Nadanieli 4
4
Itora yo nayeelhi ya amwene Nanebukadneza
1Mii amwene Nanebukadneza, kinowaalhepelha attu o makosho onkhaye, ni ilhapo chonkhaye ni moolhumo onkhaye veelhaponi. Kineera nkhalheke ni mpuha mwinchi. 2Kihoona voombone uchuwelhihani yo ushangiha ni ithikineeha koonihiye ni Nlhuku muulhupalhe. 3Cho ushangiha chaya phi chuulhupalhe chinene!
Ni ithikineeha awe phi o wooria chinene!
Ni imwene awe phi imwene yo uhimalha,
ni ikuru awe inoolhokelha iyari mpaka iyari.
4“Miyaano, Nanebukadneza, kaari mumpuhani unupani waka ni ushichira uhanoni waka. 5Nansho kaholhoha itora yo woopiha, kinari kinarumpe vankorini, moopuwelho ni chowooniya mmuruni mwaka ahokoopopiha. 6Wo chiichammo etu, kaholheehera attu o irusho onkhaye o Ubabeli awiihiye umihoolho waka wiira akilhamulhelhe itora iyo. 7Paahi nkayawiihiya, anamirete, ni Akaldayo ni achuwelhi o itottwa. Kahaahimeria itora aka, nansho khayonrie ukilhamulhelha. 8Nansho ahowa Nadanieli, aneehaniya Nabelteshaza, nchina na nlhuku aka, iri mirima cho milhuku chitakatifu. Ni mii kahonhimeria itora aka, kiiraka wiira. 9Uwe Nabelteshaza, nri muulhupalhe a anamirete, kinoochuwelha wiira mirima cho milhuku chitakatifu chiri nhina mwinyu, ni wiira khiiwo ittu iri yoorika uwannyu. Ni ilha phi itora aka, nkilhamulhelhe.”
10“Vaari aka nkhoveni, kahoona itora ilha, kahoona mwiri woorekama chinene variyari ilhapo. 11Mwiri uyo wahothepa wunnuwa, nkawaakhalha wo ulhipa ni urekama wawe wahophiya wiirimu. Ni wahoonia kila vakittu veelhaponi. 12Mathakuru aya aari oreera. Ni wahochara maphepu anooria waathosha attu onkhaye veelhaponi va. Ni ashinnama onkhaye o mwiini ahopatta nttuchi wuuthi waya, ni ashinuni o wiirimu ahoongoma umarittani wawe. Chittu chonkhaye chahopatta yoolhia ukhuma vamwirini vawo.
13“Vaari aka kinarumpe vakhorini, kahoona itora. Nnepa ntakatifu ahokhuruwa ukhuma wiirimu. 14Nkaakhuwelha wo nlhove eeraka, ‘Ntupulheke mwiri ulha ni utupulhacha maritta awe. Mmoriheke mathaakuru awe ni umwarushacha maphepu aya. Ashinnama ni attaweke ni ashinuni athameke umarittani mwawe. 15Nansho nhiyeke ihinini aya ni mithithari chaya vattayani, inari inattukiye wo nttondoro wo yuuma ni ishaba. Vari mathaakuru o unikotteni.
“‘Ipatteke maashi wo ukame o wiirimu, ni vakittu vawe ikhalhe vamoka ni ashinnama o wiithuphini ni minyepu. 16Irusho chawe ntu chirukunushiye, akhalhe ni irusho cho mwannama wo iyaakha saba. 17Ihukumu ilha iwiilhe wo nlhehero na Nnepa, ni nlhehero na attu atakatifu, wiira attu onkhaye kila vakittu apatteke uchuwelha wiira Nlhuku Muulhupalhe ahaana maamulho vachulhu imwene chonkhaye cha attu, yayo anonvaha umwene ntu riyoothe nonttuna awe, nompanga mwene ata ntu hirina.’
18“Ilha phi itora kilhohilhe aka mii amwene Nanebukadneza. Vano, uwe Nabelteshaza, nkilhamulhelhe itora ilha, ukhalhawaya attu ari ni irusho onkhaye o umweneni waka khanooria ukilhamulhelha, nansho inyu nnowooria ukhalhawaya mirima cho milhuku chitakatifu chiri nhina mwinyu.”
Nadanieli anoolhamulha itora
19Paahi Nadanieli, neehaniya Nabelteshaza, ahowuumiya wanoni wo ikatema, ni nkaachukulha munrimani mwawe. Amwene ahaakhulha nkeera wiira, “Nabelteshaza, ihuuchukulhiheni itora ilha, mena malhamulhelho aya.”
Nabelteshaza ahaakhulha eeraka wiira, “Athithi aka, itora ilha vamoka ni malhamulhelho aya yaaphwanyeke amalhaponi inyu.”
20Mwiri mwoonilhe inyu unari muulhupalhe ni o machiri, ni maritta aya orekama ahophiya wiirimu, ni wooniya kila vakittu veelhaponi. 21Mathakuru aya orera, ni maphepu menchi yo ulhiha chittu chonkhaye, ni ashinnama o withuphini apattaka nttuchi wuuthi waya, ni ashinuni o wiirimu oongomaka mmarittani mwawe.
22“Paahi mwiri muulhupalhe ni o machiri unaachiya uyo phi inyuva amwene. Uyuulhupalhe inyu uhophiya mpaka wiirimu, ni umwene inyu ihowanelha mpaka unomalhelha ilhapo.” 23Nansho, inyuva amwene, mwahomwoona Nnepa ntakatifu akhuruwaka ukhuma wiirimu, nkalheehera wiira, ntupulheke mwiri ulha, ni mwatanganye. Nansho nhiyeke ihinini aya ni mirithathi chaya vattayani vamathakuru makithi o unikotteni, inari inattukiye vavawo wo ntondoro wo yuuma ni ishaba. Munhiyeke ntu uyo athapwiheke wo ukame o wiirimu, ni munhiyeke alhokelhe vamoka ni ashinnama o wiithuphini wo iyaakha saba.
24“Ilha phi malhamulhelho o itora inyu, phi nlhehero na Nlhuku Muulhupalhe wo nlhatu no winyu amwene. 25Inyuva nnowomolhelhiya utayi ni attu! Nnookhalha vamoka ni ashinama o wiithuphini, ni nnoolhia mathakuru thoko ing'ope, ni nnootapwa wo ukame o wiirimu. Ni nnookhalha chiicho wo iyaakha saba, ni umalhelha waya nnochuwelhacha wiira Nlhuku Muulhupalhe phi ri ni machiri vachulhu imwene cha attu, ni unvaha umwene ntu riyoothe anothanana aya. 26Ni nlhehero no uhiya ihinini ni mirithathi yo mwiri vattayani nno maana aya phi ilha. Inyu nnohokolhosheriya tho umwene inyu vanohalha inyu uchuwelha wiira Nlhuku o wiirimu phi notawara. 27Wo nlhatu uyo, uwe amwene, mwiiwelhelheke malhove aka. Nhiyeke uwonya winyu, ni chittu cho uhilhoka chinyu, mpangeke ikekhiaye ni woonelha ikiriri attu aakhiye, paneepa mpuha winyu unowunchereria.”
28Onkhaye ayo ahompatta amwene Nanebukadneza. 29Vaphiilhe aya mieri khumi ni piilhi, amwene Nanebukadneza eetaka vachulhu itatari yo inupa ye imwene yo iwani yo Ubabeli. 30Paahi nkeera, “Mmweheke iwani yuulhupalhe yo Ubabeli, kithekilhe aka wo machiri aka wiira nikhalheke nipuro naka no imwene ni wo nlhatu no nthimicho waka.”
31Volhumanche aya malhove ayo, nkaneewaniya nlhove ukhuma wiirimu niiraka wiira, “Uwe amwene Nanebukadneza, mwiiwelhelheke nttenga ulha, nhothurulhiya umwene inyu. 32Ni inyu nnowoomolhelhiya utayi ni attu inyu, ni nnokookhalha unikotteni vamoka ni ashinnama o mwiini, ni nnoolhia mathaakuru thoko ing'ope wo ikatema yo iyaakha saba. Ni umalhelha waya nnoochuwelha wiira Nlhuku Muulhupalhe phi ri ni machiri vachulhu imwene cha attu, ni nonvaha umwene ntu riyoothe nonttuna awe.”
33Wo uhipicha mwaha uyo nkawaapangiya wa amwene Nanebukadneza. Ahoomolhiya ni urwaa utayi ni attu aya, ni nkaalhia mathaakuru thoko ing'ope. Ni ahotapwa wo ukame o wiirimu, ni ikharari chawe nkachaarekama thoko mapururu o nrepo, ni ihatha chawe chaari thoko cho ashinuni.
Nanebukadneza nonthimicha Nlhuku
34“Vamanlhe aya iyaakha saba chiyo, mii amwene Nanebukadneza kahopathusha miitho aka uweha wiirimu ni irusho chaka nkachakihokolheelha kimwanene. Kahonshukuru Nlhuku Muulhupalhe ni unthimicha Nlhuku nolhokelha mahuku o uhimalha.
Ukhalhawaya imwene awe phi o mahuku o uhimalha,
ni umwene awe unoolhokelha iyari mpaka iyari. 35Attu onkhaye o veelhaponi kaheena ittu, anopanga thoko chinothanana aya, minepa o wiirimu, ni anokhalha veelhaponi, khaawo ntu nooria unchiichiha wiira hipange ittu, mena unkoha wiira nnopanga ittu yaani?
36“Ikatema yeyo yeyo irusho chaka nkachakihokholheelha, ni nthimicho waka, ni ureera waka ni nthimicho wo umwene aka. Ashauri ni attu o ipilhi ahowa ukaavia, nkakaahokolhosheria imwene aka ni upatta nthimicho thoko mpacho vawo.”
37“Ni vano, mii Nanebukadneza kinontotopelha ni unthimicha ni unrumelhelha mwene o wiirimu. Ukhalhawaya mitheko chawe chonkhaye phi cho ikekhiaye, ni ayo khanaattuna attu ari ni itiamaru.”
The Bible Version in Makua @The Word for The World International and Makua Language translators. All rights reserved.