta vamoka ni amwene. Ata chiicho meelho niholhatulhiya tho vamoka ni amwene. 13Nansho yonkhaye alha akinoteelhiya munrimani mwaka yakhalhaka kinoothepa umwoona Nyahudi Namodekai anakhanlhe vankhorani uhano.”
14Paahi, Nazereshi ahanu aya, ni manyampwana aya aheerelha wiira, “Nkorosheke mwiri o urekama o wiivelha, wo imita makhumi meelhi ni piilhi. Washaakaru, nrweeke mwoolhumaneke amwene wiira Namodekai eeviye vachulhu waya. Yamalheke nrweeke mwalhie yolhia ni amwene wo mpuha.”
Nenno nlhove nno nahaateelhiha Nahamani, ni ayo ahokoorosha mwiri o wiivelha.
The Bible Version in Makua @The Word for The World International and Makua Language translators. All rights reserved.