Nadanieli 2
2
Itora ya amwene Nanebukadneza
1Mu iyaakha yo nayeelhi yo utawara waya, amwene Nanebukadneza aholhoha itora, nkayaakhalha ni woova chinene munrimani mwawe ata ikhove chahaamwaria. 2Paahi, amwene aheehanacha, anamirete ni attu owoopa nttiti ni akhwiri o Ukaldayo awiihiye wiira aalhamulhelhe itora iyo. Nkayawaacha onkhaye nkayeemelhacha umihoolho wa amwene. 3Amwene Nanebukadneza nkeerelhacha wiira, “Kaholhoha itora, ni iyo inokoopopiha ni mii kinothanana kilhamulhelhiye.”
4Attu o Ukaldayo ahomwaakhulha amwene wo nuulhumo no Ikiaramu wiira, “Inyu amwene nlhokelheke mahuku o uhimalha, unihimerieke itora inyu ni hii anamitheko inyu ninoulhamulhelhani.”
5Amwene aheerelhacha Akaldayo wiira, “Itora inene iyo kiholhiyalha, ni mwahikilhamulhelhe itora iyo, nnowiivakachiya, ni inupa chinyu chinopomolhiya. 6Nansho mwakilhamulhelhaka itora iyo, kinouvahani ittuvo ni nthimicho muulhupalhe. Paahi, nkilhamulhelhe itora iyo.”
7Attu ayo ahomwaakhulha nkwaha wo nayeelhi eerachaka wiira, “Uwe amwene unihimerieke etu itora iyo, ni hii anamitheko inyu ninoulhamulhelhani.”
8Amwene ahaavirikulha wo wiira, “Kinochuwelha wiira nnothanana nhikilhamulhelhe ukhalhawaya nnoona wiira kiholhiyalha itora iyo, 9ni mwahikilhamulhelheke itora iyo, nhaana ntwarusho nimoka wo nlhatu winyu. Ukhalhawaya nheewanana wiira nkootherie ni ukithepiakacha ni uno ikatema chinorwaa. Paahi etu nkilhamulhelheke itora iyo, ukhalhawaya kinoochuwelha wiira inyuva nnowooria ukilhamulhelha.”
10Attu o Ukaldayo ayo ahomwaakhulhacha eerachaka wiira, “Khaawo ntu riyoothe veelhaponi nooria uhimeriani ittu nnothanana inyu iyo. Khaawo mwene riyoothe, ama nhoolhelhi ari ni machiri chinene apachilhe waakoha ittu thoko yeyo wa anamirete ama akhwiri ama attu o Ukaldayo. 11Ittu nnokoha inyu uwe amwene, phi ittu yoorika chinene. Khaawo ntu riyoothe nooria ulhamulhelhani ahinakhalhe milhuku veekha aya chihinokhalha munlhokoni mwa attu.”
12Amwene Nanebukadneza eeweke chiicho ahothunalha ni urushiya chinene, nkalheehera attu ari ni irusho onkhaye o Ubabuloni eevakachiye. 13Paahi nttenga nkawaawanelha wiira attu arina irusho onkhaye eevakachiye, Nadanieli ni ashikunanawe, ni ayo ahaaviya wiira eevakachiye.
Nlhuku ahomooniha Nadanieli itora
14Paahi, Nadanieli wo wiichinaanelha, ahonrweelha Naarioko, nhoolhelhi a attu o ipilhi a amwene aavahiye ntheko o weeva attu ari ni irusho o Ubabeli, 15Nadanieli ahonkoha nholhelhi a amwene wiira, “Wo nlhatuni amwene ulhehera ittu yo uhilhoka thoko yeyo?” Paahi Naarioko ahomwiirelha Nadanieli ittu ikhumelhenlhe yonkhaye.
16Paahi Nadanieli ahonrweelha amwene ni uvekelha wiira anvaheke ikatema wiira oorie unhimeria amwene maana yo itora aya iyo. 17Yamalhekeru yayo, Nadanieli ahohokolhia uwannyawe ni uweerelha manyampwanawe Nahanania ni Namishaeli ni Naazaria mwaha uyo. 18Aheerelhacha wiira ninlhapelheke Apwiiya Nlhuku o wiirimu wiira anoonelheke ikiriri wo nlhatu no mwaha uyo, wiira nihiwe neeviya vamoka ni attu ari ni irusho akina o Ubabeli. 19Vaapiilhe aya uhiyu Nadanieli yahopatakulhelhiya maana yo itora iyo anarupilhe. Paahi Nadanieli ahonshukuru Nlhuku o wiirimu. 20Nkeera wiira “Atotopelhiye Apwiiya Nlhuku mahuku o uhimalha.
Ukhalhawaya irusho ni machiri phi chawawe.
21Nlhuku noopanga chittu chikhumelhelhe wo ikatema inolhoka.
Ni nowaakumiha ni wathaanlha mamwene,
ni attu o umaalha anowaavaha irusho ni attu anooria anowunchereria uchuwelha.
22Nohumbukulha chittu chihinoonia ni chiivithilhe,
ni anoochuwelha chittu chiri upiiphini,
ni mwaari unolhokelha uwannyawe. 23Kinoushukuruni ni utotopelhani uwe Nlhuku a manyaapwiiya ihu,
ukivahilhe irusho ni wooria,
ni nkamwaanichuwelhiha chittu niuvekenlhe inyu,
ni uhonilhamulhelha itora ya amwene.”
Nadanieli noolhamulha itora
24Paahi Nadanieli ahonrweelha Naarioko arumiye waarimeelhiha attu ari ni irusho o Ubabeli, ahomwiirelha wiira, “Nheevakache attu ari ni irusho o Ubabeli, nansho nkirweeheke umihoolho wa amwene, ni mii kinonlhamulhelha itora aya iyo.”
25Paahi, Naarioko ahonrweeha Nadanieli umihoolho wa amwene ni umwiirelha wiira, “Kihompatta ntu munlhokoni mwa attu awiihiye ukhuma Uyuda anowooria ulhamulhelhani itora inyu, uwe amwene.”
26Amwene ahonkoha Nadanieli, eehaniya Nabelshaza, “Chani, nnowooria ukihimeria ni ukilhamulhelha itora aka?”
27Nadanieli ahomwaakhulha amwene eeraka, “Khaawo attu ari ni irusho, ama akhwiri, ama anamirete ama owoopa nttiti anooria ulhamulhelhani itora inyu. 28Nansho haawo Nlhuku o wiirimu anooria uhumbukulha chittu chiivithilhe. Paahi Nlhuku ahowoonihani inyu amwene Nebukadneza chittu chinohalha ukhumelhelha mahuku o umihoolho. Itora inyu ni chowooniya mwoonilhe inyu nnarupilhe.
29“Uwe amwene, itora yahoowelhani nnarupilhe, wo nlhatu no chittu chinohalha ukhumelhelha umihoolho, ni Nlhuku nopatakulha chittu chiivithilhe ahowoonihani chittu chinohalha ukhumelhelha. 30Nansho mii akipatakulhelhiye itora ilha ukhalhawaya kihaana irusho waapwaha attu akina, nansho inyu amwene, upatteke uchuwelha maana yo itora inyu ni nchuwelheke chittu chinohalha upattani.
31“Uwe amwene, mwaahoweha ni umiholho winyu yaheemelha isinyago yuulhupalhe, yuulhupalhe chinene uvira chittu chonkhaye, ni isinyago iyo inoparelha inowoopiha chinene wo uwoonia. 32Muru o isinyago iyo yaari yo idhahabu ikuttie vamooroni, ikakhacha awe ni miono chawe chaari cho malhuku o nchuruku ni nthunkwa nawe ni mapanja awe yaari yo ishaba. 33Mieto chawe chaari cho yuuma ni inyaa chawe chaari cho uthakanihiya ni yuuma ni ulhoko. 34Vathepilhe inyu uweha, nlhuku nuulhupalhe nahophelhiya ukhuma umwaakoni wo uhivariya ni ntu, ni unyakathacha mieto yo ishaba ni ulhoko wo isinyago iyo, ni wuntha ivipande vipande. 35Yamalheke yuuma ilhe, ni ulhoko ulhe, ni ishaba ni malhuku o nchurukhu alhe ni idhahabu chonkhaye chahowunthia ivipande vipande ni ukhalha thoko khanka wi ipuwa ineepettelhiya choolhia ikatema yo ilhimwe. Nkachaaveverushiya utayi ni iphioo ihihalhe ata ikipande imoka. Nansho nlhuku niwunthilhe isinyago ilhe nahorukunuwa ukhalha mwaako muulhupalhe nkanaawanelha ilhapo yonkhaye.”
36“Ilha phi itora inyu, uwe amwene. Ni vano kinoulhamulhelhani. 37Uwe amwene, inyu phi muulhupalhe a mamwene onkhaye. Nlhuku o wiirimu ahouvahani umwene, wooria ni machiri ni nthimicho. 38Nlhuku ahoovahani ikuru vachulhu attu onkhaye, ni ashinnama o mwiini ni ashinuni onkhaye o wiirimu. Inyu nhokhalha thoko muru o idhahabu. 39Wamalhaka utawara winyu inoowa imwene nkina, nansho amwene uyo khanokhalha ni machiri. Ni amalhihakaru umwene uyo noowa amwene o neeraru unolhikanihiya ni ishaba, ni uyo unootawara ilhapo yonkhaye. 40Yamalheke unokhalha umwene wo neecheshe, uri ni machiri thoko iyuuma. Thoko iyuuma chinooria wuntha ni unyakathacha kila ittu, phi chiichammo amwene uyo chinohalha aya utawara imwene chikina. 41Mwahoona tho inyaa ni makhoko o isinyago iyo yaari inusu ulhoko ni inusu aya yuuma. Ukhalhawaya wiira umwene uyo unomianiya, nansho umwene uyo unookhalha ni machiri vakani yo yuuma ukhalhawaya ihaawo yuuma yaathakanihiye ni ulhoko wo ukoroshelhiya iyoopwe. 42Thoko mwoonilhe inyu makokho awe o umietoni inusu aya yaari yuuma ni inusu ikina yo ulhoko wo ukoroshelhiya yoopwe, phi chiichammo inusu yo imwene iyo inokhalha ni machiri vakani ni inusu ikina khinokhalha ni machiri. 43Maana aya wiira ahoolhelhi o imwene iyo anowiithakaniha wo uthelhana ni attu o ilhapo chikina, nansho kanooria uthakaneelhana thoko yuuma ihinooria aya uthakanelha ni ulhoko. 44Mu utawarani mwo amwene ayo, Nlhuku o wiirimu anoochokolhiha imwene uhinooria aya uwuulhushiya mahuku onkhaye, mena ni attu akina khanowa aatawara imwene iyo, nansho imwene iyo inoowulhushacha imwene chiyo ni utawara mahuku o uhimalha. 45Thoko mwoonilhe inyu nlhuku niphenlhe ninene ukhuma umwaakoni, ni chenre aya wo wunthakacha ivipande vipande isinyago ikooroshiye wo yuuma, ni ishaba ni ulhoko ni malhuku o nchurukhu ni idhahabu nne. Uwe amwene, Nlhuku Muulhupalhe houpatakulhelhani chittu chinohalha ukhumelhelha umihoolho. Ni mii kihoulhamulhelhani. Itora inyu phi yo ikekheene ni maana aya phi ilha.”
Amwene nonvaha ittuvo Nadanieli
46Yamalheke amwene Nanebukadneza ahorupa makukhu ni unkhoromelha Nadanieli ni ulheehera wiira ankumihereke Nadanieli isadaka ni ubani. 47Amwene Nanebukadneza ahomwiirelha Nadanieli, “Wo ikekheene, Nlhuku inyu phi Nlhuku muulhupalhe upwaha milhuku chonkhaye ni Thithi anotawara mamwene onkhaye, phi anolhamulha itora ukhalhawaya nhooriya ukilhamulhelha itora ilha.” 48Yamalheke amwene Nanebukadneza ahonvaha Nadanieli ipilhi yuulhupalhe, ni ahonvaha ittuvo chinchi chuulhupalhe, ni umpanga ntawara o nkowa onkhaye o Ubabeli, ni nhoolhelhi a attu ari ni irusho onkhaye o Ubabeli. 49Nadanieli ahonvekelha amwene, ni amwene uyo ahomweesha Nashadraki ni Nameshaki ni Naabednego ukhalha o weemelhelha nkoa o Ubabeli. Nansho Nadanieli ahoohalha upanga ntheko uhanoni wa amwene.
The Bible Version in Makua @The Word for The World International and Makua Language translators. All rights reserved.