Esta 4
4
Namodekai anoovekelha ukaviheriya ni Naesta
1Namodekai vaachuwenlhe aya chittu chonkhaye chikhumelhenlhe, ahaahulha ikuwo chawe, ni uwara ikuwo cho majunia, ni wiihika itura. Yamalheke ahovira variyari iwani onlhaka wo nlhove uweeria. 2Ahorwaa mpaka vaari nkhora uhano, nansho khoorilhe ukelha ukhalhawaya khaawo ntu riyoothe ahiyereriye ukelha uhano anari nawanre ikuwo cho majunia. 3Mu kila nkowa, uhimiachiye nlhehero na amwene, ichuku yuulhupalhe yaahapatta Ayahudi. Ahottuka ni wiichunlhelha ni attu enchi ahorupa vatuurani anawanre majunia.
4Ahano Naesta vaahimeriye aya ni akarumiya ni ipotta aya mwaha unomwaacha Namodekai ahochukulha chinene. Ahonrweehelha Namodekai ikuwo cho uwara arulheke majunia, nansho Namordekai ahokhota. 5Yamalheke Naesta aheehana Nahathaki, mmoka amatowashi a amwene aathanlhiye ni amwene wiira apange ntheko Naesta, nkaaruma u Namodekai aakohe nlhatu ni maana aya. 6Nahathaki ahonrweelha Namodekai upuwani, umiholho wo nkhora wo uhano. 7Namordekai ahaahimeria Nahathaki mwaha wonkhaye unkhumelhenlhe, vamoka ni ihesabu yonkhaye yo isiliva Nahamani alhupenlhe wiira noolhiva ukhuma unikhupini wa amwene yakhalhaka Ayahudi onkhaye anoorimelhihiya. 8Ahoonvaha inakala imoka yo ntangazo nihimiachiye iwaani yo Ususa inaacha mwaha wo weevakachiya Ayahudi, nkaavenda Naathaki wiira ankushe Naesta, anhimierieke mwaha uyo, ni weerelha arwee anlhapelhe amwene oonelhe ikiriri Ayahudi, ashilhoko aya Naesta. 9Nahathaki ahorwaa ni unhimeria Naesta chittu chonkhaye chihimiye ni Namodekai. 10Naesta ahomwiirelha Nahathaki ahokolhie anhimerieke Namodekai wiira, 11“Akarumiya onkhaye a amwene ni attu o mikowa chonkhaye anoochuwelha wiira ntu riyoothe akelhaka muntenjeni ni umwoona amwene wo uhiihaniya, ntu uyo nowiiviya. Ntu nooria uhiyereriya phi ulhe athoonyeriye ikopo yo idhahabu ya amwene wiira hiiviye. Ni mii akineehaniya ni amwene, mweeri mmoka vano.”
12Namodekai vaapattilhe aya nttenga u Naesta, 13paahi, ahomwaamuka eeraka wiira, “Nhaanyihere wiira inyuva nnoolhama waapwaha Ayahudi akina ukhalhawaya nrii uhanoni. 14Mwamaalhaka ikatema thoko ilha, nikaviho ninoowa ukhuma wiikina ni woopolhiya, nansho inyuva nnookhwa ni ashilhoko a manyaathumwaninyu anorimeelhihiya. Mpani nochuwelha wiira inowooriana nhopangiya ahano wo nlhatu no ikatema thoko ilha!”
15Naesta ahomwaakhulha Namodekai, eeraka wiira, 16“Nrweeke mwaathothokanihe vamoka Ayahudi onkhaye ari iwaani yo Ususa. Nttukeke wo mahuku mararu, uhiyu ni uthana wo nlhatu waka. Ni mii vamoka ni ipotta chaka ninoottuka chiicho. Yamalhekeru vavawo kinorwaa wa amwene, inakhalhaka akinahimeriya. Khalhaka nookiva, paahi akiivike.”
17Paahi, Namodekai ahorwaa ni upanga thoko chilheheriye aya ni Naesta.
The Bible Version in Makua @The Word for The World International and Makua Language translators. All rights reserved.