Esta 1
1
Ahano Navashti ahoruna unrumelhelha amwene Nahasuero
1Amwene Nahasuero ahotawara mikoa imia imoka ni makhumi meelhi khuwa saba ukhuma Uindia mpaka Uethiopia. 2Imwene awe Nahasuero yaari iwaani yuulhupalhe yo Ususa.
3Yaakha yo neeraru yo utawara waya, amwene Nahasuero ahopanga isikukuu wo nlhatu na anamitheko aya onkhaye vamoka ni ahoolhelhi. Ahaalhatulha manyaaholhelhi o mphingo wo Uajemi ni Umedia, attu o ipilhi ni attu o uchuwania. 4Paahi, wo ikatema yo mieri sita, Nahasuero aari oonihaka nhakhu mwinchi o imwene aya, ni nthimicho wo utawara waya.
5Yamalheke, amwene ahopanga isikukuu wo ikatema yo mahuku saba, wo nlhatu na attu onkhaye uchokholhelha ashinkani mpaka ashulhupalhe. Isikukuu iyo yaapangelhe muntenjeni vari ibustani yo uhano. 6Vakittu vawo vaholhokihiya wo mapazia yo uteelha ni buluu. Mapazia ayo aattukelhelhiye nkhoyi wo uteelha, ni zambarau, vachulhu mikurio chithekiye wo malhuku ahikiye irangi. Tho chaheeshiya ihiche chihemiye wo idhahabu ni malhuku o irangi, marumaru, ni ilulumizi ni malhuku makina o nhakhu. 7Attu ahowurielha chittu cho uwuria mu ikahi chihinolhikaana cho idhahabu, ni amwene ahokumiha chittu cho uwuria che imwene wo nrima woombone. 8Wo malhehero a amwene kila nlheto ahowuria ittu yo uwuria yaathananne awe ni uhiya, ukhalhawaya amwene ahaalhehera anamitheko aya anopanga ntheko wo ukawa chittu cho uwuria.
9Tho, ahano Navashti ni uyo ahaapangelha isikukuu yo choolhia manyoopani ari uhanoni wa amwene Nahasuero.
10Nihuku no saba no isikukuu iyo, amwene Nahasuero anateelhiye munrimani mwawe wo nlhatu no idivai yaawunrie aya, aheehanacha attu aya ahuniye saba anopanga ntheko wa amwene, yaani Namehumani, Nabiztha, Naharbona, Nabigtha, Naabagtha Nazethari ni Nakarkasi. 11Nkaalhehera akarumiya awe wiira ammwiihe ahano Navashti umihoolho wa amwene, anawanre ittaji aya yo uhano. Ahano uyo aari o ureera chinene, paahi aathananne wiira oonihe ureera waya wa alheto ni ahoolhelhi. 12Nansho akarumiya ayo vaahimenrie aya ahano malhehero a amwene, ahano Navashti ahokhota uwa. Paahi amwene ahorushiya chinene munrimani mwawe.
13Yaari malhemalhelho a amwene waakoha attu o irusho mwaha fulani, paahi ahoweehana attu o ikekhiaye ni o waamulha wiira achuwelheke ittu yo upanga. 14Ni attu aari aavaha irusho amwene aari, Nakarshena, Nashethari, Nadmatha, Utarshishi, Namarena, Namarsena ni Namemukani, yayo phi ari ashulhupalhe saba o Uajemi ni Umedia, ari attu o ipilhi chinene mu utawarani waya. 15Amwene ahaakoha wiira, “Wo ulhikaana ni malhove o Ikekhiaye, ahano Navashti apangiyeke ittu yaani? Ukhalhawaya kihaaruma akarumiya aka, nansho yayo ahokhota urumelhelha malhehero aka, mii amwene Naahasuero.”
16Yamalheke Namemukani nkaakhulha umiholho wa amwene ni ashulhupalhe eeraka wiira, “Ahano Navashti kahiwena wiira ahaathekelha amwene tu nansho vavawo ahaathekelha manyaaholhelhi onkhaye ni kila ntu mu imwene Nahasuero! 17Mwaha ulha uhoochuwania wa manyoopani onkhaye, wo chiicho anowakhotelha manyowannyaya wiira, ‘Amwene Nahasuero aholhehera wiira ahano Navashti awiihiye umihoolho waya, nansho ayo ahokhota.’ 18Ilhelho nna manyoopani ashulhupalhe o Uajemi ni o Umedia eewilhe ittu ipangiye ni apwiiyamwene anowaapangelha ashulhupalhe onkhaye a amwene chiicho. Wo chiicho etu mattepwa niphiondo chinochara kila mpata. 19Paahi vano, mwaattunaka inyu amwene, Nlheehereke wiira Navashti ahiwe tho umiholho winyu. Malhehero ayo Alhepiyeke ukhalha malhehero wa attu o Upersia ni o Umedia, wiira ahirukunushiye. Yamalheke uhano uyo, avahiyeke nthiyana nkina o ureera umpwaha yoyo. 20Nlhehero nna vanohalha aya uhimiachiya wi imwene inyu yonkhaye, manyoopani onkhaye anowathimicha manyoowannya aya, akhalhaneke nhakhu ama ahikhalhaneke.”
21Amwene ni manyaaholhelhi aya ahochivelhiya chinene nlhehero nna, amwene ahopanga thoko Namemukani chaahimmie aya. 22Paahi, ahorweeha iwarakha kila vakittu yaatawara aya, wo kila nkowa wo nuulhumo nawe ninochuwaniya, kila nlhopwana ahimiache unupani wawe wo nuulhumo naya ni wo kila ntu.
The Bible Version in Makua @The Word for The World International and Makua Language translators. All rights reserved.