Nadanieli 3
3
Nanebukadneza anowahimeria attu athimichelhe isinyago
1Amwene Nanebukadneza aholhehera attu awe wiira uhema isinyago yo idhahabu, iri ni nihimo imita makhumi meelhi ni nane ni ukhanuwa waya waari imita ttaaru. Nkeemesha vakittu vookhwelhe vo Dura, nkoa o Ubabeli. 2Yamalheke amwene ahaalhatulha ashulhupalhe ni attu o weemelhelha olhupalhe o mikoa, ni ashauri, ni attu o ushunga makhuphi, ni attu o wamulha milhatu, ni owamulha milhatu umahakani ni attu o ipilhi onkhaye o mikoa awaacheke uthapelhelha isikukuu yo uchokholha uthimicha isinyago. 3Paahi ashulhupalhe, ni attu o weemelhelha, ni olhupalhe o nkoa, ni ashauri, ni attu o ushunga makhuphi, ni attu owamulha nlhatu, ni attu owemelhelha milhatu umahakamani, ni attu o ipilhi onkhaye o mikoa, ahothukumanacha wo nlhatu no isikukuu yo uchokholha uthimicha isinyago alhehenre amwene Nanebukadneza wiira ithekiye. 4Ntu o uhimiacha nttenga ahokhuwelha wo nlhove nuulhupalhe, “Inyu attu o makosho onkhaye, ilhapo chonkhaye ni o moolhumo onkhaye, nnohimeria wiira, 5mweewaka nlhove no nipalhapatta, ni ifilimbi, ni niphenga, ni ichikwesha, ni isanturi, ni izumari ni ikoma chikina cho nziki, nnothananiya nkhoromacheke vathi ni uthimicha isinyago yo idhahabu yeemeshiye ni amwene Nanebukadneza. 6Ni ntu riyoothe hinokhoroma vathi ni unthimicha isinyago iyo, anoorihelhiya vamooroni unoviha.” 7Wo chiichammo etu, attu onkhaye, veewilhe aya nlhove no nipalhapatta, ni ifilimbi, ni niphenga, ni ichikwesha, ni isanturi, ni izumari ni nlhove no ikoma chikina cho nziki, ahorupacha makhuku ni uthimicha isinyago yo idhahabu yeeshiye ni Amwene Nanebukadneza iyo.
Ashilhoko aya Nadanieli anooshitakiya
8Paahi attu vakani o ukhuma Ukaldayo ahowa ni waashitaki Ayahudi. Ni ahomwiirelha amwene Nanebukadneza wiira, 9“Uwe amwene nlhokelhe mahuku o uhimalha! 10Inyuva, amwene mwaholheehera wiira kila ntu eewaka nlhove no nipalhapatta, ni ifilimbi, ni niphenga, ni ichikwesha, ni ikinanda, ni ifilimbi chuulhupalhe ni kila nlhove no nziki, akhoromeke vathi ni uthimicha isinyago yo idhahabu iyo, 11ni ntu riyoothe hinokhoroma vathi ni uthimicha isinyago iyo, arihelhiyeke nhina ntanuru no mooro unoviha. 12Vano, ahaawo Ayahudi mwathanlhilhe inyu weemelhelha mikoa cho Ubabeli, yaani Nashadraki ni Nameshaki ni Naabednego, ni attu alha kharumelhenlhe nlhehero ninyu uwe amwene. Ni kanttuna uthimicha milhuku inyu ni uthimichelha isinyago yo idhahabu mweemeshilhe inyu.” 13Vavawo mwene Nanebukadneza, ahorushiya chinene, aholhehera wiira Nashadraki ni Nameshaki ni Naabednego awiihiye umihoolho wawe. Ni ayo ahowiihiya umihoolho wa amwene. 14Amwene Nanebukadneza ahaakohacha, “Chani, phi ikekheene inyuva Nashadraki ni Nameshaki ni Naabednego, nhokhota uthimicha milhuku chaka mena uthimicha isinyago yo idhahabu keemeshilhe aka iyo? 15Paahi, vanohalha inyu wiiwa tho nlhove no nipalhapata, ni ifilimbi, ni niphenga, ni ichikwesha, ni ikinanda, ni ifilimbi yuulhupalhe ni nlhove no ichipo chikina cho nziki, chani, nnookhoroma ni uthimicha isinyago kikoroshilhe aka? Ni mwakhotaka, nnorihelhiya vamooroni. Chani, phi nlhukuni nooria uwookholhani?”
16Paahi Nashadraki ni Nameshaki ni Naabednego ahomwaakhulhacha amwene eerachaka wiira, “Uwe amwene Nanebukadneza, hiyaano khaninthuna uwaakhulhani mwaha uyo. 17Ni yakhalhaka chiicho, Nlhuku ninothimicha ihu uyo nowooria unookholha umooroni wo uviha, tho anoonokholha mmiononi mwinyu, uwe amwene. 18Nansho, ata ahipangeke chiicho, uwe amwene, nchuwelheke wiira, hiyaano khaninttuna uthimicha milhuku inyu mena isinyago yo idhahabu mweemeshilhe inyu.”
Manyanlhoko awe Nadanieli araru anoohukumulhiya ukhwa
19Paahi amwene Nanebukadneza ahorushiya chinene, ni ikhove awe yahorukunuwa wo nlhatu na waavenga Nashadraki ni Nameshaki ni Naabednego. Paahi aholhehera wiira ntanuru nithotheriye mooro mwinchi mikwaha saba upwaha mpacho vawo. 20Aholhehera mphingo awe o machiri chinene wiira aattukache Nashadraki ni Nameshaki ni Naabednego ni waarihelha umooroni. 21Paahi, ashimirawo ayo ahottukiya uno anawarilhe makoti aya, ni ikanzu chaya, ni mpumburu ni ikuwo chaya chikina, nkaarihelhiya variyari ntanuru no mooro. 22Ukhalhawaya nlhehero na amwene naari nowoopiha chinene, mooro uyo nkawaathepa uviha chinene, mpaka iteteruwa cho mooro nkachaarimeelhiha attu yaarwehilhe Nashadraki ni Nameshaki ni Naabednego. 23Paahi attu araru ayo, Nashadraki ni Nameshaki ni Naabednego anari anattukiye, ahorihelhiya nhina ntanuru ninoparelha mooro o uviha.
24Paahi, amwene Nanebukadneza ahowuumiya uwanoni, aheemelha uno anarusheye ni waakoha anamittenga aya, “Chani, khanaattukilhe attu araru ni waarihelha vamooroni o uviha?” Ni ayo ahomwaakhulhacha amwene eerachaka, “Eiyo, amwene phi chiichammo.”
25Paahi ahokoha, “Woonaka kinoona attu acheshe eetakachaka umooroni mmo ahinattukiya mena khanavia, ni ntu o neecheshe nooniya thoko mwaana a nlhuku.”
Ashimirawo anoohiyereriya
26Paahi, amwene Nanebukadneza ahaatameria nkhora o ntanuru no mooro, nkeehana, “Nashadraki ni Nameshaki ni Naabednego, anamitheko a Nlhuku muulhupalhe, ni waahimeria wiira nkhumacheke vathe va.” Paahi Nashadraki ni Nameshaki ni Naabednego nkayaakhumacha vamooroni. 27Ahoolhelhi oolhupalhe ni attu o weemelhelha, ni ahoolhelhi o mikoa ni ashauri a amwene, onkhaye ahothukumanacha ni waarukureriacha nkoona mooro uhoochelha waapaha attu araru ayo. Khavilhe ikharari chaya, mena ikuwo chaya, mena khannuka nihiriri niriyoothe no mooro mwiiruttuni mwaya.
28Paahi, amwene Nanebukadneza aheera wiira, “Athimichiye Apwiiya Nlhuku a Nashadraki ni Nameshaki ni Naabednego ukhalhawaya ahonruma naminepa awe ni uwookholha anamitheko awe anaakhulhuvelha. Yayo ahokhotacha urumelhelha malhehero aka o imwene, nkoona nambaya ukhwa wo nlhatu no ukhota uthimicha nlhuku nkina, nansho Apwiiya Nlhuku veekawe.
29“Paahi vano, kinolheehera wiira attu o nikosho niriyoothe, ama ilhapo iriyoothe ama nuulhumo niriyoothe, anohalha wuulhumacha ittu iriyoothe yo uhilhoka wo nlhatu na Nlhuku a Nashadraki ni Nameshaki ni Naabednego, anothamihiya iruttu aya imoka imoka ni inupa chaya chinopomolhiya. Ukhalhawaya khaawo Nlhuku nkina anooria woopolha thoko ulha.”
30Paahi, amwene Nanebukadneza anowunchereria ipilhi Nashadraki ni Nameshaki ni Naabednego nkoa o Ubabeli.
The Bible Version in Makua @The Word for The World International and Makua Language translators. All rights reserved.