Ntu o uhimiacha 2
2
1Paahi, kihoopuwelha munrimani mwaka, kinoulhikachani wo iphiro cho mpuha. Paahi kahochuwelha wiira upanga chiicho phi ittu yo mpwettu. 2Kahoona wiira mpuha khurina ittu, ni “Chani, upuha uri ni ifaida yaani?” 3Kahoopuwelha chinene iphiro yo wiipuhiha wo uwuria idivai, uno kihaaviaka upatta ikekheene, tho kiireke chani wo urumelhelha ittu yo uhilhoka wiira koone chittu choombone chinene chinooria aya attu upanga vanokhalha aya ukumi uhiri ni mahuku menchi velhaponi va. 4Kahopanga chittu chuulhupalhe, kihotheka inupa ni wiilhimelha imata cho mizabibu. 5Kaholhima imata ikani ni ibustani, kahaalha miri cho maphepu o kila inamuna. 6Kaheethipelha mathapwi cho umwacherera miri chiyo. 7Kahothuma ipotta ashithiyana ni ashilhopwana ni akina ahoyaria uwannyaka. Kahokhalha ni nhakhu mwinchi wo mikutiro cho ing'ope ni ikhondoro chinchi upwaha attu onkhaye akiholhenlhe ukhalha Uyerusalemu. 8Kahothothokaniha nchurukhu ni idhahabu ukhuma makhupi a mamwene ni ukhuma ilhapo chikina. Ni mii kahaapatta attu o wiipa ichipo ashilhopwana ni ashithiyana ni ipocha akina enchi akivahilhe mpuha chinene. 9Paahi kahokhalha muulhupalhe waavira onkhaye aholhenlhe utawara Uyerusalemu ni kahokhalhana irusho chinene. 10Kila ittu yaathananne miitho aka kahopatta. Kahovaha nrima aka ittu yaathananne aya upanga, ni nrima aka wahochivelhiya ittu kipannge aka ni nna naari nttuvo no ntukutta naka. 11Yamalheke kahoopuwelha ntheko wonkhaye kinopanga aka wo miono umalhelha waya unokhalha phi chaka. Chenre aka wo ukumiha ntukutta naka upanga ntheko. Kahochuwelha wiira chonkhaye chiyo chaari cho mpwettu, yaari thoko utoporaniha iphioo wo uhikhalha ifaida iriyoothe velhaponi. 12Paahi kihochokholha wuupuwelha iphiro yo ukhalha ni irusho, ukhalha ntu o ihalhahalha, ama ukhalha nkumbafu. Nkakeekoha, Amwene nowa nooria upanga ittu yaani. 13Paahi mii kahochuwelha wiira ukhalha ni irusho phi ittu yoombone upwaha ukumbafu, thoko nthuko uri wo ulhoka upwaha ipiiphi. 14Ntu ri ni irusho, nowoona vakittu vanokelha awe, nansho nkumbafu neeta mwiipiiphini. Ata chiicho kahochuwelha wiira ntu ri ni irusho ni ntu o uhikhalha ni irusho umalhelha waya unokhalha phi yolhe. 15Paahi kaheera munrimani mwaka, “Chittu chinohalha umphwanya ntu o uhikhalha ni irusho chinookipatta ni mii. Wo nlhatuni paahi no ukhalha ni irusho chonkhaye chilha?” Kaheechaakhulha koopuwelhaka, “Yayo phi o mpwettu.” 16Khaawo ntu nomuupuwelha ntu o irusho, mena nomuupuwelha ntu o uhikhalha ni irusho, ukhalhawaya mahuku anowa onkhaye anoolhiyalhiya. Ukhalhawaya chinopanga awe ntu ri ni irusho phi nopanga ntu hiri ni irusho uyo. 17Paahi kahorushiya ni ukumi ulha, ukhalhawaya onkhaye anopangiya velhaponi va khanolhoka. Onkhaye yaari o mpwettu kaari kitoporaka iphioo. 18Kahorushiya ni ntheko aka wonkhaye kipannge aka velhaponi va, woona wiira kinonhiyera ntu nowa utawara utulhi waka. 19Ni mpani nochuwelha wiira nookhalha ntu o irusho ama nookhalha nkumbafu? Nansho yoyo nowa upanga chittu chaapangilhe aka wo irusho velhaponi va. Tho yayo onkhaye ayo ahokhalha o mpwettu. 20Paahi, koopuwelhaka tho chittu chonkhaye chipannge aka velhaponi, kahokhwa nrima. 21Ukhawaya ikatema ikina ntu nopanga ntheko wo ukhulhuvelha irusho chawe, nnikwa ni uchuwelha wawe nonhiyerera ntu nkina apuhe ntheko upangiye wo uhikumiha ntukutta nawe, tho nenno nihokhalha no mpwettu ni ittu yo uhilhoka chinene. 22Ntu nopuha ittu yaani ukhuma unthekoni wawe wonkhaye unopanga awe, ni uhuva unopatta awe velhaponi? 23Ukhalhawaya ukumi awe wonkhaye unoochara uhuva, ni ntheko awe phi uhuva tu ata uhiyu irusho chawe khachineettuwa. Yayo onkhaye ayo ahokhalha o mpwettu chinene. 24Khiiwo ittu iri yoombone inomphwanelha ntu, yaahikhalhe ulhia ni uwuria ni uttapelhelha ntheko awe. Ilha phi noonaa aka wiira inokhuma wa Nlhuku. 25Ukhalhawaya mwahivaheriyeke ni Nlhuku khannoria upatta yoolhia mena ushangarara. 26Nlhuku nommaha ntu nonttuna awe, uchuwelha, irusho, ni upuha. Nansho nommaha ntu o uwonya ukhungura ni wuukelha, ni ummaha ntu nonttuna awe Nlhuku. Chonkhaye chiyo phi chinopangiya wo mpwettu, ni ulhikaana thoko utoporiha iphioo.
The Bible Version in Makua @The Word for The World International and Makua Language translators. All rights reserved.