Ntu o uhimiacha 3
3
Nlhuku ahopanga kila ittu wo ikatema aya
1Kila ittu iri ni ikatema aya ni kila ittu velhaponi ihaana ikatema aya. 2Ikatema yo uyaria ni ikatema yo ukhwa, ikatema yo waalha ni ikatema yo ukhungura. 3Ikatema yo wiiva ni ikatema yo ulhamiha, ikatema yo uphomolha ni ikatema yo utheka. 4Ikatema yo wunlha ni ikatema yo Uthia, ikatema yo mariro ni ikatema yo uthwelha, 5Ikatema yo uttunana ni ikatema yo uhittunana, ikatema yo ukumbatira ntu ni ikatema yo uhiya ukumbatira, 6ikatema yo waavia ni ikatema yo upoteriha, ikatema yo ushunga ni ikatema yo uriha, 7ikatema yo uthaalhiha ni ikatema yo utotta, ikatema yo wuulhumacha ni ikatema yo umaalha shiriri. 8Ikatema yo uttuna ni ikatema yo urushiya, ikatema yo ikhoto ni ikatema yo mpuha. 9Namitheko nopatta ittu yaani ukhuma unthekoni wawe? 10Mii kihoona mahuvo avahiye ntu ni Nlhuku. 11Nlhuku ahopanga kila ittu ikhalhe yoombone wo ikatema aya. Ahaavaha attu irusho cho uchuwelha chittu chinowa kaanyuma, nansho khammahilhe khanvahilhe uchuwelha chittu cha Nlhuku toka uchokholhelha mpaka umalhelha waya. 12Kinoochuwelha wiira, wa ntu ihaawo ittu imoka inonchivelha, ushangarara ni wiivaha mpuha ikatema yonkhaye vari awe nkumi. 13Hii onkhaye va ninothanana ulhia ni uwuria ni ushangarara wo nlhatu no ntheko ninopangihu. Ukhalhawaya yoyo phi mattunelho a Nlhuku 14Kinoochuwelha wiira ittu iriyoothe inopanga awe Nlhuku inoolhokelha wo mahuku o uhimalha. Khiiwo inooria wunchereria ama uwukhuwa, ukhalhawaya Nlhuku ahopanga chittu chikhalhe chiicho wiira attu anthimicheke. 15Ittu inopangiya vano, ihomalha ukhumelhelha katashi, ni ittu inohalha ukhumelhelha kaanyuma ihomalha ukhumelhelha, ni Nlhuku anoopanga ittu yelheyelhe ikhumelhelheke tho ni tho.
Uhikhalha ni attu anokhulhuvelhiya velhaponi
16Uthepa yayo, kihohumbukulha wiira ilhapo phi vakittu vo ikekheene ni ulhoka, nansho vanotawara uwonya. 17Paahi munrimani mwaka kaheera, “Nlhuku nowaahukumulha attu o ikekhiaye vamoka ni attu anowonya, ukhalhawaya ahopanga kila ittu ni wo kila ntheko wo ikatema aya.” 18Nkakeera tho munrimani mwaka wiira, Nlhuku nowaalhikacha attu, oonihe wiira attu anolhikaana ni ashinama. 19Umalhelha wa ntu ni umalhelha wa ashinama phi wowo mmoka uwo. Chinokhwa aya attu phi chiichammo chinokhwa aya ashinama. Onkhaye anoomumulha, ni ntu kahii orera umpwaha mwannama. Wa Nlhuku onkhaye ayo ahokhalha o mpwettu. 20Onkhaye anookhwa ni urwaa vakittu vamoka. Onkhaye akhumme vantukurukhuni ni onkhaye anohokolhia vantukurukhuni. 21Mpani nochuwelha wiira iphumu ya ntu inorwaa uchulhu, ni nnepa wa ashinama unohalha vathi velhaponi? 22Phi vavawo vaachuwenlhe aka wiira, khiiwo ittu iri yoombone chinene wa ntu upanga upwaha uttapelhelha ntheko awe, ukhalhawaya yoyo phi nothananiya upanga chiicho. Mpani nooria unchuwelhiha ntu ittu inothanana awe baada yo ukhwa wawe?
The Bible Version in Makua @The Word for The World International and Makua Language translators. All rights reserved.