Esta 3
3
Nahamani anoopanga miruku cho weeva Ayahudi
1Chamalheke chittu chiyo, amwene Nahasuero ahoonvaha ikuru yuulhupalhe Nahamani yo ukhalha nhoolhelhi. Nahamani aari anaaya Nahamedatha, o iyari i Naagagi. 2Amwene aheera wiira ashulhupalhe onkhaye o iserikari aya anrumelhelhe ni umooromelha Nahamani. Nansho Namodekai kharumelhelhe mena wooroma. 3Manyaaholhelhi akina aapanga ntheko wa amwene, ahoonkohacha Namodekai wiira, “Woonaka inyuva khannorumelhelha nlhehero na amwene?” 4Kila nihuku eerelhiya ahiyeke nhambo uyo, nansho Namodekai kharumelhenlhe. Ahokhota upanga chiicho eeraka wiira yayo Ayahudi, paahi khanooria wooromelha Nahamani. Paahi nkayaahimeria Nahamani ooneke khalhaka noovilhelha nhambo u Namodekai uyo. 5Nahamani voonilhe aya wiira Namordekai khanooromelha mena waakhoromelha ahothunalha chinene. 6Tho, vaachuwenlhe aya wiira Namodekai aari Ayahudi, aheera wiira untwarusha veekha ayaru khinthosha. Paahi ahopanga miruku cho weeva Ayahudi onkhaye, ari mu umweneni wa amwene Nahasuero.
7Mweeri wo upacha uneehaniya Nisani, iyaakha yo khumi ni piilhi yo utawara wa amwene Nahasuero, Nahamani aholhehera yoopiye ikhura, yaani Purimu wiira apatte nihuku no utimiriha miruku chawe. Paahi ikhura yahowulhuwelha nihuku no khumi ni ncheshe no mweeri wo khumi ni piilhi uneehaniya Adari.
8Paahi, Nahamani aheerelha amwene wiira, “Ahaawo attu o ilhapo ikina anokhalha kila vakittu vatawara inyu, ni kila nkowa. Attu ayo ahaana malhehero ahinolhikaana ni attu akina. Mena kanottuna urumelhelha malhehero inyu, paahi khavanlhoka waavilhelha wo ittu iriyoothe. 9Mwattunaka inyu amwene, malhehero akumihiye, wiira attu alha arimeelhihiye. Ni mii kinoolhupelha khalhaka nnoorumelhelha upanga chiicho, kinokumiha ikilo thelhathini ni saba elfu ni imia nthanu cho isiliva cheeshiye unikhupini wa amwene.”
10Paahi amwene ahorulha ipete aya, anonyathelha nhuri ni unvaha mmalhaponi a Ayahudi Nahamani anaaya Nahamedatha, o iyari i Naagagi. 11Amwene nkaanhimeria Nahamani wiira, “nhovahiya attu onkhaye ni isiliva chiyo, ntumiyeke thoko chinothanana inyu.”
12Paahi nihuku no khumi ni neraru no mweeri wo upacha, Nahamani aheehana amakatibu onkhaye a amwene, nkaavahacha ntangazo naathananiye ulhamulhiya wo kila nuulhumo mu utawara uyo, yamalheke nttenga uyo uwanelhihiye wa atawara onkhaye, manyaaholhelhi o mikoa, ni manyaaholhelhi o makosho utwaraana ni nuulhumo ninoolhumachiya vakittu vawo. Ntangazo nno naakumihiye wo nchina na amwene Nahasuero, ni unyathia nhuri wo ipete aya. 13Akarumiya ahorweeha nttenga uyo mu kila nkowa mu utawara uyo. Ntangazo nno naahimia wiira wo nihuku nimoka tu, yaani nihuku no khumi ni ttaru no mweeri wo khumi ni piilhi uneehaniya Adari, Ayahudi onkhaye ashimirawo ni ashulhupalhe, manyoopani ni achishaana, onkhaye eeviyeke, ni urihelhiya utayi, ni nhakhu aya ukushiyeke. 14Nttenga uyo waathananiye ushomiyeke voonene kila mu kila nkowa, wiira kila ntu akhalheke chiire wo nlhatu no nihuku nno.
15Wo nlhehero na amwene, ntangazo nna nahoshomiya iwaani yuulhupalhe yo Ususa, ni akarumiya ahoshomacha mu mikowa chonkhaye. Amwene ni Nahamani ahoongoma vathi ni uwuria ikatema attu o iwaani yo Ususa ahichuwelhaka ittu yo upanga.
The Bible Version in Makua @The Word for The World International and Makua Language translators. All rights reserved.