Ntu o uhimiacha 4
4
1Yamalheke kihoona uwonya wonkhaye unopangiya velhaponi. Attu anaamererihiya anookumiha miithori, nansho khaawo riyoothe naapepecha. Attu anaamereriha ayo o machiri phi nlhatu khaawo ata o waapepecha. 2Paahi, kihoopuwelha munrimani wiira attu anookhwa anorwaa uhinohokolheiya ayo, ahanaa mpuha chinene waapwaha attu ari akumi. 3Nansho hopuha waapwaha attu akhwilhe ayo ni ari akumi, uyo ri hinaya uyaria ni woona uwonya wonkhaye unopangiya velhaponi va. 4Tho kahochuwelha wiira kila ntu nowiikukumiha upanga ntheko wo wooria wawe wiira akhalhe vachulhu yo nkhunanawe. Ni yayo phi o mpwettu, anolhikaana ni ntu notoporaniha iphioo. 5Ntu nkumbafu khanovara ntheko, ni nomalhelha wo wiichiva wo nlhatu no ithalha. 6Nambaya ukhalha ni chittu vakani, vamoka ni mpuha munrimani, upwaha ukhalha ni chittu chinchi vamoka ni uhuva, inolhikaanihiya ni ntu notoporaniha iphioo. 7Tho, kihoona ittu ikina yo uhilhoka velhaponi. 8Kihomwoona ntu mmoka o uhikhalha ni mwaana mena ashilhoko awe, ata chiicho khanohiya upanga ntheko, khanothoshiya ni nhakhu awe, mena khanohiya wiikoha mwanene, Ana kinompangelha mpani yolha ntheko ulha ni wiithuwa mpuha? Ni nenno no mpwettu, ni phi ittu inohuviha. 9Ihophwanelhiya ukhalha ni attu eelhi kuliko ntu ukhalha veekha awe, ukhalhawaya attu eelhi anoopatta ittuvo wo ntheko aya uyo. 10Tho, ntu mmoka awulhuwaka vathi, noowushiya ni nkhunanawe. Nansho ntu ri vekha awe awulhuwaka, yoyo kharina ntu o ummusha. 11Tho attu eelhi arupaka vamoka anoovahanacha ntukutta, nansho ntu akhalhaka vekha awe nohalha upatta chani ntukutta? 12Ntu akhalhaka veekha awe khanooria waakottolha amalhaponi, nansho akhalhaka eelhi anookottolha ni unkottolha mmalhaponi. Mikhoyi miraru chirithiye vamoka khachinottupuwa wo waakuva. 13Horeeriya mmirawo nshikini ri ni irusho waapwaha amwene o wuulhuvalha ari nkumbafu, ahineewa waamukiya, 14ata yakhalhaka aari ntu attukiye ni vano phi mwene, ama ahoyaria hirina ittu vano phi mwene. 15Kihoona attu onkhaye anokhalha velhaponi anattwaranne ni mmirawo o nayeelhi anotawara vakittu va imwene ulhe. 16Attu ari enchi chinene, ni ahaatawara attu onkhaye ayo. Ata chiicho, attu anohalha uyaria kaanyuma khanowa anttuna. Wo ikekheene ni iyo iri yo mpwettu, inokhalha thoko ntu notoporaniha iphioo.
The Bible Version in Makua @The Word for The World International and Makua Language translators. All rights reserved.