Esta 2
2
Naesta anoothanlhiya ukhalha ahano
1Yamalhekeru vavawo, urushiya wa amwene Nahasuero wahomalha, ahomuupuwelha Navashti, oopuwelhaka itiamaru aya ni maamulho apangiye vachulhu aya. 2Yamalheke anamitheko aya, aari aapanga ntheko wo waawiihera yoolhia amwene, aheerelha wiira, “Woonaka ahaawo ashimialhi enchi ahinaachuwelha nlhopwana chani, nimwaavieke mmoka aya akhalhe ahanu inyu? 3Nnowooria waathanlha manyaashulhupalhe mu kila nkoa, ni waalhehera wiira aawiihe imialhi o ureera onkhaye akhalheke wi inupani ya manyoopani o Ususa iwaani yuulhupalhe. Yamalhaka arweehiye wiira ashungiyeke ni Nahagai, karumiya anaashunga manyoopani inyu, ni wowo avahiyeke makhura ni chittu chikina cho umpanga arereeke chinene. 4Nohalha uuchivelhani chinene, ni apangiyeke ukhalha ahano vakittu va Navashti.”
Amwene ahoona nlhove nno noombone, nkaapanga chiicho.
5Ahaawo ntu mmoka Nyahudi, o iwaani yo Ususa eehaniya Namordekai anaaya Nayairi anaaya Nashimei, anaaya Nakishi, o nikosho ni Nabenyamini. 6Namordekai aari mmilhokoni mwa attu aakushiye mateka ikatema ya amwene Nayekonia o Uyuda, aavariye mateka ni amwene Nanebukadneza o Ubabuloni. 7Namordekai ahokhalhana mwaana a arokoraya eehaniya Naesta, nchina naya no Iebraniya naari Nahadasa. Naesta aari mwalhi o ureera ikhove ni iruttu. Manyanaangoro aya vaakhwilhe aya, Namodekai ahoonkusha Naesta, nkayaanlhelhia thoko mwaamwanaya.
8Yamalheke malhehero a amwene vaahimiachiya aya, imialhi enchi ahorweehiya Ususa, iwani yuulhupalhe, ni ushungiya ni Nahegai. Naesta ni ayo, ahorweehiya uhanoni wa amwene, alhelhieke ni Nahegai, ntu anaalhelhia ashimialhi. 9Nahegai ahochivelhiya ni Naesta, nkaattuna. Wo uhipicha, ahaavaha Naesta makhura ni yoolhia yoombone. Tho ahaarweeha vakittu voombone chinene wi inupani ari ashimialhi, nkaathalhelha ipotta ashithiyana saba ukhuma uhanoni wa amwene, wiira aakavihere ntheko.
10Naesta aari ahineehimiacha nihimo naya mena nikosho naya, ukalhawaya Namordekai aheerelha wiira ahipange chiicho. 11Kila nihuku Namordekai ahorukureriacha uwo ni uwo umihoolho ntenje no inupa ya manyoopani wiira achuwelhe chittu chinohalha waapatta Naesta.
12Mahuku aathananiya imialhi chiyo wiichesha rata ni wireeriha yaari iyaakha imoka. Mieri sita cho mpacho chaari cho wireeriha wo woota makhura o manemane, ni mieri sita cho umalhihera chaari cho woota makhura makina ni chittu chikina cho unukelha. Yamalhekeru vavawo, kila mwalhi ahorweehiya wa amwene Nahasuero vekha awe. 13Ikatema yo urwaa wa amwene, kila mwalhi ahovahiya kila ittu yaathananne awe ukusha ukhuma wi inupa anokhalha ashimialhi ni urwaana uhanoni. 14Uchechilho phi yaari ikatema yo urwaa wa amwene, ni vanosha aya, mwalhi uyo ahorweehiya wi inupa ikina ari ashimialhi, ashungiyeke ni Nashaashgazi, karumiya aneemelhelha ipocha cha amwene. Mwalhi kaathananiya uhokolhia wa amwene, ahichivelhiaka ni amwene ni wiihaniya wo nchina nawe.
15Ikatema i Naesta urwaa wa amwene yahophiya. Yayo, anaaya Naabihaili, mwaana a arokoraya Namordekai, aalhelhiye ni Namordekai, kathananne uvekelha ittu iriyoothe yo uthepa chittu chaahimeriye ni Nahagai, karumiya o ipocha cha amwene. Kila ntu amoonilhe Naesta, ahochivelhiya. 16Paahi, Naesta arweehiye uhanoni wa amwene mweeri wo khumi, uneehaniya Tebethi, mu iyaakha yo saba yo utawara wa amwene. 17Paahi amwene ahochivelhiya chinene ni Naesta upwaha ashithiyaana akina onkhaye. Ahottuniya chinene waapwaha imialhi akina. Paahi amwene ahommwariha ittaji yo uhano mmuruni mwaya ni waapanga ahano Navashti. 18Yamalheke amwene ahopanga isikukuu yuulhupalhe wo nthimicho wa Naesta, ahaalhatulha manyaaholhelhi ni anamitheko onkhaye o imwene aya. Tho amwene ahohimiacha uhowukulha ulhiva ikhodi mikowa chonkhaye, ahottuva chittu chinchi ulhikaana ni ipilhi aya yo imwene.
Namodekai anoomwokholha amwene.
19Imialhi vakumanne aya nkwaha wo nayeelhi, Namodekai aari anathanlhiye ukhalha nhoolhelhi. 20Ukhalhawaya Naesta aari ahinaaya wiihimiacha nihimo naya mena nikosho naya thoko chenre aya wo waamukiya ni Namodekai wiira ahipange chiicho, ni uyo ahorumelhelha thoko vaalhelhiya awe anari mwaana.
21Namodekai vaakhalha aya vankhorani wa amwene, Nabigthana ni Natereshi, akarumiya eelhi a amwene eemelhelha mikhora cho ichuumba cha amwene, ahothunalha chinene ni upanga miruku cho weeva amwene Nahasuero. 22Namodekai ahochuwelha miruku chiyo, ni ayo nkayaahimiachera ahano Naesta, Naesta ni ayo nkayaahimiachera nttenga uyo amwene. 23Yamalheke uwehawehiya miruku chiyo, yahochuwania wiira chaari cho ikekheene. Paahi, attu eelhi ayo ahochipulhiya vachulhu miri yo wiivelhiya. Malhove alha onkhaye aholhepiya mu ikitabu yo wuupuwelhiya umihoolho wa amwene.
The Bible Version in Makua @The Word for The World International and Makua Language translators. All rights reserved.